KATXIPORRETA disketxea: "Zazpikolora" CDa + "Ongi etorri Pupu eta Lore" DVDa + "Bonberenea txaranga &

Pirritx, Porrotx eta MariMotots" CDa

Oparo gatoz aurtengoan pailazoak azokara!! Urtea bete dute jada gure txikiek. Hau ospatzeko, hamabi hilabeteotan bizitakoa iruditan bildu dugu ONGI ETORRI PUPU ETA LORE DVDan: Herriz herri eskainitako ikuskizuna, erreportajeak eta bideoklipak... Txikiak goxo eta alai haztea nahi dugu; hazi eta hezi, goxo-goxo bi gerezi, guztion artean. Horretarako Irrien lagunen koadrila izan dugu bidaide urte berezi-berezi honetan: Osasuna da aurrena, jakina, eta Tiritatxo medikuak lagundu digu haurrak sano hazten. Naturaren parte garenez, natura zainduz geure burua ere zaintzen dugula ikasi dugu Largabista basozainarekin. Marikalanbrek zientziaren magia oparitu digu eta Martinbertso, Martinber lagunentzat, kantu kontari etorri zaigu, kulturaren berri ematera. Irria ezpainetan, politena jasoz eta politena emanez bizi nahi dugu eta koloretako Euskal Irria maite dugu, horregatik pailazook urtero ospatzen dugu Zazpikoloroaren jaiotza. Kondairak dioenez, mundua kolorez margotzen duen txori miragarria da Zazpikoloroa, elkartasunaren irudi den zazpi koloreko loroa. Elkartasuna eta aniztasuna dira, hain zuzen, ZAZPIKOLOROA CDaren Ardatza. Batzuetan jaso, besteetan eman. Halaxe sortu da erabat auzolanean egindako PIRRITX, PORROTX ETA MARI MOTOTS & BONBERENEA

TXARANGA CD-DVDa, pailazo taldearen eta Tolosako gaztetxearen urteetako ibilbidearen lekukotza ematen duena. Lagun askok hartu du parte proiektu honetan, eta ohartu gara orotariko krisiez jarduten garen garaiotan, irudimena eta autogestioa direla krisiaren aurkako erremedioa: Sentitu, pentsatu eta ekin, denok elkarrekin!

ABENDUAK 6, asteartea

goizeko 12:00etan

Azokako umeen txokoan

3 urtetik aurrera