Saro Manrique de Lara METODOLOGIA
-
Upload
maider-aizpurua -
Category
Documents
-
view
259 -
download
40
description
Transcript of Saro Manrique de Lara METODOLOGIA
“Saro Manrique de Lara”
metodologia Ingelesa goiztiarraren ezarpena eta jarraipena
Egilea: Maialen Gonzalez
“Irungo La Salleko” Haur Hezkuntza eta Lehen Hezkuntzako ingeles irakaslea
2
Nola irakasten da ingelesa EAEko ikastetxeetan? Gauza jakina da ingelesa, atzerriko hizkuntza gisa, irakasteko zenbait metodo daudela.
Hala ere, EAEn, Derrigorrezko Hezkuntza sisteman gaur egun hiru metodologia nagusi
desberdintzen direla esan daiteke. Alde batetik, Euskal Eskola Publikoek “Hezkuntza
Eleanitza programa” izenekoa erabiltzen dute, Ikastolen Federazioak, aldiz, “Eleanitz
Proiektua” eta Kristau Eskolek, ordea, “Saro Manriqueren proiektua”. Nahiz eta egon
badauden hiru metodologia nagusi hauen artean kokatzen ez diren eskolak, gehiengoa
hiru multzo hauetakoren batean kokatzen da.
Funtsean hiru metodoek antzeko helburuak dituzte, baina horiek lortzeko bideak,
desberdinak dira. Honela, hiruek ingelesa beste eduki batzuk ikasteko erreminta bezala
erabiltzen dute. Gainera, Haur Hezkuntzan antzeko metodoa erabiltzen dute eta
hirurak daude beste arloetan baino, arlo komunikatiboan zentratuagoak.
Era berean, arlo komunikatibo hori bereziki lantzeko, estrategia edo pausu berdinak
jarraitzen dituzte hiruek, hala nola, irakasleak uneoro ingelesez hitz eginez, entzumena
eta ahozkotasuna landuz, eta material egokia eta erakargarria erabiliz.
Beraz, helburu bera lortzeko eduki ezberdinak lantzen dituzte programa desberdinen
bitartez.
3
Ikastetxean kokatuz
Gaur egun, Irungo La Salle ikastetxean ingelesa atzerriko hizkuntza bezala irakasteko
martxan dagoen metodoa Saro Manrique de Larak duela urte gutxi batzuk sortutakoa
da. Mondragon Lingua programaren barnean kokatzen da eta esan bezala, egun,
EAEko Kristau Eskola sareko zenbait eskolatan aplikatzen da. Esan beharra dago Irungo
La Salle ikastetxea kontzertatua dela eta Kristau Eskolen sarearen parte dela.
Ikastetxean ingeleseko bi irakasle daude Haur eta Lehen Hezkuntzako etapetan.
Irakasle bat Haur Hezkuntzako 4 eta 5 urteko geletan eta Lehen Hezkuntzako lehen
zikloan irakasten du, eta bigarrenak, ordea, Lehen Hezkuntzako bigarren eta hirugarren
zikloetan.
Bi irakasleak etengabeko kontaktuan daude, metodoa bera etengabeko prozesu baten
parte delako, Haur Hezkuntzako 4 urteko gelan hasi eta Lehen Hezkuntzako 6.mailan
bukatzen dena (zenbait ikastetxetan Derrigorrezko Bigarren Hezkuntzan jarraipena du,
baina ez honetan). Hau dela eta oso koordinatuta daude, eta behar duten guztietan
biltzeaz gainera, ikasturte bukaeran bilera bat egiten dute kurtsoko balantzea egin eta
hurrengo ikasturtera begira aldaketak edota hobekuntzak egiteko.
Behin ikastetxea apur bat kokatuta, jarraian, Saro Manriqueren metodologiari berari
helduko diot.
4
Metodoa orokorrean
Saro Manriqueren proiektua ulertzeko, lehenengo, metodologia guztian zehar
presente dagoen ideia azaldu behar da.
Hezkuntza integralak gaitasunen garapen harmonikoa suposatzen du, eta guztientzako
eta haur bakoitzarentzako autonomia sustatzen du. Ikaskuntza eraikuntza
pertsonalaren prozesu bat da, beste neska eta mutikoekin batera ematen dena, heldua
bitartekaria delarik eta ingurunearekin interakzioa dagoelarik. Ikaskuntza
esanguratsuaren bitartez ematen da, hau da, norbera den, pentsatzen duen eta
ezagutzen duen tokitik; motibagarriak diren ekintzen bitartez, ekintza mentalaren
bitartez, eta ikasten duena beste ikaskuntza egoerei aplikatzea ahalbidetzen dion
gatazka eta berregituratze kognitiboarekin, alegia, funtzionaltasun kognitiboarekin.
Horretaz gain, metodoa honako funtsezko printzipiotan oinarritzen da:
Ikaskuntza autonomoaren garapena; beste eduki batzuen ikaskuntza atzerriko
hizkuntza baten bitartez; hizkuntza erabiliaz ikasten da; hemen eta orain behar den
hizkuntza ikasten da; hizkuntzaren erabilera komunikazioan oinarritu behar da batez
ere; komunikazioak erreala izan behar du, ez da simulatu behar; benetako
materialaren erabilerara ohitu; ikaskuntza prozesuak gaitasunen garapenean eta
hizkuntzaren bereganatzean oinarritu behar dira.
Ikaskuntza autonomoaren garapenari dagokionean, besteak beste, erabakiak eta
ardurak hartzea, ikaskuntza antolatzea, ebaluaketa mota desberdinetan parte hartzea
(berdinen artekoa, auto-ebaluazioa), ikaskuntza prozesuaren kontzientzia hartzea eta
hizkuntzaren inguruan hausnartzea lantzen dira.
Bestalde, hizkuntza beste eduki batzuk ikasteko erabiltzearen inguruan, esan,
hizkuntza instrukzio bitartekari bat bihurtzen da, eta ez da helburu bat bere horretan.
5
Haur Hezkuntza eta Lehen Hezkuntzako 1.zikloa
Lehenago esan dudan moduan, Irungo La Salle ikastetxean ingeleseko bi irakasle daude
Haur eta Lehen Hezkuntzako etapetan. Ni Haur Hezkuntzako eta Lehen Hezkuntzako
lehenengo zikloari irakasten diot ingelesa, alegia, 4 eta 8 urte bitarteko haurrei.
Horregatik, jarraian, proiektuaren metodologia Haur Hezkuntzan eta Lehen
Hezkuntzako lehen zikloan nola planteatuta dagoen azalduko dut, gainontzeko
zikloetan sakondu gabe.
Oro har, Haur Hezkuntzarako eta baita Lehen Hezkuntzako lehenengo ziklorako ere
xede orokor bat dagoela esan daiteke: haurrek ingelesaren bitartez izaera osasuntsu
eta afektiboa eta kognitiboki garatzen laguntzea, sustatzea eta ahalbidetzea. Era
berean, haur guztien autonomia pertsonalaren eta ikaskuntzaren garapen progresiboa
laguntzea eta sustatzea, proposamen esanguratsu eta motibagarrien bidez.
Dena den, badaude etapa bakoitzarenak propioak diren helburuak, edukiak eta baita
metodologia ere.
� Haur Hezkuntza
Haur Hezkuntzari dagokionean, esan, 4 urteko gelan ematen zaiola hasiera proiektuari,
3 urteko gelan ez baita ingelesa (atzerriko hizkuntza bezala) sartzen.
Lehenik eta behin etapa honetarako finkatutako helburuak aipatuko ditut, bai orokorra
eta baita espezifikoak ere.
� Helburu orokorra:
Haurrak ingelesarekin ohitzea honen ahozko tratamendua sustatuz.
� Helburu espezifikoak:
-Haurrak proposamen esanguratsuen bidez motibatu, hartara, ingelesa erabiliz
ekintza desberdinak egin nahi izan ditzaten.
-Ingelesaren ahozko tratamendua lehenetsi.
-Haurrak ingeleseko fonema eta soinuekin ohitu.
-Idatzizko hizkuntzarenganako hurbilpen adierazgarri eta funtzionala ahalbidetu.
Bestalde, edukiei dagokienean, jarrerazkoak, prozedurazkoak eta kontzeptualak
desberdintzen dira.
6
� Jarrerazkoak:
-Ingelesarekiko interesa eta estimazioa
� Prozedurazkoak
-Lehen eta bigarren hizkuntzan garatzen diren elkarrizketaren prozeduren finkatzea
-Eguneroko egoeren eta testuinguruan aurkitzen direnen ulermena
-Eguneroko egoeretan eta testuinguruan aurkitzen direnetan produkzioa ematea
-Ingelesez idatzitako testuen erabilpena, hala nola, ipuinak, kartelak etab.
� Kontzeptualak
-Ipuin, errima eta abarretatik abiatuz fonema minimoen bereganatzea eta
erabilpen funtzionala ematea
Helburu horiek lortzeko eta eduki horiek lantzeko metodologia espezifiko bat jarraitzen
da, baldintza didaktiko batzuk betetzea ezinbestekoa delarik. Honela, espazioaren,
taldeen, denboraren, eta eduki eta sekuentzia didaktikoen antolaketa finkatu behar
dira.
Espazioaren antolaketa. Ekintza mota bakoitzerako espazio bat finkatzea beharrezkoa
da, hartara, haurrek ekintza eta espazioa erlazionatu eta momentu bakoitzean zer
nolako hizkuntza erabili behar duten barneratuko dute. Honela, ipuinen kontaketarako
espazio bat dago, kasu honetan, gelaren erdian geratzen den gune nagusia;
antzerkirako beste bat; liburuxkak osatzeko beste bat etab.
Taldeen antolaketa. Orokorrean, haurrak talde handian lan egiten dute, nahiz eta oso
maiz talde txikian egoten diren. Gauzak horrela, banaka, binaka, hirunaka, taldeka eta
talde handian lan egiteko ekintzak antolatzen dira, hizkuntza praktikatzeko aukera
desberdinak sortuz.
Denboraren antolaketa. Ikastetxearen kasuan, Haur Hezkuntzan haurrek ordu erdiko 3
saio dituzte astean. Era berean, saio bakoitzak denbora mugatu bat dauka ekintza
bakoitzerako. Honela, normalean, jarduera nagusiak ordu laurdeneko tartea hartzen
du, gainontzeko denbora hasierako eta bukaerako agurrekin eta birpasatzeko
ekintzekin betetzen delarik (azken ekintza hauek aurrerago azalduko dira).
Baliabide materialen antolaketa. Materialaren oinarrizko ardatza ipuinez osatua dago,
horietatik abiatuz sortzen direlarik unitate didaktikoak. Lantzen diren ipuinak mota
ezberdinetakoak izaten dira: animaliekin erlazionatutakoak, protagonistak animaliak
direlarik; adin horietako haurren eguneroko bizitzako egoerak jasotzen dituztenak,
alegia, ohera joan nahi ez izatea, gaileta gehiegi jatea… Bestalde, Oxford Reading Tree
7
Scheme taldeko zenbait ipuin lantzen dira, zeinetan, pertsonaia bat protagonista den
ipuin guztietan. Horretaz aparte, 5 urteko gelan ipuin tradizionalak erabiltzen hasten
dira, hala nola, “Ahate itsusia” eta “Urre-kizkur”.
Hau horrela, ipuin bakoitzari errima edota abesti bat dagokio, unitate bakoitzean
lantzen dena. Gainera, ipuin guztiak ez dira berdin kontatzen. Batzuetan pertsonaien
“siluetak” erabiltzen dira, besteetan, ipuina formatu handian aurkitzen da eta horren
bidez kontatzen da, eta bestetan, ipuina ikus-entzunezko euskarririk gabe kontatzen
da, horren errepresentazioa egiten delarik. Dena den, normalean ipuin guztiekin
antzerki txikiak egiten dira haurrek ipuinean lantzen den hiztegi eta hizkuntza
barneratzen joan daitezen.
Ipuinak eta dagozkien errimak eta abestiak landu ondoren, haurrek ipuinaren inguruko
liburuxka bat osatzen dute, zeina ipuina kontatzeko balio dien. Horrela, taldeka
liburuxka erabiliz ipuina kontatzen diete taldekideei, “presentations” direlakoak
eginez.
Unitate bakoitzak, gutxi gora behera, 3-4 aste hartzen ditu, Oxford Reading Tree
ipuinak salbu, horiek gehienez ere astebetean lantzen baitira.
Eduki eta sekuentzia didaktikoen antolaketa. Orain azaldutakoa hobe ulertzearren,
saioen estruktura orokorra azalduko dut jarraian:
-Agurra eta hasierako ekintzak. Saio bakoitzean gelako arduradun bat dago,
zeinak eguneroko errutinak egin behar dituen, betiere, agurrari eta hasierako
ekintzei lotutakoak.
-Birpasatzeko ekintzak. Momentu honetan dagoeneko landuak dauden ekintzak
egiten dira, adibidez, errimak, ipuinak, abestiak eta abar.
-Ekintza nagusia. Hau da saioko momentu zentrala. Momentu honetan beti
zerbait berria sartzen da eta lehen esan bezala, momentu luzeena izaten da.
-Birpasatzeko ekintzak. Berriz ere dagoeneko landutako ekintzak jasotzen dira,
bigarren puntuaren antzera.
-Agurra. Talde handia biltzen da berriro ere eta hurrengo saiora arte agur
esaten da.
Estruktura hau irakasleak nahi bezain malgua izan daiteke. Izan ere, irakasleak
erabakitzen baitu horietako momentu bakoitza zein ekintzarekin bete, zein material
erabili eta abar. Honela, estruktura hori finkoa bihurtzen da, baina baita aberatsa eta
askotarikoa ere.
8
Bestalde, saio guztietan ahozkotasuna lantzen da gehien bat, hitz egiten edo azaltzen
ari denaren ideia nagusia ulertzea, errutinazko egoeretan ahozko produkzioa ematea
eta ingelesezko fonemen lanketa errima, abesti eta abarren bidez.
Ikaskuntzaren autonomiaren garapena
Haur Hezkuntzako bi urte hauetan zeharka lantzen diren aspektuen artean, haurrek
gelan egiten diren ekintzetan ardurak hartzea eta haien ikaskuntza prozesuan gero eta
autonomoagoak izatea daude.
Gela bakoitzean arduradun bat dago, egunero aldatzen dena (4 urteko gelan, figura
hau Kipper izenarekin ezagutzen da, eta 5 urteko gelan, aldiz, Barney izenarekin).
Honela, arduradunak gelakideak agurtu behar ditu, haurrak berak erabakitzen duelarik
nor agurtu; irakasleari banatu beharreko materiala banatzen lagundu behar dio; zein
ekintza egin behar duten asmatzen saiatuko da eta abar.
Horrez gain, saioetan estruktura finko bat edukitzeak, haurrek, orokorrean, momentu
bakoitzean zer egin eta nola joan behar diren jakitea ahalbidetzen du.
Era berean, ingelesa era natural batean erabiltzea ahalbidetzen dieten egoerak jartzen
zaizkie haien eskura.
� Lehen Hezkuntzako lehen zikloa
Esan beharra dago, ziklo honek Haur Hezkuntzako helburu eta eduki guztiak barne
hartzen dituela. Halere, horiez gain, zenbait helburu eta eduki gehiago agertzen dira,
aurreko zikloan biltzen ez direnak bakarrik aipatuko ditudalarik.
Helburuei dagokienean, helburu orokorra apur bat zabaltzen dela esan daiteke:
-Haurrak ingelesarekin ohitzea honen ahozko tratamendua eta baita idatzizko
hizkuntza ere sustatuz. Ingelesaren ikaskuntzaren trantsizioan lagundu, Lehen
Hezkuntzako bigarren zikloko edukien bitartez.
Espezifikoei dagokienean, aldiz, Haur Hezkuntzako helburuez gain, honako hauek
gehitzen dira:
-Haurrak proposamen esanguratsuen bidez motibatu beste ezagutza arloetako
edukiak ingelesez ikas nahi izan ditzaten.
-Idatzizko hizkuntzarenganako hurbilpen adierazgarri eta funtzionala ahalbidetu
idazketa eta irakurketa prozesuak eskatzen dituzten lanak eskuragarri jarriz hala
behar duten ikaskuntza egoeretan.
9
Beste alde batetik, edukiei erreferentzia eginez, oraingoan ere Haur Hezkuntzako
guztiez gain, honako hau agertzen da lehen aldiz prozedurazkoen taldean:
-Hezkuntza artistikoko gaiekin (musika, artea, antzerkia…) erlazionatutako
prozeduren finkatzea, Hezkuntza Fisikoko eta Matematiken arloko gaiekin batera.
Lehen ziklo honetan ere, Haur Hezkuntzan bezalaxe, zenbait baldintza didaktiko
ematea beharrezkoa da metodologia jakin bat aurrera eramateko, eta hartara,
proposatutako helburuetara iritsi eta landu nahi diren edukiak jorratzeko. Beraz,
oraingoan ere, espazioaren, taldeen, denboraren, eta eduki eta sekuentzia didaktikoen
antolaketaz jardungo naiz.
Espazioaren antolaketa. Etapa honetan, aurrekoan baino gutxiago mugatzen dira
espazioak. Talde handiko ekintzak gelaren erdian geratzen den espazio nagusian
burutzen dira, taldeka egiten direnak, talde edo txokoetan burutzen direlarik.
Taldeen antolaketa. Bi kurtso hauetan, gehienetan talde txikietan egiten da lan.
Badaude hainbat momentu non banaka, binaka edota talde handian egiten den, hala
nola, gelako arduradunak agurrak egiten dituenean, edo eguneroko plana (aurrerago
azalduko dut) komentatzen denean. Baina, oro har, talde txikietan egiten da lan.
Denboraren antolaketa. Astean 45 minutuko hiru saio ematen dira eta oraingoan ere,
denbora egin beharreko lanaren edota taldearen beharren arabera banatzen da,
hasiera eta bukaerako ekintzei, ekintza nagusiari edo birpasatzeko ekintzei denbora
gehiago eskainiz.
Baliabide materialen antolaketa. Lehenik eta behin, esan beharra daukat, haurrek ez
dutela ikaslibururik erabiltzen eta aurreko etaparen antzera, ipuinek osatzen dutela
materialaren ardatz nagusia, nahiz eta dagoeneko ez izan erabiltzen den material mota
bakarra. Normalean hiruhileko bi ipuin, beraz, bi unitate didaktiko lantzen dira eta
ipuin gehienak narrazio hutsa baino gehiago dira, alegia, beste eduki batzuk erakusten
dira ipuinen bitartez. Adibidez, hazi baten bizitzari buruzko ipuin bat dago, Afrika eta
hango fruitu bitxiekin erlazionatutako beste bat eta abar. Gainera, ipuin hauek Haur
Hezkuntzakoak baina apur bat luzeagoak, eta noski, konplexuagoak ere izaten dira.
Ipuinak unitate didaktikoen parte direnez, errimak eta abestiak ere lantzen dira, nahiz
eta aurreko etapan baina modu apalagoan egin. Gainera, errima eta abestiez gain, aho-
korapiloak, irakurketa ozenak eta abar ere egiten dira.
Horrez gain, ipuin eta ipuinen artean, artearekin, dantzarekin, musikarekin eta
antzerkiarekin erlazionatutako edukiak jorratzen dira baita ere. Era berean, landutako
ipuin bakoitzeko performance bat, alegia, antzerki bat, eta presentation edo aurkezpen
bat egiten dute, honen bidez ahoskatzea, ulermena eta memoria lantzeaz gain,
besteen aurrean hitz egitera ohitzen direlarik. Zehatzagoak izateko, normalean, eta
10
denborak hala baimentzen badu behintzat, landutako abestiak, errimak, aho-
korapiloak eta abar ere aurkezten dira gelakideen aurrean.
Ziklo osorako karpeta bat dute, non, bi kurtsoetan zehar egindako lan guztiak sartzen
joaten diren. Gainera, ingelesa eskolatik eta are gehiago, gelatik atera daitekeela
frogatzeko, ikasleek gurasoei landutako ipuinak kontatzen dizkiete, modu honetan eta
bide batez, guraso, eskola eta ikasleen arteko harremana estutu nahi delarik.
Eduki eta sekuentzia didaktikoen antolaketa. Lehen egin dudan moduan, orain ere,
ohiko saio baten estruktura azaltzera pasako naiz zuzenean.
-Agurra eta hasierako ekintzak. Saio bakoitzean gelako arduradun bat dago,
zeinak eguneroko errutinak egin behar dituen, betiere, agurrari eta hasierako
ekintzei lotutakoak. Gainera, egunero, saioan egingo dena idazten da arbelean.
Hasieran, irakasleak egiten du. Lehenengo mailaren bukaeran, eguneko
arduradunak idazten du gelako egunerokoan eta, bukatzeko, bigarren mailan,
bakoitzak bere ingeleseko koadernoan kopiatzen du.
-Birpasatzeko ekintzak. Momentu honetan dagoeneko landuak dauden ekintzak
egiten dira.
-Ekintza nagusia. Hau da saioko momentu zentrala. Momentu honetan beti
zerbait berria sartzen da eta lehen esan bezala, momentu luzeena izaten da.
-Birpasatzeko ekintzak. Berriz ere dagoeneko landutako ekintzak jasotzen dira,
bigarren puntuaren antzera.
-Agurra. Talde handia biltzen da berriro ere eta eguneko planean idatzitako
ekintzak egin direnetz egiaztatzen da. Gainera, lehenengo mailako bigarren
hiruhilekotik aurrera, saioaren inguruko komentarioak konpartitu eta bigarren
mailaren kasuan, koadernoan idatzi behar dituzte.
Bestalde, lehen ziklo honetan sartzen den eta egunero egiten den elementu
garrantzitsu bat aipatu nahiko nuke, alegia, eguneko plana. Irakasleak arbelean idazten
du eta aurretik esan moduan, beti estruktura finko bat jarraitzen denez, planak ere
itxura estrukturatu bat izango du. Hau egitearen helburua, alde batetik, ikasleek saio
horretan egin beharrekoak zeintzuk diren ikustea da, eta bestetik, hizkuntza idatzia
barneratzen hastea, honen bidez hasten baitira konturatzen ingelesa ez dela idazten
den bezala ahoskatzen. Planari hasiera eman baino lehen, data ere idazten da.
Honelako itxura izango luke (letra etzanean azalpena sartu dut):
Tuesday, 7th February 2012
1st Hello (Agurra eta hasierako ekintzak)
Jon’s the class leader today. (Eguneko arduraduna nor den)
11
2nd Tongue twister (Birpasatzeko ekintza)
3rd Story (Birpasatzeko ekintza)
4th Booklet (Ekintza nagusia)
5th Comments (Saioa zer iruditu zaien)
6th Bye-bye (Agurra eta bukaerako ekintzak)
Lehen kurtsoan, irakasleak idazten du arbelean, azken hiruhilekoan eguneko
arduradunak talde osoaren egunerokoan kopiatzen hasiko delarik.
Bigarren kurtsoan, aldiz, bakoitzak ingeleseko koaderno bat dauka, non, astean behin
eguneko plana kopiatu behar duten. Baina plana kopiatzeaz gainera, saioa zer iruditu
zaien ere idatzi behar dute.
Ikaskuntzaren autonomiaren garapena
Haur Hezkuntzaren jarraipena den aldetik, gelako ekintzetan ardurak hartzea eta haien
ikaskuntza prozesuan gero eta autonomoagoak izatea bezalako aspektuak ere lantzen
dira.
Lehenago esan moduan, gelako arduradun bat dago egunero –class leader-, zeina
gelakideak agurtzeaz, eguneko plana osatzen laguntzeaz eta aurrerago, plana idazteaz
arduratu behar dira. Horretaz gain, lehen ziklo honetan, talde txiki bakoitzeko
arduradun bat izendatzen da egunero, beharrezkoa den materiala talde guztiari
banatzeaz arduratzen dena.
Gainera, Haur Hezkuntzan bezalaxe, saioetan estruktura finko bat edukitzeak, haurrek
momentu ezberdinetan zer egin eta nola jokatu behar duten jakitea ahalbidetzen du.
Halaber, logikoa den moduan, hemen ere ingelesa era natural batean erabiltzea
ahalbidetzen dieten egoerak jartzen dizkiegu haien eskura.