PARA LER Novelas xuvenís - cliomoaseso2.files.wordpress.com · papeis en regra e as dificultades...
Transcript of PARA LER Novelas xuvenís - cliomoaseso2.files.wordpress.com · papeis en regra e as dificultades...
PARA LER
Novelas xuvenís
70 millas hasta el paraíso (Robert Klement). Siad, un enfermeiro de
Somalia e a súa filla teñen un soño: chegar a Canada e poder traballar
alí. Están en Túnez, agardando poder entrar en Europa a través dunha
viaxe en barca. Extenuados e medio mortos de sede, son capturados
polos gardacostas italianos e, baixo condicións indignas, esperan a
coñecer a decisión das autoridades de se os deixan permanecer no
país ou son devoltos a África. O soño terá que agardar.
A cielo abierto (Fernando Claudín). Carlos, un skinhead que se ve
envolvo na morte dun inmigrante, provoca unha serie de dúbidas á
súa noiva Selene. Os seus medos e preguntas sen reposta alteran as
súas vacacións de verán e repercuten tamén na súa familia e amigos.
Abdel (Enrique Páez). O protagonista, Abdel, é un tuareg
acostumado á vida nómade pero todo lle vai cambiar o día que seu
pai decide atravesar o Estreito e pasar a España. As dificultades serán
moitas pero tratarán de superalas na crenza de que así poderán
mellorar a súa vida.
Al otro lado del Estrecho (Nicole Boumaâza). Cando a nai de Nadia,
unha chica belga filla de inmigrantes marroquís, anuncia que se
quere divorciar do seu marido, este non o acepta e, durante unhas
vacacións, leva a seus fillos a Marrocos para chantaxear á esposa.
Cando Nadia está resignada á nova vida, con novos plans de fuga
conseguirán escapar e regresar a Bélxica.
Algún día, cuando pueda llevarte a Varsovia (Lorenzo Silva). Laura
e Andrés, inmigrante polaco que vive en Getafe, fanse moi amigos e
a ela encántalle escoitar as historias que Andrés lle conta de cando
vivían en Polonia. Pero Laura descobre que Andrés tivo que emigrar
cando despediron do traballo a seu pai por transportar cargas ilegais.
De súpeto, Andrés ten que fuxir porque a policía persígueo por ser
inmigrante ilegal; só tivo tempo para prometerlle que algún día a
levaría a Varsovia.
Aunque digas fresas (Andrea Ferrari). A familia de Ayelén acaba de
emigrar desde Bos Aires e instálase en Madrid buscando mellorar a
súa vida. Pero non é doado aclimatarse porque son moitas as
diferenzas; o idioma é o mesmo, pero os costumes, ás veces, nada
teñen en común.
Como si no hubiera que cruzar el mar (Cecilia Pasos). Carolina ten
12 anos e viaxa soa en avión desde Arxentina a España, onde a
agarda seu tío. Ela vai facer a viaxe á inversa da que fixo a súa avoa
noutra época, en barco, pero tamén soa. Historias que se cruzan pero
que teñen moitos puntos comúns a pesar da diferenza das épocas.
Dark Dude (Óscar Hijuelos). Rico Fuentes é un dos fillos dunha
familia cubana que emigrou a Estados Unidos a finais dos anos 60. A
diferenza do resto dos membros da familia, herdou dun antepasado
irlandés a pel branca e o pelo loiro, situación pola que é tachado de
dark dude (expresión para referirse despectivamente a un latino ou
afroamericano de pel clara) e que lle ocasiona múltiples problemas
da súa vida cotiá.
¿Dónde estás, Ahmed? (Manuel Valls). Claudia ten un gran parecida
coa famosa top model alemá do mesmo nome e, por iso, ninguén a
valora por si mesma. Cando chaga á súa clase Ahmed, un chico
marroquí, fanse amigos rapidamente porque teñen moitas cousas en
común, especialmente o feito de que a maioría das persoas xúlganos
polo seu aspecto externo, non polo seu modo de ser. O racismo
dalgúns compañeiros dará lugar a conflitos. .
El chico rumano (Javier Alfaya). Un home que cada día saca a
pasear aos seus cans tópase unha noite cun rapaz romano, ao que
coñece de vista por ser vendedor de periódicos, consumido pola febre
tirado nun portal. Decide levalo á súa casa e coidalo descubrindo a
terrible vida que levaba, en mans dunha banda de delincuentes.
El club de la buena estrella (Amy Tan). Catro mulleres chinas
reúnense regulamente en San Francisco para xogar ao Mah-jong,
gozar da comida china e contarse historias do pasado. Á morte da súa
nai June Woo debe ocupar o seu posto nestas xuntanzas nostálxicas,
pero ela só desexa independizarse e adaptarse á vida moderna. Pero
pouco a pouco vai valorando o que se pode extraer de conceptos de
vida tan radicalmente distintos.
El juramento de los Centenera (Lydia Carrera de Sosa). A comezos
do século XX, os cinco irmás Centenera emigran a Arxentina.
Durante a viaxe en barco desaparece a irmá pequena. Perdidas as
esperanzas de atopala, deciden vivir sen mencionar a traxedia ata
que, pasados os anos, un dos irmáns rompe a promesa e conta a
historia a unha amiga que vai a axudar a desvelar a verdade.
El niño de las chabolas (Begag Azouz). Relato autobiográfico no
que con humor, tolerancia e tenrura, o autor describe a súa vida e
dificultades nas chabolas de Lyon cando era un neno inmigrante
alxeriano analfabeto na Francia multicultural dos anos 60.
El paso del Estrecho (Fernando Lalana).Relato de intriga e misterio
arredor de personaxes que se moven a un e outro lado do Estreito e
que tratan de sobrevivir con imaxinación e valentía.
El señor Ibrahim y las flores del Corán (Eric-Emmanuel Schmitt).
Nos anos 60 do pasado século en París un chico xudeo de 13 anos
faise amigo do tendeiro árabe da rúa Azul. Pero as aparencias poden
resultar enganosas; o tendeiro non é árabe, a rúa non é azul e o chico
pode non ser xudeu.
La aventura de Said (Josep Lorman). Saíd, un chico marroquí,
decide probar sorte en Barcelona pero o racismo, o problema de ter
papeis en regra e as dificultades para ter un traballo digno
imposibilitan a realización das esperanzas que se forxara antes de vir
a España. Ao cabo dun ano é expulsado e ten que volver ao seu país.
Nada que decir (Bernat Friot). Historia de desarraigo e problemas de
asimilación de culturas sufridos polo neto dun inmigrante, excluído
dunha sociedade que non o acaba de aceptar como membro de pleno
dereito.
Respirando cerca de mí (Jorge Gómez Soto). Historia de final
tráxico arredor de varios personaxes inmigrantes atrapados polas
redes mafiosas de tráfico de persoas.
Saxo y rosas (María Arregui). Unha banda de cabezas rapadas ataca
a uns inmigrantes. Este incidente repercute nas relacións entre
Raquel e Germán, quen se ve implicado como testemuña e acusado
dun delito que non cometeu. Magda, amiga de Raquel e irmá dun dos
agresores, decide axudar para aclarar o sucedido.
Stefano (María Teresa Andruetto). O protagonista fuxe na miseria da
posguerra italiana ca a Arxentina, cheo de ilusións e lembranzas. A
viaxe en barco, os seus primeiros traballos, o paso polo mundo do
circo e a música popular italiana configuran o transfundo da historia.
Un pueblo contra los Hamid (Oriol Vergés). Esta historia de
racismo e intolerancia contra os inmigrantes norteafricanos podería
suceder en calquera lugar de Europa. Esta historia de rebeldía
xuvenil contra a inxustiza debería poder enmarcarse en calquera doas
nosas familias. Esta historia de amizade e compromiso debería
conmover as nosas conciencias.
Una habitación en Babel (Eliacer Cansino Macías). Un profesor de
Filosofía chega a un pobo no que viven numerosos inmigrantes e
decide ir a vivir entre eles e así, convivindo cos seus problemas e
culturas, coñece as súas vidas e a loita diaria que libran por
sobrevivir.
Vidas (Mercè Rivas Torres). Oito persoas de diferentes
nacionalidades coinciden nunha patera que trata de chegar ás costas
españolas. Case non levan equipaxes, pero si moitos soños e
esperanzas que non sempre poderán alcanzar.
Outras novelas
A man dos paíños (Manuel Rivas). Galicia emigrante, un dos trazos
da poboación galega máis característicos é vista polo autor a través
dun relato e ficción (A man dos paíños), un relato fotográfico (O
álbum furtivo), e un relato xornalístico (Os náufragos), tres tipos de
miradas e modos de mirar.
.
Al calor del día (Miguel Naveros). Historias de emigrantes no
poboado andaluz de El Ejido, un conglomerado de xentes dominado
por inmigrantes de múltiples nacionalidades, explotados nos duros
traballos dos invernadoiros.
Aguas de cristal, costas de ébano (Adolfo Hernández Lafuente).
Historia do secuestro dunha vella barca na que os mafiosos cargan
con inimigrantes ilegais e abandonan á deriva preto da costa española
desviando así a atención das patrulleiras fronterizas mentres eles
descargan os fardos de hachís, alleos á traxedia humana.
Amor migrante (Stella Maris Latorre). Dramática historia dun
emigrante galego que parte a América para saír da miseria na que
vive. Non sabe que aquí queda a noiva, embarazada. Pasan os anos e
o indiano regresa á aldea pero os acontecementos fan que decida
regresar a Bos Aires.
Contra el viento (Ángeles Caso). A autora narra as dificultades das
mulleres inmigrantes en Europa a través das experiencias dunha nena
que decide saír da súa aldea para construírse unha vida mellor en
occidente. A amizade cunha española axudaraa a sobrepoñerse ás
dificultades e medos.
Diario de un emigrante (Miguel Delibes). Lorenzo emigra a Chile
en busca de fortuna. Ao longo dun ano escaso que dura a aventura
apunta no seu diario as incidencias da súa nova vida no país, os
novos costumes e os enfados coa súa parella, o descubrimento de
novos usos do castelán e tamén os soños e ilusións non alcanzados.
Diario de un ilegal (Rachid Nini). Testemuño de primeira man sobre
as experiencias dos inmigrantes marroquís en España, un dos
primeiros textos sobre esta temática escritos en lingua árabe.
Dormir al raso (Pascual Moreno Torregrosa e Mohamed el Gheryb)
Experencias vividas por un traballador ilegal marroquí en España.
El dorado (Laurent Gaudé). O autor aborda o drama da emigración
desde a óptica de dous expatriados que se moven en direccións
opostas: a de quen cumpre a misión de vixiar a entrada de
inmigrantes e a do emigrante que trata de alcanzar o que cree que
pode ser un mundo mellor.
El libro de los recuerdos (Ana María Shua). Combinando
lembranzas propias e alleas, a autora describe a vida dunha familia de
inmigrantes xudeus en Arxentina procedentes de Rusia.
El mar que nos trajo (Griselda Gambarro). Novela de inmigrantes,
de amor e de loita de italianos en Bos Aires a finais do século XIX.
El síndrome de Ulises (Santiago Gamboa). Un xoven escritor que
lava pratos nos sotos dun restaurante oriental evoca as voces dos seus
amigos e mulleres que coñeceu, vivindo o síndrome característico
que sofren os emigrantes na sociedade dun país descoñecido.
En un lugar del Atlántico (Fatou Diome). Vivencias dunha
emigrante senegalesa en Francia.
Flores de un solo día (Anna Kazumi Stahl). Tres momentos da
historia de tres xeracións dunha familia mesturados con intereses
económicos e diferenzas culturais debidas á procedencia dos
personaxes, unha historia arredor da emigración xaponesa a
Arxentina.
Gaijin. La aventura de emigrar a la Argentina (Maximiliano
Matayoshi). A partir da propia experiencia, o autor relata a
emigración desde Asia a América e as dificultades experimentadas,
situacións comúns en todos os procesos migratorios.
La etermidad del instante (Zoé Valdés). A vida de Mo Ying
transcorre entre China e Cuba, unha vida chea de aventuras que
escribirá, sendo xa moi vello, para que a súa neta coñeza a súa vida.
La república de los sueños (Nélida Piñón). A república soñada é
Brasil a onde esperan chegar e facer fortuna dous galegos que viaxan
en barco a comezos do século XX. A vida no novo país traeralles
éxitos e fracasos, administrados de forma diferente polos dous
amigos.
Las ingratas (Guadalupe Henestrosa). Historia de seis mulleres
galegas emigrantes que se instalan en Bos Aires e alí inician unha
nova vida non exenta de morriña e ganas de retornar.
Las libres del Sur. Una novela sobre Victoria Ocampo (María Rosa
Lojo). Historia protagonizada por Carmen Brey Moure, galega
inmigrante en Arxentina a onde foi contratada para servir de
intérprete a Rabindranath Tagore, invitado ilustre de Victoria
Ocampo.
Las voces del Estrecho (Andrés Sorel ). O autor achega ao lector a
uns feitos que non por ser cotián resultan menos dramáticos, aqueles
relacionados con eles milleiros de inmigrantes que, privados dos seus
sinais de identidade e orixe, tratan de sobrevivir nun mundo de
abusos e indiferenza.
Lunas eléctricas para las noches sin luna (Belén Gache). Vivencias
e lembranzas de emigrantes españois en Bos Aires.
Madre mía que estás en los infiernos (Carmen Jiménez Gómez). Un
drama que recrea as vivencias dunha muller dominicana que emigra a
España, tras decidir fuxir do seu marido e buscar un futuro para os
seus fillos.
Mañana será otro día (Faïza Guène). Historias ambientadas nos
barrios periféricos de París onde a poboación inmigrante é moi
numerosa.
Moira Sullivan (Juan José Delaney). Evocación da emigración
irlandesa a partir da protagonista da novela que mantivo unha
actitude reacia a facilitar a súa integración no novo país de acollida.
Nunca pasa nada (José Ovejero). A vida tranquila de Carmela e
Nico, un matrimonio de clase media, vese alterada pola chegada de
dúas persoas: una ecuatoriana contratada para axudar nos labores da
casa e un alumno de Nico. Os personaxes relaciónanse entre si, pero
todos están sos; ademais, cada un deles ten problemas específicos,
especialmente relacionados coa integración social.
Oscuramente fuerte es la vida (Antonio dal Masetto). Feitos e soños,
nostalxias e realidades de Ágata, unha italiana emigrante en
Arxentina que decide regresar ao seu país de orixe logo de no país de
acollida durante 40 anos.
Perros verdes (Agustín Cerezales). Relato da vida de oito
estranxeiros residentes en España, cada un deles é unha historia de
esperanzas e frustacións, de soños e desilusións.
Ramito de hierbabuena (Gerardo Muñoz Lorente). Ficción baseada
na dramática realidade que se vive a cotío nas dúas beiras do Estreito
de Xibraltar vista a través da tráxica historia de dous namorados que
se enfrontan a un ambiente hostil e a unhas circunstancias adversas.
Unha historia de amor que, como tantas outras, rematará
traxicamente nas augas do Estreito.
Santo oficio de la memoria (Mempo Giardinelli). Saga dunha
familia de inmigrantes italianos en Arxentina a través de tres
xeracións ao longo do século XX.
Vita (Melania G. Mazzucco). A obra recolle gran cantidade de
historias que se enlazan unhas con outras e que constitúen no seu
conxunto a epopea do que foi a grande aventura da emigración
italiana a América e a de centos de miles de latinoamericanos que
agora fan a viaxe á inversa.
Yo, Mohamed (Rafael Torres). Dúas ducias de breves relatos
protagonizados por inmigrantes en España.
PARA VER
1 franco, 14 pesetas (2006). Na España dos anos 60, os axustes que
precisa o crecemento económico provocan o despido de miles de
traballadores que emigran a Europa. Esta é a historia dunha familia
que marcha a Suíza, sen contrato de traballo e tendo que pasar por
turistas na aduana, pero que consegue establecerse e mellorar
significativamente a súa situación. O duro será ter que volver a
España.
14 kilómetros (2007). Estes quilómetros son os que separan España
de África, o Estreito de Xibraltar. Poder cruzalos para entrar en
Europa é o desexo e a meta de milleiros de africanos que tratan de
fuxir das pésimas condicións de vida que sofren nos seus países de
orixe.
2 francos, 40 pesetas (2014). Continuación de 1 franco, 14 pesetas.
A familia protagonista refixo a súa vida en Madrid logo de pasar
anos en Suíza, pero seu fillo, pertencente a unha nova xeración con
problemas de desemprego, convence aos seus para retornar a Suíza.
25 grados en invierno (2004). Durante un día excepcionalmente
cálido para o normal do inverno en Bruxelas, crúzanse os destinos de
varias persoas con destinos unidos pola emigración.
7 soles (2009). Historia centrada no tráfico de vidas humanas, os
indocumentados que son conducidos por organizacións mafiosas para
entrar clandestinamente en Estados Unidos e os desencontros entre
os traficantes.
90 millas (2005). 90 millas é a distancia que separa as costas de Cuba
e Estados Unidos. Unha familia cubana abandona a illa de forma
ilegal nunha embarcación de fabricación caseira artesanal e vive
unha tráxica viaxe, pero sen perder as esperanzas de alcanzar o seu
obxectivo.
Acorazado (2010). Tratando de pasar por un cubano que fuxe do
comunismo, un fracasado sindicalista decide transformar o seu vello
taxi Acorazado Jarocho para tratar de chegar por mar a Estados
Unidos sen ser descuberto polos servizos de vixilancia costeiros.
Agua con sal (2005). Historia de dúas mozas –unha cubana en
España e unha valenciana de familia marxinada- unidas pola
explotación laboral e salarial de que son vítimas como traballadoras
nunha fábrica de mobles.
Almanya: bienvenido a Alemania (2011). Historia dunha familia
turca que emigrou a Alemaña. Logo de vivir 45 anos neste país, o pai
decide mercar unha casa e retornar a Turquía, o que provoca
discusións na familia, momento no que se rememoran as dificultades
vividas e as razóns da emigración.
América, América (1963). O desexo de emigrar a América leva ao
mozo grego Stavros e superar todos os obstáculos que se lle
interpoñen na súa viaxe, comezando por ter que reunir os cartos para
mercar a pasaxe do barco.
Amigo no gima (2004). Historias de varios personaxes que viven no
barrio multicultural de Lavapiés en Madrid, moitos deles emigrantes
que tratan de sobrevivir e alcanzar os soños que forxaron cando
saíron dos seus países de orixe.
Anija. La nave (2012). Historia que parte do feito real da chegada,
en marzo de 1991, de barcos cargados de albaneses que trataban de
alcanzar as costas italiana do Adriático e que presenta algúns dos
seus dramas, aspiracións e dificultades por alcanzar os seus
obxectivos.
Aquí y allá (2012). Tras estar traballando varios anos en Estados
Unidos, Pedro regresa a México, onde trata de gañarse a vida cun
grupo musical. Os anos da emigración cambiaron as súas raíces e
tamén aos membros da súa familia. As dificultades económicas fan
que pense de novo en emigrar, igual que moitos dos seus paisanos
que ven nesta saída a única posible para mellorar a súas condicións
de vida.
Avalon (1990). Narra a vida de Sam Krichinsky, un inmigrante
xudeu de orixe polaca, na cidade norteamericana de Baltimore a
comezos do século XX.
Aventuras y desventuras de un italiano emigrado (1974). Como
indica o título, narra a historia de Nino, un emigrante italiano en
Suíza. Tras perder o seu posto de traballo ten que regresar a Italia,
pero decide quedarse; a sorte está da súa parte e acaba por conseguir
un bo traballo cun compatriota que fixo fortuna no país.
Bastardos en el paraíso (2000). Historia de amigos nun barrio
multirracial de Estocolmo antes e despois de que tivese lugar un
tiroteo no centro da capital, ocasión que lles permite volver a
encontrarse logo de varios anos sen contacto.
Bolivia (2001). Freddy emigra desde Bolivia a Bos Aires en busca
dunha vida máis próspera, pero a cidade non é paraíso co que soñaba.
Aínda así, consegue traballo como cociñeiro nun restaurante, unha
situación que non todos os emigrantes ilegais conseguen.
Buscando a Leti (2006). Leti, unha nena mexicana, sufre a
discriminación polos seus problemas de atraso tanto entre a propia
familia en Zacatecas como na escola en Chicago, cidade a onde a
leva a súa nai que traballa como inmigrante
Bwana (1995). A familia dun taxista decide ir a pasar unhas
vacacións á costa andaluza. Alí se encontran con Ombasi, un
inmigrante negro ilegal que non entende o castelán e que ten fame e
frío. Deben convivir con el porque perderon as chaves do coche, pero
a chegada dun grupo de skinheads faralles a vida imposible.
Cartoneo y Nopalitos (2010). Historia dunha familia mexicana que
loita por conseguir unha vida mellor en Estados Unidos.
Come, duerme, muere (2012). Historia de superación ante as
dificultades dunha moza sueca de orixe montenegrino que ve como, a
pesar de ser a traballadora de maior rendemento na fábrica, sufre a
discriminación pola súa orixe.
Compañeros de fatigas (Brothers in Trouble) (1995). Drama social
de carácter reivindicativo que narra a amarga crónica duns
emigrantes paquistanís en Gran Bretaña, vivindo sempre co medo a
ser descubertos e deportados.
Cosas que dejé en La Habana (1997). Historia de tres mozas
cubanas que veñen a España buscando un mundo mellor. A súa tía
María, cubana que reside en España desde hai moitos anos, recíbeas
con afecto, pero como non teñen permiso de traballo, aproveita para
explotalas laboralmente no seu taller de peletería.
Cuscús (2007). O pai dunha familia procedente do norte de África é
despedido do seu traballo no sur de Francia. Decide entón montar un
restaurante nun vello barco do porto, pero as autoridades francesas
non lle facilitarán a empresa.
Edén al oeste (2009). Historia das dificultades vividas por un
emigrante ata conseguir entrar na Unión Europea e chegar ata París.
El chico de Chaâba (1998). Narración sobre a vida cotiá dos
emigrantes alxerianos en Francia. No barrio de chabolas de Chaâba
viven 21 familias que fuxiron de Alxeria fuxindo da miseria e da
guerra.
El color del océano (2011). Ás Canarias chegan constantemente
africanos que tratan de entrar en España viaxando en pateras. As
vidas dun policía de fronteira, dunha turista alemá e duns congoleños
superviventes dun naufraxio entrecrúzanse e cambian ante a nova
situación.
El dios de madera (2010). Historia de vidas entrecruzadas, persoas
de diferente relixión, orixe e condición, sobre o fondo da emigración
ilegal. A acción desenvólvese en Valencia, pero podería transcorrer
en calquera cidade dun país da vella Europa a onde chegan
constantemente inmigrantes en busca dunha vida mellor.
El domingo si Dios quiere (2001). Zouina viaxa cos seus fillos e a
sogra de Alxeria a Francia para reunirse co seu marido, que leva anos
traballando alí. A pesar dos problemas cos seus veciños, coa sogra e
co marido, decide adaptarse á súa nova vida. Cando descobre que no
mesmo pobo vive outra familia alxeriana, decide buscala e coñecela.
El Havre (2011). Un escritor bohemio, exiliado voluntariamente no
porto francés de El Havre, vive tranquilamente ata que se cruza no
seu camiño un neno negro, inmigrante ilegal. Para protexelo e evitar
que caia en mans da policía terá que loitar contra as autoridades e
contará coa solidariedade dos seus veciños.
El jardín del edén (1994). Historia de tres mulleres que buscan o
significado da súa vida en Tijuana, o pobo na fronteira entre México
e Estados Unidos, un lugar que para uns é un edén e para outros un
inferno.
El norte (1983). Dous irmáns foxen do seu pobo maia tras a morte de
seus pais a mans das tropas do exército. Diríxense ao norte, a Estados
Unidos, coa esperanza de refacer as súas vidas e mellorar a súa
condición.
El pequeño tallarín (2007). Unha traballadora de orixe chinés que
traballa para unha muller israelí pide permiso para ausentarse unha
hora e desaparee sen deixar rastro, deixando na casa a un pequeno
neno que non fala hebreo e que é coñecido polo alcume de tallarín.
El próximo oriente (2006). En clave de comedia, a película narra
historias do barrio multicultral de Lavapiés centradas na vida de dous
irmáns. Caín é gordo e tímido; Abel é guapo e ten unha estupenda
familia. Cando Caín descubre que Abel deixou embarazada a Aisha,
unha veciña musulmá filla de inmigrantes de Bangladesh, sorprende
a todos cando decide facerse pasar polo pai, converterse ao islam e
asumir o mantemento e a educación da criatura.
El rayo (2013). Hassam, un inmigrante marroquí, logo de
permanecer 13 anos en España, xa non atopa traballo e decide
regresar ao seu país. Para gañarse a vida en Marrocos decide investir
todos os seus aforros en mercar un tractor, El rayo.
El sudor de los ruiseñores (1998). Un violonchelista rumano emigra
a España e inicia unha amizade cun titiriteiro que actúa en El Retiro
de Madrid. O seu soño é traballar nunha orquestra e gañar o
suficiente para poder traer a España á súa familia, pero as
dificultades son maiores do que imaxinaba.
El sueño de Ellis (2013). Dúas irmáns polacas emigran a Nova York
en 1921, pero a unha dela detéñena e deixan en corentena porque está
enferma de tuberculose. A outra queda desamparada e para salvar á
irmá está disposta a realizar todos os sacrificios, incluído a
prostitución. Namorada dun ilusionista, parece que a vida lle sorrí,
pero os celos do proxeneta complican a historia.
El techo del mundo (1994). Seguindo os pasos de seu pai, Tomás
tamén emigra a Suíza. Alí traballa como mestre de obras dunha
cuadrilla de traballadores inmigrantes. Un accidente laboral
cambiará a súa vida e experimentará efectos do racismo e xenofobia.
El traje (2002). africano nun garaxe de Sevilla. Como pago por
amañar un pinchazo recibe un traxe case sen estrear, pero este golpe
de sorte leva parello unha serie de problemas. O peor, cruzarse cun
trapicheador sen escrúpulos.
El viaje de Said (2006). Película de animación que narra as
peripecias dun neno marroquí que cruza o Estreito e descobre que o
que imaxinaba como o país das oportunidades non é tan fermoso
como llelo contaron.
En América (2002). Unha familia irlandesa emigra a Nova York,
onde o pai soña con triunfar como actor no mundo do espectáculo.
Pero mentres tratan de adaptarse á nova vida e superar as dificultades
de vivir nun vello apartamento entre drogadictos e travestís, non
poden deixar de lembrar a perda dun dos seus fillos.
En busca del paraíso (2009). Historia de dous irmáns hispanos que
en España buscan o que soñan que sexa un paraíso, pero a realidade é
moi diferente e as múltiples dificultades impiden a materialización
dos desexos.
En este mundo (2002). Dous mozos afgáns que viven no campo de
refuxiados de Peshawar soñan con poder vivir en Gran Bretaña, pero
a viaxe ata chegar alí está cheo de dificultades, pois deben atravesar
numerosos países e en todos eles son estranxeiros.
En un mundo libre (2007). Angie e Rose, dúas compañeiras de piso,
deciden abrir unha axencia de traballo temporal para inmigrantes e
pronto se decatan de que a súa empresa prospera porque a man de
obra é moi barata e as leis de protección dos inmigrantes non se
cumpren, de modo que a explotación destes traballadores supón un
negocio moi rendible.
Españolas en París (1971). Historias particulares de catro mulleres
españolas que, como tantas outras miles, emigraron a París nos anos
70. Cada unha é unha historia diferente pero con moitos puntos en
común.
Five Colors (2011). Comedia comprometida e creativa arredor do
mundo da emigración e a arte. Unha santera propón a unha moza
colombiana cambiar a súa vida se se compromete a axudar a cinco
persoas a atopar o seu verdadeiro camiño. As vidas das seis persoas
se entrecruzan, cos seus desexos e esperanzas.
Flores de otro mundo (1999). Unha dominicana, unha cubana e unha
española asisten a unha festa dun pobo no que hai moitos homes
solteiros, un pobo sen mulleres casadeiras. Alí coñecen a tres destes
solteiros e comezan tres novas historias de convivencias non exentas
de dificultades.
Frontera sur (1998). Historias de españois que emigraron a Bos
Aires a comezos do século XX. Episodios de amizades sinceras e
solidariedade, pero tamén de sentimentos máis sórdidos nunha época
na que se podía conseguir unha fortuna co traballo honrado e con
outros medios máis doados e rápidos como as poxas ilegais, a trata
de mulleres ou a apropiación ilegal de terras.
Gallego (1988). Un rapaz galego decide abandonar a súa aldea e
embarcarse para conseguir un futuro mellor en Cuba. Pero a fortuna
non lle sorrí e decide regresar a España para tomar parte na Guerra
Civil.
Ghosts (2006). Unha moza china decide emigrar a Gran Bretaña para
poder gañar cartos e envialos á súa familia e manter a seu fillo, pero
debe pedir prestados os 25.000 dólares para a banda que a trasladará
ilegalmente. Na busca de traballos mellor remunerados traballa de
mariscadora pero falece afogada, xunto a outros 23 traballadores, na
baía de Morecambe. As familias en China deben seguir pagando as
débedas.
Go (2001). Problemas de segregación racial en Xapón onde un mozo
coreano, aínda que pertence á segunda xeración de inmigrantes, sofre
os problemas dunha sociedade que o discrimina racialmente.
Honeymoons (Lunas de miel) (2009). Dúas parellas do leste deciden
emigrar a oeste coa esperanza de conseguir unha vida mellor. A
albanesa viaxa a Italia e a de Serbia a Austria. Pero xorden
numerosos problemas, incluso para os que teñan os pasaportes e os
visados en regra.
Ilegal (2003). Dous reporteiros queren realizar o que cren que pode
ser o mellor traballo da súa vida: descubrir a mafia que transporta
emigrantes ilegais de África a Europa para denunciala e poñer fin ás
súas actividades.
Illégal (2012). Historia unha muller rusa qintegrada e que traballa en
Bélxica. Durante un control de documentos é detida e encarcerada,
mentres que seu fillo logra escapar. Inicia entón unha loita para non
perder a propia dignidade e identidade e localizar a seu fillo.
Intocables (2011). Historia de dous mundos enfrontados que acaban
por convivir nunha amizade inesperada pero sólida e divertida. É a
historia dun aristócrata millonario e tetrapléxico ao que coida un
inmigrante negro que acaba de saír do cárcere.
Ismael (2013). Ismael Tchou, un neno mulato de 8 anos, se fuga do
AVE para ir a Barcelona a coñecer a seu pai. Pero non ten máis
pistas que o remite dunha carta dirixida á súa nai.
Kebab connection (2005). En Hamburgo vive Ibo, un mozo turco
que soña con poder dirixir unha película de artes marciais asiáticas
pero que ten que conformarse con facer spots publicitarios para o
restaurante de kebab de seu tío. A vida cambia radicalmente cando
deixa embarazada á súa noiva alemá porque seus pais non a aceptan e
Ibo ten pánico a converterse en pai. Quédanlle os amigos e os spots
pero tampouco iso marcha ben.
La cité rose (2012). A cidade rosa é un barrio do extrarradio de París
no que conviven inmigrantes de múltiples nacionalidades.
Presentación da vida dese barrio da man dun neno antillano de 12
anos.
La cour de Babel (2014). Historias de vida dun grupo de
adolescentes que comparten a clase de francés e que proceden de
numerosos países ao longo do seu primeiro ano de estadía en Francia.
La frontera (1982). Charlie Smith é un garda da fronteira sur de
Estados Unidos que vive en permanente conflito coa súa conciencia,
pois a cotío vive o drama dos que intentan entrar ilegalmente no país.
La jaula de oro (2013). Historia da viaxe de tres mozos
guatemaltecos menores de idade que abandonan a súa aldea para
intentar atravesar a fronteira mexicana en tren e buscar un futuro
mellor en Estados Unidos.
La mia classe (2013). Valerio Mastandrea é un profesor de italiano
nunha escola nocturna para estranxeiros. Todos queren aprender
italiano para integrarse mellor pero o problema xorde cando un dos
estudantes, procedente de Costa de Marfil, é ameazado coa expulsión
do país por non ter permiso de residencia.
La misma luna (2007). Rosario traballa de forma ilegal en Estados
Unidos coa esperanza de dar unha vida mellor a seu fillo ao que
deixou ao coidado da súa avoa en México. Pero nai e fillo queren
reunirse e inician sendas viaxes nas que os obstáculos non lles fan
perder a esperanza de poderse encontrar.
Lamerica (1994). Dous empresarios italianos trasládanse a Albania
despois da caída do comunismo para poñer en marcha unha suposta
fábrica de zapatos e gañar diñeiro rápido a costa das subvencións do
goberno italiano, pero en realidade non teñen intención de poñela a
funcionar. Os empresarios buscan un home de palla como presidente
da falsa compañía pero as cousas se complican. O vello foxe e un
dos italianos, na súa busca, acaba como un refuxiado máis
intentando fuxir do colapso social no que está atrapa Albania.
La otra América (1995). Nos anos 90, o montenegrino Bayo vive en
Brooklyn e traballa no restaurante dun inmigrante español. Mentres,
a familia de Bayo decide embarcarse nun cargueiro con destino a
Nova York.
La pequeña Venecia (2012). Unha inmigrante china traballa en
Roma e intenta legalizar a súa situación para poder levar a Italia a
seu fillo de 8 anos. Pero inesperadamente envíana a traballar a unha
das illas da lagoa de Venecia onde coñecerá a un pescador eslavo co
que establecerá boas relacións. Pero nin os chinos nin os do lugar ven
con bos ollos esta relación.
La piragua (2012). Baye Laye, capitán dunha das piraguas que
parten dos portos de Dakar con inmigrantes que tratan de alcanzar as
costas de Canarias, coñece ben o mar e non quere saír, pero non ten
alternativa e deberá levar a España a 30 homes que non se entenden
entre eles e dos que varios deles non viran nunca o mar. E ningún
sabe o que lles agarda.
La promesa (1996). A vida de Igor, un adolescente belga, carece de
toda ética e traballa axudando a seu pai, un déspota que utiliza a
inmigrantes ilegais nos seus negocios de construción. Cando un
inspector se presenta de improviso na obra, un dos traballadores sofre
un terrible accidente e, antes de morrer, consegue de Igor a promesa
de que protexerá a súa familia.
La venta del paraíso (2012). Moitos dos inmigrantes que en España
creron que podían encontrar un paraíso viron frustrados os seus soños
e decidiron regresar aos seus países de orixe. Varios destes
inmigrantes coinciden nunha pensión e acaban por descubrir que a
deportación é a única vía para poder regresar ao seu país.
Las chicas de la sexta planta (2010). Historia en clave de comedia
das aventuras dun grupo de españolas que nos anos 60 emigraron a
Francia para traballar como criadas en casas de familias acomodadas.
Lejos (2001). Srege, un camioneiro francés, acepta a proposta de
incrementar os seus ingresos traficando con hachís. Aínda que
namorado de Sarah, non quere comprometerse e ela dubida en
marcharse a Canadá co seu irmán. Mentres, o amigo de Serge, Said,
continúa vivindo o soño de cruzar o Estreito.
Lettere dal Sahara (2006). A película relata a vida dun mozo
senegalés que emigra a Italia nunha viaxe clandestina que arriba á
illa de Lampedusa. Ten a posibilidade de establecerse en Turín, unha
agresión racista faille reflexionar sobre a conveniencia de integrarse
porque a nova situación podería significar ter que renunciar á propia
cultura e identidade.
Menos que cero (1996). En Bilbao, un inmigrante ilegal rumano
faise amigo dun vello xubilado que se resiste a abandonar a súa casa
situada nunha zona codiciada polos construtores. A cambio da
promesa de conseguirlle un pasaporte en regra, un dos socios dálle un
emprego no restaurante dunha amiga colaborando en sucias
manobras de extorsión destinadas a cobrar unha antiga débeda. Un
día coñece a unha fotógrafa e a vida parece que pode cambiarlle de
rumbo.
Naufragio (2010). Robison é un inmigrante subsahariano que
naufraga fronte ás costas do sur de España pero que consegue
alcanzar a beira e salvarse. Consegue traballar nos invernadoiros de
Almería como miles de traballadores na súa situación, pero este
inmigrante non é como os demais. Escoita voces, espíritos que o
confunden e gobernan e para liberarse delas terá que cumprir unha
misión: matar a un home.
No más muertes en la frontera (2008). Drama fronteirizo
ambientado nos límites de México con Estados Unidos. Uns desexan
alcanzar o soño americano e outros aproveitarse dos seus soños
Nómadas (2011). Un inmigrante ilegal mexicano que limpa cristais
nos rañaceos de Nova York coñece a unha editora que traballa nun
documental sobre suicidas en México. Dúas vidas solitarias que se
xuntan superando diferenzas de orixe e pasado.
Norteado (2009). Andrés intenta atravesar a fronteira mexicana para
entrar en Estados Unidos. Detense en Tijuana e, tras cada intento
frustrado de cruzar a fronteira, examina os seus sentimentos, lembra
o que deixou atrás no seu pobo e valora as amizades que atopou en
Tijuana.
Nuevo mundo (2006). Crónica sobre a emigración italiana durante o
século XX a través das experiencias dos Mancuso, unha familia
siciliana que, en 1900, parte de Agrigento con destino a Estados
Unidos.
Occidente es occidente (2010). Manchester, 1975. Sayid, o fillo
menor da familia Khan sufre a tiránica insistencia de seu pai por
impoñerlle as tradicións do seu país de orixe, Paquistán. Nun intento
desesperado por encarrilalo, é enviada a vivir en Punjab coa súa
primeira muller e fillas ás que abandonara 35 anos atrás.
Oriente es oriente (1999). A comezo dos anos 70, a familia de
George Khan, de orixe paquistaní moi tradicionalista casado cunha
británica, ve como seus fillos non queren seguir as súas tradicións e
os seis resístense a que os seus matrimonios sexan concertados.
Queren vivir de acordo cos costumes ingleses, o que provoca a
reacción do pai.
Padre nuestro (2007). Dous mozos mexicanos inician a súa amizade
no camión que os traslada ilegalmente a Nova York. Pedro, que
ignora que Juan é un criminal perseguido, explícalle que vai a ver a
seu pai, que é un rico hostaleiro que o abandonou sendo un neno. Ao
chegar a Nova York Pedro decátase que lle roubaron o equipaxe e a
carta de seu pai co enderezo. Juan usará a súa identidade para facerse
pasar polo auténtico fillo que por fin dará co seu pai.
Pan y rosas (2000). Dúas irmás mexicanas traballan como
limpadoras nun edificio de oficinas do centro de Los Ángeles sendo
explotadas laboralmente. As súas vidas cambian cando coñecen a un
activista norteamericano grazas ao que toman conciencia da súa
situación e inician unha campaña de loita polos seus dereitos. Pero
corren o risco de perder o traballo e de ser expulsadas do país.
París a toda costa (2013). Os soños de Maya parecían estar
cumpridos: traballa en París para unha revista de moda. Pero estes
soños convértense en pesadelo cando é detida pola policía e
deportada ao seu país de orixe, Marrocos.
Pepe & Santo vs. América (2009). Tras a morte da súa avoa, Os
protagonistas viaxan a Estados Unidos. O reto non é doado, pero a
axuda doutros inmigrantes facilitará a consecución do obxectivo.
Perdiendo el norte (2015). Dous universitarios españois, fartos de
non atopar traballo en España deciden marchar a Alemaña. Pero alí
descobren que os problemas poden ser iguais ou maiores que no seu
país.
Pesadilla americana (2009). O pesadelo é o que experimentan e
sofren un grupo de inmigrantes cando se enfrontan cos corruptos
oficiais norteamericanos da fronteira.
Prometeo deportado (2010). Nun aeroporto dun país da Unión
Europea é detido un grupo de ecuatorianos, entre eles un mago
escapista chamado Prometeo. Á sala onde están retidos os
ecuatorianos son conducidos máis e máis compatriotas que acaban
por converter o lugar nunha pequena nación onde saen a flote os seus
costumes e sufrimentos. Prometeo constrúe algo de ilusión e maxia e
outro lugar parece ser posible.
Querida Bamako (2007). A prolongada seca obriga a un mozo de
Burkina Faso a emigrar a Europa para, desde alí, tratar de axudar á
familia que deixa atrás, especialmente á súa muller á que chama
Bamako.
Querido Haití (2007). A película recolle as duras condicións de vida
nos poboados de chabolas das plantación de caña de azucre da
República Dominicana nos que a maioría son inmigrantes
procedentes de Haití que soportan unha situación de moderna
escravitude.
Quiero ser como Beckham (2002). Os pais de Jess queren que sexa
unha chica tradicional india, pero ela só desexa xogar a o fútbol
como David Beckham. Un día Jules invítaa a unirse ao equipo de
fútbol feminino local, o que supón a oposición frontal paterna, que
non comprenden por que non é como a súa obediente e tradicional
irmá. Pero Jess acaba por conseguir o seu soño.
Retorno a Hansala (2008). A película recrea un feito real: a
aparición, nas praias de Rota, dos cadáveres de 11 inmigrantes
marroquís precedentes da mesma aldea, Hansala, que trataban de
cruzar o Estreito en patera. O suceso é visto desde o punto de vista
dun empresario funerario que pretende facer negocio e a irmán dun
dos falecidos.
Río Helado. (2008). Cando Ray Eddy está a punto de mercar a casa
dos seus soños, o marido desaparece e a deixa soa e cos fillos.
Mentres trata de localizalo coñece a unha chica india que lle propón
un arriscado negocio: pasar ilegalmente inmigrantes de Canadá a
Estados Unidos a través do xeado río Saint Lawrence. Na súa
desesperación, Ray acepta a oferta.
Salvajes (2001). Tras o salvaxe apaleamento dun inmigrante ilegal en
Valencia, un de tantos subsaharianos que tratan de buscar mellor vida
en España, as investigacións da policía levan a sospeitar que os
autores foron os sobriños dunha enfermeira amiga do inspector que
dirixe a investigación.
Samba (2014). O senegalés Samba leva 10 anos en Francia
sobrevivindo con traballos mal pagados. Alice é unha executiva que
está atravesando unha mala época na súa vida. E os destino os xunta.
Samia (2000). Narra a vida de musulmáns alxerianos tradicionais da
periferia de Marsella, centrada na imposibilidade de unha
adolescente de 15 anos e a sexta dunha familia de 8 fillos, para poder
compatibilizar os ríxidos principios relixiosos coa permisividade
occidental.
Sempre Xonxa (1989). Historia centrada en tres personaxes
nunha aldea galega desde a súa infancia en 1947 ata a súa
madurez en 1986. O regreso dun deles da emigración
desestabilizará a relación dos que quedaron en Galicia.
Sin nombre (2009). Unha adolescente hondureña reúnese co seu pai
para viaxar con el a Estados Unidos. A partir de Chiapas, viaxan no
teito dun vagón de carga, onde están expostos tanto ás inclemencias
do tempo como á violencia.
Sin retorno (2002). Pablo, un profesor de inglés de Honduras perde a
súa muller embarazada durante o furacán Mitch. Nun intento de
ofrecer unha vida mellor á súa filla de 5 anos, emigran ilegalmente a
California para traballar recollendo froita. Para celebrar o aniversario
da nena, colle sen permiso a camioneta do xefe a atropela a unha
nena. Presas do pánico, foxen da policía.
Solo un beso (2004). Un mozo escocés de orixe paquistaní soña con
abrir un club co seu mellor amigo. Seguindo a tradición musulmá,
seus pais decidiron que debe casar coa súa prima pero el está
namorado da profesora de música da súa irmá. As difrenzas
relixiosas e culturais fan que a relación se teña que manter en secreto.
Terraferma (2011). A pesca xa non da para vivir na pequena illa
próxima a Sicilia polo que a familia de Filippo decide vender a barca
e alugar a casa aos turistas. Un día descobren unha patera chea de
inmigrantes a piques de naufragar.
Territorio prohibido (2019). Drama sobre as dificultades dos
inmigrantes ilegais para conseguir un permiso de residencia en Los
Ángeles.
The Girl (2012). Unha nai solteira do sur de Texas aventúrese nunha
viaxe inesperada que lle cambia a vida cando os seus intentos por
guiar clandestinamente a inmigrantes a través da fronteira rematan
mal, deixándoa desamparada coa súa filla en Oaxaca.
The visitor (2007). Un profesor universitario de Connecticut vese
envolto na vida dunha parella de inmigrantes que vive no seu
apartamento de Manhattan. Alguén lles alugou o apartamento
facéndose pasar polo seu propietario.
Tierra extanjera (1995). En 1990, o plan económico do goberno
brasileiro non funciona e o país camiña á bancarrota. Os soños de
Paco de converterse en actor xa non son posibles e decide marchar a
España, a terra da súa nai aceptando pasar por Lisboa e deixar alí un
obxecto de contrabando.
Ulises (2010). Historia de Julio, un emigrante peruano, que chega a
Chile en busca dun cambio na súa vida. Esta é a historia da
alienación dun emigrante, a historia do síndrome de Ulises.
Un viaje de diez metros (2014). Unha familia india trasládase a
Francia e abre un restaurante ao outro lado da rúa na que está un
restaurante francés con estrelas Michelín. Aliarse? Competir?
Ignorarse?
Una noche (2012). Sumido na nerviosa desesperación de La Habana,
Raúl soña con escapar a Miami e pide axuda ao seu mellor amigo
para atravesar as 90 millas que separan Cuba de Estados Unidos.
Vente a Alemania, Pepe (1971). Peralejos, un tranquilo pobo
aragonés é un lugar onde nunca pasa nada. Un día regresa ao pobo
para pasar as vacacións Angelino, un emigrante que conduce un
magnífico Mercedes e conta marabillas sobre Alemaña e as súas
mulleres. Pepe, fascinado polas historias do seu amigo, decide
emigrar tamén, pero o seu soño comeza ás 5 da mañá limpando
cristais e remata ás 12 da noite pegando carteis.
Vete y vive (2005). Por iniciativa do Estado de Israel, en 1985
levouse acabo unha operación para trasladar a miles de xudeus
etíopes a Israel. Unha muller etíope, que non é xudía, convence a seu
fillo para que se declare xudeu co obxectivo de escapar da miseria.
Adoptado por unha familia en Tel Aviv, pasa a infancia atemorizado
ante a posibilidade de que se descubra o seu dobre secreto: non é
xudeu nin orfo, só é negro, un etíope salvado da morte.
Viaje a la esperanza (1990). Historia dunha familia turca con poucos
recursos que decide inmigrar ilegalmente a Suíza. Durante a vixe terá
que enfrontarse a todo tipo de humillacións e discriminacións pola
súa orixe.
Welcome (2009). Bilal, un mozo de 17 anos procedente do Kurdistán
irano, cruzou Oriente Próximo e Europa para reunirse coa súa noiva,
emigrada a Inglaterra. Pero a súa viaxe queda bruscamente
interrompido cando en Francia lle impiden cruzar o Canal da
Mancha. Entón decide atravesalo a nado; para preparase entrena
nunha piscina onde coñece a un profesor de natación disposto a
axudalo.