Contactosprensa/Prentsakontaktuak> JoséMaríaGutiérrez|639737002|josemaria@proyeccion.tv CharoPonte|636680347|charo@proyeccion.tvCoordinador/Koordinatzailea> JoseGordejuela|656703212|jose@proyeccion.tv

EMAKUME BILBOTARRA, GREENPEACE ETA JON ALDEITURRIAGA, IBILTARIAREN SARIRAKO HAUTAGAIAK

• Saria 2017ko irailaren 16tik 22ra bitartean egingo den Mugikortasun Astearen barruan emango da.

• Sariduna herritarrek aukeratzen dute, bertoko hedabideetan antolatzen

den bozketaren bidez; hedabide horiek ingurumenaren eta jasangarritasunaren arloko sentsibilizazio-ekimenetan laguntzen dute.

• Ibiltariaren Sariak Bilbo atseginagoa, bizigarriagoa eta jasangarriagoa

izaten laguntzen duten pertsonen lana eta balioak aitortzen ditu. Aurten, seigarren urtez, Bilboko Udalak Mugikortasun Aste Europarra antolatu du irailaren 16tik 22ra bitartean eta horren harira, Bilboko Ibiltariaren Sarirako deialdia egin du. Irabazlea, betiko legez, ingurumenaren eta jasangarritasunaren arloko sentsibilizazio-ekimenetan laguntzen duten hedabideetan egingo diren bozketen bidez hautatuko dute herritarrek. Irailaren 22an, Mugikortasunaren Aste Europarra amaitzeko eta “Bilbo nire kotxe barik” ekitaldiaren barruan, botorik gehien jasotzen duen erakundeari edo pertsonari saria emango zaio. Bilboko Ibiltariaren Sariak Bilbo atseginago, bizigarriago eta jasangarriago bihurtzen laguntzen duten pertsonen eta taldeen zeregina aitortzen du. Gainera, paseoan ibiltzeko ohitura osasungarriari balioa ematen dio, osasuna sustatu eta hiria hobeto ezagutzen laguntzen duelako. Aurten, hauek dira sarirako hautagaiak: Greenpeace erakundea, Jon Aldeiturriaga Zazpi Kaleetako Merkatarien Elkarteko zuzendari-gerentea eta emakume bilbotarra. Greenpeace Ingurumena babesteko 1971n Kanadan sortutako GKE bat da Greenpeace; naturari egiten zaizkion erasoen aurka modu globalean esku hartzeaz gain, kanpainak ere egiten ditu klima aldaketa geldiarazteko, biodibertsitatea babesteko eta kutsadura murrizteko.

Ibiltariaren Sarirako hautagaitza, hain zuzen ere, gure planetako hiri nagusietako garraioek eragiten duten kutsadura geldiarazteko ekimenaren barruan dago; 2016an Bilboko Udalak eta beste hiri handi batzuek bat egin zuen ekimen horrekin. Horrela, ekimenarekin bat egin zuten bederatzi hiriek 2030erako hirietako mugikortasunaren eraginez sortzen diren negutegi-efektuko gasen emisioak % 50 gutxitzeko konpromisoa hartu zuten. Erabaki horrekin, hirietako trafikoa murrizteko neurriak abian jarriko dituztela hitz ematen dute, bizimoduaren kalitatea eta pertsonen eta ingurumenaren osasuna hobetze aldera. Bilboko emakumea Ingurumenaren eta mugikortasunaren ikuspegitik Bilbo gero eta jasangarriagoa lortzea ezinezkoa litzateke emakume barik. Emakume bilbotarrak berebizikoak dira eta gero eta gehiago daude Bilboko mugikortasun jasangarriarekin lotutako lanbideetan: Bilbobuseko, metroko eta tranbiako gidari, funikularreko gidari, udaltzain eta TAOko zaintzaile. Adibidez, gero eta arruntagoa da bilbobusetan eta funikularreko unitateetan emakumeak gidari izatea; taxietako lizentzia berri asko emakumeen esku daude eta haien presentzia garrantzitsua da Bilboko kaleetan, bai TAO zerbitzuko zaintza-lanetan, bai udaltzain gisa. Bilboko mugikortasunaren arloan diharduten emakume horietako batzuk izango dira saria jasotzeko ardura izango dutenak, Bilboko 2017ko Mugikortasunaren Aste Europarrarekin lankidetzan diharduten hedabideetako ikus-entzuleek azkenean saria ematen badiete. Honako honetan, saria emateko beste arrazoi bat ere egongo litzateke, alegia, emakumeek garraio publikoen erabileran duten garrantzia. Bilboko emakumeak argi eta garbi egin du garraio publiko edo kolektiboa erabiltzearen alde, joan-etorriak egiteko modu efizienteagoa -energiaren ikuspegitik- eta zarata eta emisio gutxiago sortzen dituena bidaiari bakoitzeko; horrela eginez, ibilgailu partikular gutxiago dabiltza gure kaleetan. Adibide modura, esan dezakegu emakumea dela bilbobusetako erabiltzaile nagusia (% 70). Horietako gehienak (% 55) 31 eta 64 urte bitartekoak eta beste baten kontura lan egiten dutenak (% 50) dira. Jon Aldeiturriaga Bilboko Zazpi Kaleetako Merkatarien Elkarteko gerente eta elkartegintzaren sustatzaile “uriko dendarien artean”. Ibiltari nekaezina –ez du gidabaimenik-, jai-batzordeko kide eta Bilbon tradizio bihurtu diren ekitaldi askoren antolatzaile –eta asmatzaile ere batzuetan-: Erregenetako opila, txikiteo nagusia, Bilboko artzainen Idiazabal-gazta lehiaketa. Baditu merituak Jon Aldeiturriagak Bilboko Ibiltariaren 2017ko sarirako hautagai izateko. Ibiltariaren Sariaren palmaresa Sariaren lehenengo edizioko (2012) irabazlea Virginia Berasategui triatleta bilbotarra izan zen. 2013an, berriz, audientziak Bilboko Txikiteroak aukeratu zituen; 2014an, Bakuva Elkartea izan

zen garailea eta 2015ean sariduna Gorabide Elkartea izan zen. Amaitzeko, iaz Bilboko Alkate izandako Ibon Aresori eman zioten saria. Bilboko 2017ko Mugikortasun Aste Europarrean laguntzen duten hedabideak Mugikortasunaren Aste Europarrarekin elkarlanean diharduten komunikabideetan egingo den bozketan eman ahal izango dute botoa bilbotarrek 2017ko irailaren 12tik 20ra bitartean, hau da, Deia, El Diario Norte eta El Mundo egunkarien webguneetan eta eitb.com helbidean, eta Telebilbao, Radio Nervión, Bizkaia Irratia, COPE, Onda Vasca, Onda Cero, Radio Bilbao eta Radio Popular irratietako programetan eta sare sozialetan