CONCURSO GASTRONÓMICO PEPERETADAS DO NOSO ENTROIDO Con motivo do Entroido, o ENDL e a Biblioteca do IES de Curtis convocan un concurso de sobremesas galegas que terá lugar o venres, día 4 de marzo, de acordo coas seguintes bases: 1. DESTINATARIOS O concurso está aberto a toda a Comunidade Educativa: alumnado, pais e nais, profesorado e persoal non docente. Poderase participar de xeito individual ou en grupo, repartindo, neste caso, o premio entre os distintos membros. 2. RECEITAS E DATOS DAS PERSOAS PARTICIPANTES As sobremesas elaboradas deberán ser típicas do Entroido. Cada prato irá acompañado da correspondente receita, escrita en lingua galega e mecanografada nun folio dobrado á metade. Na parte traseira do folio figurarán os datos persoais do autor ou autora e na dianteira, a receita. Esta información entregarase, asemade, en formato dixital. 3. DATA DE ENTREGA O texto da receita deberá entregarse ao departamento de Lingua e Literatura Galega ou ao ENDL antes do 28 de febreiro. Os pratos elaborados presentaranse no patio cuberto o día 4 de marzo ás 8:45 h. 4. PREMIOS Concederanse tres premios que consistirán nun vale, cunha validez dun mes, para cambiar por material escolar, material dixital, libros, discos ou películas en galego, por importe de:

1.º premio: 50€ 2.º premio: 30€ 3.º premio: 20€

Os premios poderán ser declarados desertos de non acadaren os pratos presentados unha calidade mínima. 5. XURADO O xurado estará composto por tres membros do alumnado e tres membros do profesorado. A súa decisión será inapelable. Valoraranse a presentación, o sabor, a creatividade e a orixinalidade do prato.