291015 Nota Goiriz Depuradora
-
Upload
agrupacion-socialista-vilalba -
Category
Documents
-
view
10 -
download
3
description
Transcript of 291015 Nota Goiriz Depuradora
Os socialistas de Vilalba denuncian o estado da
depuradora sita na parroquia de Goiriz
Desde o PSOE afirman que a maleza imposibilita o acceso a dita depuradora,
impedindo que se depuren as augas residuais
Outra das acusacións dos socialistas sinala a mala xestión de refugallos en
parroquias como a de Oleiros, orixinando vertedoiros incontrolados
Vilalba, 29 de outubro de 2015
O Grupo Municipal Socialista vén de denunciar o mal estado da depuradora do barrio
do Cristo, na parroquia de Goiriz, posto que a acumulación de maleza imposibilita o
seu acceso, vertendo directamente ao regato sen cumprir co obxectivo para a que foi
creada: depurar as augas residuais. Asemade, o seu total abandono acabou por
constituír un núcleo de contaminación importante, malia que non se lle estea a prestar
atención ao atoparse agochada, feito que denota unha falta de vontade por emendar
os seus efectos contaminantes.
“Tal e como nos teñen acostumados, semella que hai certo interese en minimizar a
gravidade destas cuestións, pasando por alto a grande importancia de crear e manter
unha Vilalba sostible, especialmente no que atinxe ao respecto co medio ambiente”,
aclarou Marta Rouco, concelleira da parroquia de Goiriz no Grupo Municipal Socialista.
É tal a preocupación dos socialistas neste eido, que xa na lexislatura pasada tiñan
denunciado, incluso levado a pleno, o estado das depuradoras das parroquias de
Vilalba, incidindo na de Martiñán, en Corvelle, logo de comprobar que a súa
escorrentía por acumulación camiñaba ao carón da estrada. Nesta liña, os socialistas
afirman con contundencia que “a pesar de que cambiaron as caras do goberno vilalbés,
as políticas seguen a ser as mesmas”, posto que os problemas se repiten e “as
solucións esvaécense nunha nube de fume, de boas palabras e intencións, e de
escasos resultados”.
Por outra banda, desde o Grupo Municipal denuncian tamén a xestión de refugallos en
parroquias como a de Oleiros, onde existe unha acumulación en puntos determinados
“sen que o equipo de goberno do PP amose interese algún polo coidado paisaxístico e
pola eliminación de vertedoiros incontrolados”. Deste xeito, os socialistas piden que se
solventen con urxencia estos reclamos que afectan a todas as persoas para as que
gobernan, “especialmente as destas parroquias das que din acordarse tanto en
períodos electorais”, sentenciou Rouco.