2 Samuel textGinpahibalo kay David ang pagkapatay ni Saul

1  • 1 Patay na si Saul. Nagbalik si David sa tapos niya malutos ang mga Amalecita. Si David may duha na ka adlaw sa Siklag. 2 Kag sa ikatlo nga adlaw may nag-abot nga tawo sa kampo ni Saul. Gision ang iya bayo kag may yab-ok sa ulo. Nagkadto sia kay David kag nagluhod sa pagtahod sa iya. 3 Ginpamangkot sia ni David, “Sa diin ikaw naghalin?” Kag nagsabat sia, “Nakapalagyo ako sa kampo sang Israel.” 4 Kag nagsiling si David, “Ano bala ang natabo? Sugiri ako.” Kag nagsabat sia, “Nagpalalagyo ang mga tawo sa inaway, kag madamo ang natumba kag napatay. Si Saul kag si Jonatan nga iya anak napatay man.”

5 Ginpamangkot ni David ang pamatan-on nga nagsugid sa iya, “Paano mo nahibaloan nga napatay na si Saul kag si Jonatan nga iya anak?”

6 Nagsabat ang pamatan-on, “Nataboan nga yadto ako sa Bukid sang Gilboa kag nakita ko nga nagahilay sa iya ang bangkaw samtang nagapalapit sa iya ang mga karwahe kag mga ma-nugkabayo. 7 Nagbalikid sia kag sang makita niya ako gintawag niya ako. Nagsabat ako nga yari ako! 8 Ginpamangkot niya ako, ‘Sin-o ka?’ kag nagsabat ako, ‘Isa ako ka Amalecita.’ 9 Kag nagsiling sia sa akon; ‘Dali ka kag patya ako kay indi na ako makahulag bisan pa nga buhi ako. 10 Gani ginpalapitan ko sia kay nahibaloan ko nga indi na sia sarang pa nga mabuhi sa iya pagkatumba. Kag ginkuha ko ang korona sa iya ulo kag ang pulseras sa iya butkon. Kag ari, ginoo ko, gindala ko ini tanan sa imo.”

11 Gin-uyatan ni David ang iya bayo kag gin-gisi, kag subong man ang ginhimo sang iya mga tinawo. 12 Kag naglalaw sila, naghilibion kag nagpuasa tubtob sa gab-i tungod kay natumba sa espada si Saul kag si Jonatan nga iya anak, kag para sa mga tawo sang Juda kag sa panimalay sang Israel.

13 Ginpamangkot ni David ang pamatan-on nga nagdala sang balita; “Tagadiin ikaw?” Nagsabat sia, “Anak ako sang isa ka dumoluong nga Amalecita.” 14 Nagsiling si David, “Ngaa wala ka mahadlok sa pagpatupa sang imo kamot sa ginhaplasan ni Yahweh agod patyon sia?” 16 Nagsiling pa gid si David, “Ikaw ang manabat sa imo kamatayon kay imo ginhukman ang imo kaugalingon sa kamatayon sang nagsiling ikaw nga ‘Ginpatay ko ang ginhaplasan ni Yahweh.’” 15 Kag gintawag ni David ang isa sang iya mga tinawo kag ginsugo, “Dali ka kag bun-a sia.” Kag ginbuno dayon niya ang

Amalecita kag napatay ini.17 Gin-amba ni David ini nga panalambiton para kay Saul kag kay

Jonatan nga iya anak, 18 kag nagsugo nga itudlo ini sa mga anak sang Juda – “Ang Pana”. Nasulat ini sa libro ni Jazar.

19 “Ginpamatay sa imo kabukiranang ginapabugal sang Israel! Nagkalapukan gid ang mga maisog!20 Dili ini pag-isugid sa Gat, dili pag-ibalita sa mga dalanon sang Ascalon. agod indi magkalipay ang mga dalaga sang Pilistea,indi paglipaya ang mga anak nga babaye sang mga pagano. 21 O kabukiran sang Gilboa, kabay nga indi ka matun-ogan ukon maulanankag madula ang hamungayaon nga bukid. Tungod sa imo nahigkoan ang taming sang mga isganan. Indi lana ang ginhaplas sa taming ni Saul,22 Kundi dugo sang mga ginpamatay, kag tambok sang mga maisog. Wala nagliso ang mga pana ni Jonatan, wala nagbalik nga wala sing may naigo ang espada ni Saul. 23 Si Saul kag si Jonatan, ginpalangga kag ginkahamut-an, nag-updanay sila sa kabuhi ukon sa kamatayon. maabtik pa sila sa mga agila, makusog pa sila sa mga leon.24 O mga dalaga sang Israel, maghibi kamo para kay Saul! Ginpabayoan niya kamo sing malahalon kag pula nga bayo, ginpunihan sing mga bulawan ang inyo mga ginasuksok. 25 Kag nagkalatumba ang mga isganan sa tunga sang inaway. Ginpatay si Jonatan sa imo kabukiran.26 Nagpangasubo ako tungod sa imo, Jonatan nga Utod ko; bug-os ko ikaw nga ginakahamut-an!Paghigugma mo sa akon daw ano ka dalayawonlabaw pa sa paghigugma sang mga babaye.27 Nagkalapukan ang mga isganan, kag indi na mapuslan ang mga hinganiban sang inaway.

Si David, hari sang Juda sa Hebron

2  • 1 Sa tapos sini, nagpamangkot si David kay Yahweh, “Dapat bala magtaklad ako sa isa sang mga siudad sang Juda?” Nagsabat si

Yahweh sa iya, “Maglakat ka!” Ginpamangkot ni David, “Sa diin ako makadto?” Nagsabat si Yahweh, “Sa Hebron.” 2 Kag nagtaklad dayon si David sa Hebron, upod ang duha niya ka asawa nga amo sanday Ahinaoam nga taga-Jezrael, kag Abigail nga balo ni Nabal sang Karmel. 3 Gin-upod man niya ang iya mga tinawo, kag ang tagsa nila ka panimalay 4 kag nagpuyo sila sa mga banwa sang Hebron. Kag nag-abot ang mga taga-Juda kag naghaplas kay David sing lana bilang hari sang pungsod sang Juda.

Nahibaloan ni David nga mga taga-Yabes-Galaad ang naglubong kay Saul. 5 Gani nagpadala sia sa ila sing mga mensahero sa pagsiling nga, “Pagabendisionan kamo ni Yahweh tungod sa inyo pag-unong sa inyo agalon nga si Saul sa paglubong ninyo sa iya. 6 Kag karon kabay nga ipakita ni Yahweh sa inyo ang iya paghigugma kag katutom! Ako man manginmaayo sa inyo tungod sang inyo ginhimo. 7 Magpakabakod kamo kag mapakaisog kay bisan patay na ang inyo agalon nga si Saul, ginhaplasan man ako sang mga tawo sang Juda bilang hari nila.

8 Ginkuha ni Abner nga anak ni Ner kag heneral sang mga hangaway ni Saul, si Isbaal nga anak ni Saul, kag gindala sa Mahanaim 9 kag ginhimo nga hari sang Galaad kag sang mga taga-Aser kag Jezrael, Efraim, Benjamin kag sang bug-os nga Israel. 10 Kuarenta na ka tuig ang edad ni Isbaal nga anak ni Saul sang maghari sia sa Israel sa sulod sang duha ka tuig. Nag-unong kay David ang panimalay ni Juda. 11 Si David nangin hari sang panimalay sang Juda sa Hebron sa sulod sang pito ka tuig kag tunga.Ang inaway sang Israel kag sang Juda

12 Naghalin sa Mahanaim pakadto sa Gibeon si Abner nga anak ni Ner kag ang mga alagad ni Isbaal nga anak ni Saul. 13 Naglakat man si Joab nga anak ni Sarvia kag ang mga alagad ni David. Kag nagkit-anay sila sa punong sang tubig sa Gibeon. Nagpungko ang isa ka grupo sa pihak sang punong kag sa pihak ang isa ka grupo. 14 Naghambal si Abner kay Joab, “Patindugon naton ang pila ka mga pamatan-on kag paawayon naton sila sa aton atubangan.” Nagsabat si Joab, “Sige.” 15 Nagtililindog dayon ang mga pamatan-on kag naglinya: dose ang sa mga Benjamenita ni Isbaal nga anak ni Saul, kag dose man sa mga tinawo ni David. 16 Ang kada isa sa ila nagauyat sa ulo sang iya kaaway, kag ginbuno sang espada ang kilid, kag dungan sila nga nagkalatumba. Gani, ina nga duog gintawag nga Bukid Alawayan sang Gibeon.

17 Pagkatapos sang lapuyot nga inaway sina nga adlaw, nalutos sang mga tinawo ni David si Abner kag ang mga tinawo sang Israel. 18 Yadto didto ang tatlo ka mga anak nga lalaki ni Sarvia nga amo sanday Joab, Abisai kag Asael.Si Asael amo ang madasig magdalagan subong sang usa, 19 kag ginlagas niya si Abner, nga wala pagbulagi. 20 Nagbalikid si Abner kag nagpamangkot, “Ikaw bala ina Asael?” Nagsabat si Asael, “Huo ako ini.” 21 Nagsiling si Abner sa iya: Magsaylo ka sa tuo ukon sa wala kag dakpa ang, isa sang mga pamatan-on kag kuhaa ang iya dala.” Apang nagpamalibad si Asael nga bulagan si Abner 22 gani liwat nga naghambal si Abner, “Untati na ang paglagas sa akon. Kay mapatay ko gid ikaw.

Kag paano na lang ang pag-atubang ko sa imo utod nga si Joab? 23 Apang indi magbulag si Asael, gani patalikod nga ginbuno sia ni Abner sang bangkaw sa tian kag naglapos ini sa iya likod. Natumba sia didto kag dayon gid nga napatay. Kag nagadulog ang tanan sa pag-agi sa duog sa diin napatay si Asael.

24 Ginlagas nanday Joab kag Abisai si Abner, kag sang pagtunod sang adlaw, nakaabot sila sa bakulod sang Amma nga ara sa sidlangan sang Giah pakadto sa desierto sang Gibeon.

25 Ginbuligan sang mga Benjaminita si Abner kag nagtingob sila sa pagbantay sa ibabaw sang bakulod. 26 Kag gintawag ni Abner si Yoab, “San-o bala mauntat ang inaway? Wala ka bala kahibalo nga kapaitan lang ang katapusan sini? San-o mo pa pauntaton ang imo mga tinawo sa paglagas sa ila kautoran?” 27 Nagsabat si Joab, “Buhi ang Dios, kag kon wala ka lang maghambal, magapadayon ang mga tawo sa paglagas sa ila kautoran tubtob sa aga. 28 Gani nagpatunog si Joab sang trumpeta kag nag-untat ang mga tawo sa paglagas kag pag-away sa mga Israelinhon.

29 Ginlakat ni Abner kag sang iya mga tinawo ang Araba sa bug-os nga adlaw tubtob nga matabok ang Jordan, kag nagpanglakaton tubtob sa Mahanaim sa bug-os nga aga. 30 Nagbalik si Joab sa tapos malagas si Abner kag gintipon niya ang tanan niya nga mga tinawo. Lakip kay Asael, dise nuebe ka mga tinawo ni David ang nadula. 31 Apang tres sientos seisenta ka mga Benjamenita kag mga tinawo ni Abner ang napatay sang mga tinawo ni David. 32 Ginlubong nila ang bangkay ni Asael sa lulobngan sang iya amay sa Betlehem. Kag sa bug-os nga gab-i naglakat si Joab kag ang iya mga tinawo, kag nag-abot sila sa Hebron sang kaagahon.

3 • 1 Naglawig ang inaway sang panimalay ni Saul kag ni David. Kag sang magbakod si David, amo man ang pagluya sang panimalay ni Saul.

2 Amo ini ang mga anak nga lalaki ni David sa Hebron: Si Amnon amo ang iya subang nga anak sa kay Ahinoam sang Jezrael; 3 ang ikaduha amo si Kileab nga iya anak sa kay Abigail nga balo ni Nabal sang Karmel; ang ikatlo amo si Absalom nga iya anak sa kay Maacang nga anak ni Talmai nga hari sang Gesur; 4 ang ikap-at amo si Adonias nga iya anak sa kay Hagit; ang ikalima amo si Sefatias nga anak sa kay Abital, 5 kag ang ikan-um amo si Itream nga iya anak sa kay Egla nga asawa ni David. Amo ini sila ang mga anak ni David nga natawo sa Hebron.

6 Samtang padayon ang inaway sang mga panimalay nanday Saul kag David, ginapabaskog man ni Abner ang iya pusisyon sa panimalay ni Saul.

7 Ang asawa nga ulipon ni Saul amo si Rizpa, nga anak ni Aya. Ginsuknaan ni Isbaal si Abner, “Ngaa naghulid ka sa asawa nga ulipon sang akon amay?” 8 Si Abner nga naakig gid sa ginhambal ni Isbaal, kag nagsabat, “Ano ako, ulo sang ido sa bahin sang Juda? Tubtob karon nagaunong ako sa panimalay sang imo amay nga si Saul, sa iya utod kag mga abyan kag wala ko ikaw gintugyan kay David, kag karon pasibangdan mo ako tungod lang sa sini nga babaye.” 9 Pagasilutan ako sang Dios kag sobra pa gid kon indi ko matuman para kay David ang ginsaad sa iya ni Yahweh 10 nga saylohon ang ginharian gikan sa kaliwat ni Saul kag himuon si David nga hari sang Israel kag Juda halin sa Dan tubtob sa Berseba.”

11 Wala nakasabat si Isbaal kay Abner tungod kay nahadlok sia sa iya. 12 Nagpadala sang mga mensahero si Abner sa pagsiling kay David, “Kay sin-o

bala ang kadutaan? Magpakigsugot ka sa akon kag buligan ko ikaw sa pagdala sa imo gahum sang bug-os nga Israel.” 13 Nagsabat si David, “Maayo, mahimo ako sing kasugtanan sa imo apang sa isa ka kondisyon: sarang lang ikaw sa pag-

atubang sa akon kon upod mo si Mikol nga anak ni Saul.”• 14 Kag nagpadala man sang mga mensahero si David kay Isbaal nga anak ni

Saul kag nagsiling, “I-uli sa akon ang akon asawa nga si Mikol nga nakuha ko bilang baylo sa isa ka gatos nga panit nga gintuli sa mga Pilisteo. 15 Ginpasugat ni Isbaal si Micol kag gin-agaw sia sa iya bana nga si Paltiel nga anak ni Lais. 16 Apang nagsunod sa iya ang iya bana nga nagahilibion sa dalan tubtob sa Bahurim. Kag nagsiling si Abner sa iya, “Magpauli ka na!” Kag nagpauli sia.

17 Nagpakighambal si Abner sa mga tigulang sa Israel kag iya ini ginhambal sa ila, “Madugay na nga luyag ninyo si David nga mangin-hari. 18 Himo-a ninyo ini subong si Yahweh nagsaad kay David kag nagsiling ‘nga paagi kay David nga akon alagad, luwason ko ang pungsod nga Israel sa mga kamot sang mga Pilisteo kag sa tanan nila nga mga kaaway’.” 19 Naghambal man si Abner sa mga taga-Benjamin, kag dayon nagkadto sia sa Hebron sa pagsugid kay David sang tanan nga maayo sa bahin sang Israel kag sang bug-os nga panimalay sang Benjamin.Ginpatay ni Joab si Abner

20 Upod ni Abner ang beinte niya ka mga tinawo sang magkadto sia kay David sa Hebron, kag naghanda man sang daku nga sinalosalo si David para sa ila. 21 Kag sa tapos sini nagsiling si Abner kay David, “Malakat na ako subong sa pagtipon sang bug-os nga Israel sa akon agalon nga hari para sa ila kasugtanan sa imo kag ikaw magadumala sa tanan nga luyag nimo.

Ginpalakat ni David si Abner kag naghalin ini sing mahidaeton.22 Wala magdugay, nag-abot si Joab kag ang mga tinawo ni David

halin sa pagpanalakay nga madamo sing mga dala nga pinang-agaw. Apang wala na sa Hebron si Abner upod kay David kay ginpalakat na niya ini kag ginpasalig nga indi maano.

23 Pag-abot ni Joab kag sang bug-os nga mga hangaway nga kaupod niya, may nagsugid sa iya nga si Abner nga anak ni Ner nagkadto sa hari, kag ginpalakat sia sang hari kag naghalin ini sing mahidaeton.

24 Si Joab nagkadto sa hari kag nagsiling, “Ano bala ang inyo ginhimo? Ginkadtoan gali kamo ni Abner. Ngaa ginpahalin ninyo sia kag ginpasugtan nga maghalin? 25 Kilala ninyo si Abner nga anak ni Ner nga nagkari sa paglimbong sa inyo kag sa pagtukib sang inyo mga buko kag tanan nga inyo ginahimo.

26 Naghalin si Joab kay David kag nagpasugo nga lagson si Abner, kag gindala nila sia pabalik halin sa bubon sang Sirah. Apang si David wala makahibalo sini. 27 Nagbalik gid man si Abner sa Hebron, kag gindala sia ni Joab sa puerta sang siudad nga silahanon lang nga kuno abi maghambalanay sila. Didto ginbuno niya sia sa tian bilang timalos sa dugo ni Asael nga iya utod. Kag napatay ini.

28 Sang mabatian ini ni David, nagsiling sia, “Si Yahweh indi magsilot sa akon kag sa akon ginharian sa walay katubtoban sa dugo ni Abner nga anak ni Ner. 29 Kabay nga pagasukton sini si Joab

kag ang bug-os nga panimalay sang iya amay. Kag kabay nga wala sing madula sa panimalay ni Joab nga matapikan sing puko ukon aro, ukon inutil ukon mapatay sa inaway ukon magutman.

30 Si Abner ginpatay nanday Joab kag Abisai nga iya utod tungod sa pagpatay ni Abner kay Asael nga ila utod sa inaway sa Gibeon.

31 Kag nagsiling si David kay Joab kag sa tanan nga mga kaupod niya, “Gisia ninyo ang inyo bayo, magsuksok sang sako kag maglalaw kamo para kay Abner. Kag si Haring David mismo nagkumpanyar. 32 Ginlubong nila si Abner sa Hebron, kag ang hari naghibi sing mabaskog sa lulobngan ni Abner kag subong man ang tanan nga mga tawo.

33 Gin-amba sang hari ini nga palanambiton kay Abner, “Dapat bala nga mapatay si Abner kaangay sa isa ka buangboang?

34 Wala nagapos ang imo mga kamot, wala nagaid ang imo mga tiil apang napatay ka kaangay sa mga nagkalamatay sa kamot sang mga malain.” Kag liwat nga ginhibian sia sang tanan nga mga tawo.

35 Ginpalapitan sang tanan si David agod pakaunon samtang wala pa magtunod ang adlaw, apang nagsumpa si David, “Kabay nga himuon ini sa akon sang Dios kag labaw pa gid kon magkaon ako sing tinapay ukon bisan ano sa wala pa magtunod ang adlaw!”

36 Ginpakamaayo ini sang mga tawo subong sang tanan nga ginhimo sang hari. 37 Sadto nga adlaw, nahangpan sang tanan nga mga tawo kag sang bug-os nga Israel nga wala sing labot ang hari sa kamatayon ni Abner nga anak ni Ner.

38 Ang hari naghambal sa iya mga tinawo, “Nakahibalo bala kamo nga isa ka heneral kag dungganon nga tawo ang napatay sa sini nga adlaw sa Israel? 39 Kag subong, bisan pa hari ako nga ginhaplasan, wala ako sing mahimo sa pagpugong sa mga anak ni Sarvia. Kabay nga si Yahweh ang magasukot sa naghimo sing malain suno sa iya kalainan.Ginpatay si Isbaal

4 1 Sang mabatian ni Isbaal nga anak ni Saul nga si Abner napatay sa Hebron, nagluya sia kag ang bug-os nga Israel ginkulbaan man. 2 Ang anak ni Saul may duha ka tinawo, mga kapitan sang mga panalakay nga amo sanday: Baana kag Rekab. Mga anak sila ni Rimon nga taga-Beerot. Mga Benjamenita sila tungod kay ang Beerot ginakabig pa gihapon nga bahin sang Benjamin. 3 Nagpa-lagyo ang mga taga-Beerot pakadto sa Gitaim kag didto nagpuyo sila bilang mga dumoluong tubtob karon.

4 (May isa ka piang nga bata nga lalaki si Jonatan nga anak ni Saul. Lima ka tuig ang edad sang bata nga ginahingalanan Mefibaal sang nag-abot ang balita halin sa Jezrael nahanungod kanday Saul kag Jonatan. Ginkugos sia sang iya yaya agod magpalagyo. Apang sa iya pagdalidali, ang bata nahulog kag napiang).

5 Naghalin si Rekab kag si Baana nga mga anak ni Rimon sang Beerot nagkadto sa balay ni Isbaal, kag nag-abot sila didto sang udto samtang nagapahuway si Isbaal. 6 Nagapili sang trigo ang babaye nga nagabantay sa puertahan, apang natuyo sia kag natulogan. Gani nagsulod sa balay si Rekab kag ang iya utod nga si Baana. 7 Madasig sila nga nagsulod sa kuarto ni Isbaal nga

nagakatulog sa iya hiligdaan. Ginbuno nila sia kag ginpatay. Ginpugotan nila sia sing ulo kag ginkuha ini, kag naglakat sila sa bug-os nga gab-i sa dalan pa Araba. 8 Dinala nila ang ulo ni Isbaal sa kay David sa Hebron nga nagasiling, “Ara ang ulo ni Isbaal nga anak ni Saul, ang imo kaaway nga nagtinguha sa pagkuha sang imo kabuhi. Sa karon nga adlaw, si Yahweh nagtimalos para sa akon agalon nga hari batok kay Saul kag sa iya mga kaliwat.”

9 Apang si David nagsabat sa kay Rakab kag Baana nga utod niya nga mga anak ni Rimon sang Beerot, “Buhi si Yahweh nga nagluwas sa akon sa tanan nga mga kabudlayan! 10 Sang may nagsugid sa akon nga patay na si Saul sa pagpati nga maayo nga balita ang dala niya. Kuntani padyaan ko sia, apang gindakop ko sia kag ginpatay sa Siklag. 11 Ano pa gid ayhan subong kon malain nga tawo ang nagpatay sa isa ka tawo nga matarong nga nagakatulog sa iya balay? Indi ko bala pagsukton subong ang iya dugo gikan sa inyo mga kamot kag pagalaglagon kamo sa duta?”

12 Kag ginsugo ni David ang iya mga tinawo sa pagpatay sa ila. Gin-utod nila ang ila mga kamot kag tiil, kag ginpakabit malapit sa punong sang tubig sa Hebron. Ginkuha nila ang ulo ni Isbaal kag ginlubong sa lulobngan ni Abner sa Hebron.Si David, hari sang Israel

5  • 1 Nagkadto kay David sa Hebron ang tanan nga mga tribo sang Israel kag nagsiling, “Mga tul-an kag unod mo kami. 2 Sang si Saul ang amon hari sang nagligad, ikaw na ang nagapamuno sa Israel sa tanan nga mga butang. Kag nagsiling si Yahweh sa imo nga ikaw ang mangin-manugbantay sang iya pungsod nga Israel kag manugdumala sang Israel.” 3 Si Haring David naghimo sing kasugtanan sa atubangan ni Yahweh sa tanan nga mga katigulangan sang Israel nga nagkadto sa iya sa Hebron, kag ila dayon ginhaplasan si David bilang hari sang Israel.

4 Treinta ka tuig ang edad ni David sang mahimo sia nga hari. Kag naghari sia sa sulod sang kuarenta ka tuig: 5 pito ka tuig kag tunga bilang hari sang Juda sa Hebron kag treintay-tres ka tuig sa bug-os nga Israel kag Juda sa Jerusalem. Gin-agaw ni David ang Jerusalem

6 Ang hari kag ang iya mga tinawo nagkadto sa Jerusalem sa pagpakig-away batok sa mga Jebuseo nga nagapuyo didto. Nagsiling sila kay David, “Indi ka makasulod diri kay pagatabugon ka sang mga bulag kag piang,” kon sayuron, indi makasulod si David. 7 Apang ginbihag ni David ang kampo sang Sion kag nahimo ini nga “Siudad ni David.”

8 Si David nagsiling sadto nga adlaw, “Ang bisan sin-o nga magasalakay batok sa mga Jebuseo, kinahanglan mag-agi sa idalum sang kueba nga ginailigan sang tubig pakadto sa mga piang kag bulag nga ginakaugtan ni David.” Gani amo ini ang ila ginasiling, “Indi makasulod sa Balay ang mga bulag kag piang.”

9 Nagpuyo si David sa kampo kag gintawag ini nga Siudad ni David. Ginpamakuran niya ang bug-os nga palibot sadto halin sa Milo kag amo man sa sulod. 10 Nangin gamhanan pa gid si David tungod kay si Yahweh nga Dios nga makagagahum yadto sa iya.

11 Si Hiram nga hari sang Tiro nagpadala kay David sang mga suloguon nga may dala nga mga tablon nga sedro, mga panday kag mga kartero; kag nagpatindog sila sang balay para kay David.

12 Kag nahangpan ni David nga ginhimo gid sia ni Yahweh nga hari sa bug-os nga Israel, kag ginpakataas ang iya ginharian para sa mga tawo sini sang Israel. 13 Paghalin ni David sa Hebron, nagkuha pa gid sia sang mga asawa nga ulipon kag mga asawa sa Jerusalem, kag gani nagdamo pa gid ang iya mga anak nga lalaki kag babaye. 14 Ang iya mga anak sa Jerusalem amo sanday: Samua, Sobab, Natan, Solomon, 15 Yibar, Elisua, Nefeg, Jafia, 16 Elisama, Eliada kag Elifelet.

17 Sang mabatian sang mga Pilisteo nga ginpili na bilang hari sang Israel si David, nagtaklad sila tanan sa pagdakop kay David. Sang mahibaloan ini ni David, nagkadto sia sa kampo. 18 Ang mga Pilisteo nag-abot na nga nagalinya sa kapatagan sang Refaim. 19 Nagpamangkot dayon si David sa kay Yahweh, “Salakayon ko bala ang mga Pilisteo? Itugyan mo bala sila sa akon mga kamot? Nagsabat si Yahweh kay David, “Sige, kay itugyan ko gid man ang mga Pilisteo sa imo mga kamot.” 20 Nagkadto si David sa Baal-Perazim kag didto ginlutos niya sila. Nagsiling sia, “Ang akon mga kaaway gin-isaisa ni Yahweh nga daw ginbahaan sila.” Gani gintawag nga Baal-Perazim ina nga duog. 21 Gindala ni David kag sang iya mga tinawo ang mga diosdios nga ginbayaan sang mga Pilisteo.

22 Nagbalik ang mga Pilisteo kag liwat nga naglinya sa kapatagan sang Refaim. 23 Ginpamangkot ni David si Yahweh nga nagsabat sa iya, “Indi ka magsalakay sa atubangan kundi libot ka kag salakaya sila sa likod malapit sa mga kahoy nga balsamo. 24 Kon makabati ka sang mga tapak sa ibabaw sang mga kahoy nga balsamo, magsalakay ka dayon kay si Yahweh magauna sa imo sa pagsalakay sa mga hangaway sang Pilisteo.” 25 Gintuman gid ni David ang sugo ni Yahweh kag iya ginpang-labo ang mga Pilisteo halin sa Gibeon tubtob sa Gezer.Ang Kaban gindala ni David sa Jerusalem

6  • 1 Gintipon liwat ni David ang mga pinili nga mga lalaki sang Israel – naglambot sa tatlo ka libo tanan. 2 Naglakat sia kag ang tanan niya nga kaupdanan sa Baala sang Juda agod halin didto dalhon nila ang Kaban sang Dios sa diin ang iya Ngalan ginasambit kag ginabutang mismo ni Yahweh nga makagagahum nga nagapungko sa mga kerubin.

3 Ginkarga nila ang Kaban sang Dios sa isa ka bag-o nga karito kag gindala ini pagua sa balay ni Abinadab sa bakulod. Sanday Uzza kag Ahio nga mga anak ni Abinadab ang nagatuytoy sa bag-o nga karito, 4 kag si Ahio amo ang nagapanguna sa Kaban. 5 Si David kag ang bug-os nga panimalay sang Israel nagsaut sing malipayon sa pagpadungog kay Yahweh, nga nagainamba kag nagalanton sang lira, arpa, tamburin, kastanet kag platilyos.

6 Pag-abot nila sa linasan ni Nakon, gindab-ot ni Uzza ang Kaban sang Dios kag gin-uyatan kay diutayon na lang ini tumbahon sang mga baka. 7 Subong sang kalayo ang kaakig ni Yahweh kay Uzza kag sadto gid ginsilutan sia sang Dios tungod sang iya pagsayop. Napatay si Uzza didto sa tupad sang Kaban sang Dios.

8 Naakig si David tungod ginsilutan ni Yahweh si Uzza, kag gintawag nga Perez-Uzza ina nga duog tubtob karon.

9 Nagkahadlok si David kay Yahweh sina nga adlaw kag nagsiling, “Paano na lang ang pag-abot sa akon sang Kaban ni Yahweh?” 10 Kag si David indi na luyag nga dalhon ang Kaban ni Yahweh sa iya sa Siudad ni David; kag sa baylo sini ginpadala niya ini sa balay ni Obed-Edom nga taga-Gat. 11 Tatlo ka bulan didto ang Kaban ni Yahweh, kag ginbendisionan ni Yahweh si Obed-Edom kag ang iya bug-os nga panimalay. 12 May nagsugid kay Haring David nga ginbendisionan ni Yahweh ang panimalay ni Obed-Edom kag ang ta-nan sini nga mga pagkabutang tungod sa Kaban sang Dios.

Gani nagpanaog si David kag malipayon nga gindala sa Siudad ni David ang Kaban sang Dios halin sa balay ni Obed-Edom. 13 Ikan-um pa lang nga tikang sang mga nagadala sang Kaban ni Yahweh, nagdulot na sia sang isa ka toro kag isa ka matambok nga baka.

• 14 Nagsaut si David sa bug-os niya nga kusog nga nagabayo sang lino nga iya sang pari sa atubangan ni Yahweh 15 samtang sia kag ang bug-os nga panimalay sang Israel nagadala sang Kaban ni Yahweh nga nagahinugyaw kag nagalanton sang trumpeta. 16 Pagsulod sang Kaban ni Yahweh sa Siudad ni David, nagtamwa sa bintana si Micol nga anak ni Saul. Kag sang makita niya si David nga nagalukso kag nagasaut sa atubangan ni Yahweh, ginpakanubo niya sia sa iya tagipusoon.

17 Ginpasulod nila ang Kaban ni Yahweh kag ginbutang sa iya sini duog sa tolda nga ginpatindog ni David sing hungod para sa sini. Kag naghalad si David sa atubangan ni Yahweh sang mga halad nga sinunog kag mga dulot sa paghiambitanay. 18 Sa tapos sia ma-kahalad, ginbendisionan niya ang mga tawo sa Ngalan ni Yahweh nga Makagagahum. 19 Kag ginpanagtag niya sa tagsatagsa sa ila, sa tagsa ka lalaki kag babaye nga Israelinhon ang isa ka bilog nga tinapay, isa ka hiwa sang karne nga sinugba kag mga pasas. Kag ang tagsatagsa nagpauli sa ila puloy-an.

20 Sang magpauli si David sa pagbendision sang iya panimalay, ginsugata sia ni Micol nga anak ni Saul kag ginsingganan, “Daku gid ini nga kadungganan subong para sa isa ka hari sang Israel nga maghublas subong sang mga bastos sa atubangan sang mga ulipon nga babaye sang iya mga alagad.”

21 Apang nagsiling si David kay Micol, “Nagsaut ako sa pagdayaw kay Yahweh nga buhi nga nagpili sa akon sa baylo sang imo amay kag sang iya panimalay, kag ginhimo niya ako nga pangulo sang Israel nga katawohan ni Yahweh. Kag nagatumbo ako sa kalipay sa pagdayaw sa iya. 22 Magpakaubos pa ako sing labi pa sini kag mapa-kahuy-an mo ako apang padunggan pa ako sang mga babaye nga ulipon nga imo nasambit.”

23 Kag wala gid makapamata si Micol nga anak ni Saul tubtob sa adlaw nga napatay sia. Ang mensahe ni Natan

7  • 1 Sang ang hari yadto na sa iya balay kag mahatagan sia sang kapahuwayan ni Yahweh gikan sa tanan niya nga mga kaaway sa palibot, 2 nagsiling sia sa propeta nga si Natan, “Tan-awa, nagapuyo ako subong sa isa ka balay nga sedro apang ang Kaban sang Dios yara lang sa tolda.” 3 Nagsabat si Natan, “Himo-a ang ginahunahona mo kay si Yahweh yara sa imo.”

4 Apang sina nga gab-i, si Yahweh nagsiling kay Natan, 5 “Lakat ka kag singgana ang akon alagad nga si David, ‘Amo ini

ang ginasiling ni Yahweh: Ikaw bala ang magapatindog sang balay nga akon pagapuy-an? 6 Wala pa ako nakapuyo sa balay halin sang paguaon ko ang mga Israelinhon sa Ehipto tubtob karon. Kundi nagsaylusaylo lang ako sa mga duog nga nagapuyo sa isa ka tolda. 7 Sa bug-os nga panahon nagpanglakaton ako kaupod sa tanan nga mga Israelinhon. May ginhambal bala ako sa mga pangulo sang Israel nga akon ginsugo sa pagbantay sang akon mga tawo nga Israel? Naghambal bala ako: Ngaa wala ninyo ako pagpatindugan sang isa ka balay nga sedro?’

8 Singgana subong ang akon alagad nga si David: Amo ini ang ginasiling ni Yahweh nga makagagahum: Ginkuha ko ikaw gikan sa pagka-manugbantay sang mga karnero agod mangin-pangulo sang akon katawohan nga Israel. 9 Yara ako sa imo bisan diin ka man magkadto, kag ginpatay ko sa atubangan mo ang tanan mo nga ka-away. Kag subong, pabantugon ko ang imo ngalan subong sa mga gamhanan nga tawo sa kalibutan. 10 Magapili ako sing duog para sa akon mga tawo nga Israel kag didto ko sila papuy-on agod mabuhi sila sa ila duog. Wala na sing magagamo sa ila kag indi na sila liwat pagtublagon sang mga malain subong sadtong una. 11 Halin sang pagpili ko sang mga Hukom sa akon mga tawo nga Israel, ikaw lang ang gin-apinan ko batok sa tanan mo nga kaaway. Kag si Yahweh nagsiling sa imo nga sia mismo ang magapatindog sang balay para sa imo.

12 Kon mapatay ka na kag ilubong upod sa imo mga katigulangan, pagahatagan ko sang gahum ang imo anak nga nagasunod sa imo, matawo gikan sa imo, kag palig-unon ko ang iya ginharian.

13 Sia ang magapatindog sang balay para sa akon Ngalan kag patindugon ko man ang trono sang iya ginharian sa walay katubtoban. 14 Ako mangin-iya amay kag sia mangin-akon anak. Kon maghimo sia sang sala, silutan ko sia sa hanot subong sang ginahimo sang mga tawo. 15 Apang indi ko sia pagpatumbayaan subong sang ginhimo ko kay Saul sang kuhaon ko sia sa imo atubangan. 16 Magapabilin sa atubangan ko sa walay katubtoban ang imo panimalay kag ang imo ginharian, kag ang imo trono magatindog nga wala sing katapusan.

17 Ginsugi d ni Natan kay David ini tanan nga mga pulong kag panan-awan. 18 Kag nagsulod si David, nagpungko sa atubangan ni Yahweh kag nagsiling,

“Sin-o bala ako, O Yahweh nga Dios, kag bisan sin-o bala ang akon pamilya kon ngaa gindala mo ako tubtob diri? 19 Apang diutay pa gihapon ini sa imo panan-awan, O Yahweh nga Dios, gani nagsaad ka pa gid nahanungod sa panimalay sang imo alagad. Amo bala ini ang ginapakita sang tawo, O Yahweh nga Dios? 20 Ano pa bala ang masiling ni David sa imo? Kilala mo ang imo alagad, Yahweh nga Dios! 21 Tungod sa imo pulong kag suno sa imo kabubot-on, ginhimo mo ini tanan nga mga butang nga dalagku nga imo ginpahibalo sa imo alagad. 22 Gamhanan ka gid, O Yahweh nga Dios! Wala sing kaanggid sa imo, kag wala na sing iban nga Dios luas sa imo suno sa amon gid nabatian.

23 May yara bala sa duta nga kaangay sa imo mga tawo nga Israel, isa ka pungsod nga ginpalapitan sang Dios agod luwason bilang iya mga tawo? Nangin bantog gid ikaw sa imo mga tawo sa paghimo sing dalagku kag makatilingala nga mga butang para sa ila, sa pagluwas mo sa ila gikan sa Ehipto, sa mga tawo kag sa ila mga dios. 24 Ginpain mo kag ginpabakod ang Israel bilang imo gid mga tawo sa walay katubtoban. Kag ikaw, Yahweh, nangin ila Dios.

25 Kag karon, O Yahweh nga Dios, tumana sa gihapon ang ginsaad nga imo ginpahayag sa imo alagad kag sa iya panimalay, kag tumana ang imo ginsiling. 26 Kabay nga padunggan ang imo Ngalan sa walay katubtoban sa ila pagsiling nga ‘Si Yahweh nga makgagahum amo ang Dios sang Israel.’ Kag magatindog sa imo atubangan ang panimalay sang imo alagad nga si David 27 kay ginpahayag mo na ini, O Yahweh nga makagagahum, Dios sang Israel, sa imo alagad kag nagsiling sa iya, ‘Patindugan ko ikaw sang isa ka balay.’ Gani ang imo alagad ma-isog nga nagapangamuyo sini sa imo.

28 Kag karon, O Yahweh nga Dios, ikaw amo ang Dios kag matuod ang imo mga pulong, kag ikaw nagpahayag sining matahum nga saad sa imo alagad, 29 kabay nga imo bendisionan ang panimalay sang imo alagad agod nga magpabilin sa imo atubangan sa wala sing katapusan. Tungod ikaw, O Yahweh nga Dios, ang nagsiling, kag sa imo bendision, pagabendisionan mo ang panimalay sang imo alagad sa walay katubtoban.” Mga pagpakig-away ni David

8  • 1 Sa tapos sini, ginlutos ni David ang mga Pilisteo, kag gin-agaw sa ila ang paggahum sa kadutaan. 2 Ginlutos man niya ang mga Moabnon. Ginpahigda

niya sila sa duta kag dayon gintakus sila sing lubid. Tagduha ka laba sing lubid ang ila ginpatay kag ginpabay-an nga mabuhi ang isa ka laba. Gani nangin sakop ni David ang mga Moabnon kag nagbayad sila sing buhis sa iya.

3 Ginlutos man ni David si Hadadezer nga anak ni Rehob kag hari sang Soba sang tinguhaon sini liwat nga gahuman ang duta sa Suba Eufrates. 4 Ginbihag ni David gikan sa iya ang isa ka libo kag pito ka gatos nga mga manugkabayo kag beinte ka libo nga mga soldado. Ginpamiang niya ang tanan nga mga kabayo nga nagaguyod sing karwahe kag nagbilin lang sang para sa isa ka gatos ka karwahe.

5 Nag-abot man ang mga Arameo sang Damasco sa pagbulig kay Hadadezer nga hari sang Soba apang ginlutos ni David ang beinte dos ka libo sa ila nga mga Arameo. 6 Kag nagbutang si David sang mga garison sa Aram sang Damaco kag ginpaidalum ni David ang mga Arameo nga nagbayad man sa iya sing buhis. Ginpadaog ni Yahweh si David bisan diin sia magkadto.

7 Ginkuha ni David ang mga bulawan nga panaming sang mga opisyales ni Hadadezer kag gindala ini sa Jerusalem. 8 Madamo pa gid nga mga saway ang ginkuha ni Haring David sa Tebah kag Berotai nga mga siudad ni Hadadezer.

9 Sang mabatian ni Tou nga hari sang Hamat nga ginlutos ni David ang bug-os nga mga hangaway ni Hadadezer, 10 ginsugo niya si Joram nga iya anak sa kay Haring David agod kamustahon kag pasalamatan sa pag-away kag paglutos sini kay Hadadezer nga madugay na nga kaaway ni Tou. Nagdala si Joram sang mga butang gikan sa pilak, bulawan kag saway 11 nga ginhalad man ni Haring David kay Yahweh, kaupod sang mga pilak kag saway nga ginhalad niya gikan sa tanan nga mga pungsod nga iya ginlutos: 12 gikan sa Edom kag Moab, gikan sa mga Amonita, mga Pilisteo, mga Amalecita, kag ang mga gin-agaw kay Hadadezer nga anak ni Rehob kag hari sang Soba.

13 Nangin bantog si David sa iya pagbalik halin sa pagpakig-away sa Edom sa kapatagan sang Asin, kag deseiotso ka libo ka nga Edomita ang ginlutos niya. 14 Nagbutang sia sang mga garison sa bug-os nga Edom kag ginsakop niya ang tanan nga mga Edomita. Ginpadaog ni Yahweh si David bisan diin sia magkadto.

• 15 Naghari si David sa bug-os nga Israel kag nagpahayag sang mga kasugoan nga nagahatag sang katarungan sa tanan niya nga mga tawo. 16 Si Joab nga anak ni Sarvia amo ang pangulo sang mga hangaway, si Josafat nga anak ni Ahilud amo ang manuglista, 17 kag si Sadok nga anak ni Ahitub kag si Ahimelek nga anak ni Abiatar amo ang mga pari, si Seraya amo ang sekretaryo, 18 kag si Benaya nga anak ni Jehoiada amo ang manugdumala sa mga Kereteo kag Pele-teo. Mga pari ang mga anak ni David.

9 1 Nagpamangkot si David, “May yara pa     bala sa kaliwat ni Saul nga sarang ko mapakitaan sing kaayo tungod kay Jonatan?” 2 May isa ka suloguon nga ginahingalanan Ziba sa panimalay ni Saul, kag ginpaatubang nila sia kay David, nga nagpamangkot sa iya, “Ikaw bala si Ziba?” Nagsabat sia, “Ako ang imo alagad.” 3 Kag nagpamangkot ang hari, “Wala na bala sing nabilin sa kaliwat ni Saul nga ang kaayo sang Dios akon mapakita sa iya?” Nagsabat si Ziba sa hari, “May anak nga lalaki si Jonatan nga lupog.” 4 Nagpamangkot ang hari, “Diin sia?” Kag nagsabat si Ziba, “Yara sia sa Lodebar, sa balay ni Makir nga anak ni Ammiel.” 5 Ginkuha sia ni Haring David sa Lodebar, sa balay ni Makir nga anak ni Ammiel.

6 Sang pag-abot ni Mefibaal nga anak ni Jonatan kag apo ni Saul, nagsaludo sia nga nagahalok sa duta. Kag nagsiling si David, “Mefibaal.” Nagsabat sia, “Yari

ako nga imo alagad.” 7 Nagsiling dayon si David, “Dili ka magkahadlok. Mangin-maayo ako sa imo tungod kay Jonatan nga imo amay, kag ibalik ko sa imo ang bug-os nga kadutaan sang imo amay nga si Saul. Wala labot sina, magakaon ka sa gihapon upod sa akon sa kalan-an.” 8 Nagduko si Mefibaal kag nagsiling, “Sin-o bala ako nga inyo alagad nga kaangay sa isa ka patay nga ido nga hatagan sing pagtamod?”

9 Ginpatawag sang hari si Ziba nga suloguon ni Saul, kag nagsiling sa iya, “Ginhatag ko sa anak sang imo agalon ang tanan nga mga pagkabutang ni Saul kag sang iya kaliwat. 10 Ikaw kag ang imo mga anak kag mga ulipon amo ang magaarado sang duta. kag magaani para sa iya agod nga may kalan-on ang panimalay sang imo agalon. Apang si Mefibaal nga anak sang imo agalon amo ang magasalo sa gihapon sa akon kalan-an.” May kinse ka mga anak nga lalaki kag beinte ka mga suloguon si Ziba, 11 kag nagsiling sia sa hari, “Ang inyo alagad magatuman sang tanan nga mga sugo sang agalon ko nga hari, apang si Mefibaal magakaon subong isa ka anak sang hari sa akon kalan-an.” 12 May anak nga bata nga lalaki si Mefibaal nga ginahingalanan Mika; kag nangin suloguon ni Mefibaal ang tanan nga yadto sa balay ni Ziba.

13 Apang si Mefibaal nga lupog sa Jerusalem nagpuyo tungod kay nagasalo sia sa gihapon sa kalan-an sang hari.

10  1 Sang mapatay ang hari sang mga Amonita, si Hanun nga iya anak amo ang nagbulos sa iya. 2 Kag si David nagsiling, “Pagaayuhan ko si Hanun nga anak ni Nahas subong sang iya amay nga nagmaalwan sa akon.” Gani ginsugo ni David ang iya mga alagad sa pag-unong kay Hanun sa pagkapatay sang iya amay. Sang mag-abot ang alagad ni David sa kadutaan sang mga Amonita, 3 nagsiling ang mga pangulo sang mga Amonita kay Hanun nga ila agalon, “Sa banta ninyo ginapadunggan bala ni David ang inyo amay sa pagpadala sang mga tinawo nga magaunong sa inyo? Indi ayhan ginpadala sila ni David sa inyo agod magpanilag kag magpang-usisa, kag agod agawon ang siudad?”

4 Kag ginpadakop ni Hanun ang mga tinawo ni David; ginbarbasan nila ang katunga sang ila burangos kag gin-gunting ang ila mga bayo tubtob sa buli kag dayon ginpalakat. 5 Sang ginsugid ini kay David, ginpasugat niya ang iya mga tinawo tungod kay nahuy-an gid sila. Ginpahibalo sila sang hari, “Sa Jerico lang kamo anay magpabilin tubtob magtubo ang inyo burangos, kag ugaling kamo magbalik.”

6 Nakita sang mga Amonita nga naghigko na ang ila ngalan kay David, gani nagpasugo sila sa pag-arkila sang beinte ka libo nga mga soldado nga Arameo sa Bet-Rehob kag Soba, lakip na ang isa ka libo ka mga tinawo sang hari sang Maaka kag ang dose ka libo nga taga-Tob. 7 Sang mabatian ini ni David, ginpa-dala man niya si Joab kag ang tanan niya nga isganan nga mga hangaway.

8 Naglinya ang mga Amonita sa pag-away sa puerta sang ila siudad kag nagbantay man sa kapatagan ang mga Arameo nga taga-Soba kag Rehob kag ang mga tinawo gikan sa Tob kag Maaka. 9 Sang makita ni Joab nga natung-an sila sang duha ka kaaway sa atubangan kag sa likod, ginpili niya ang mga pinili nga tinawo sang Israel kag ginpalinya sila sa pag-atubang batok sa mga taga-Aram.

10 Dayon gintugyan niya sa pagpamuno ni Abisai nga iya utod ang iban nga mga hangaway, kag ginpalinya sila sa pagpakig-away sa mga Amonita. 11 Kag nagsiling sia, “Kon mabaskog gid sa akon ang mga Arameo, kinahanglan buligan mo ako; apang kon ang mga Amonita mabaskog pa sangsa imo, pagabuligan ko man ikaw. 12 Magpakaisog ka! Ipakita ta ang pagkalalaki para sa aton mga tawo

kag sa mga siudad sang Dios. Kabay nga himuon ni Yahweh ang maayo suno sa iya kabubot-on.

13 Ginsalakay ni Joab kag sang iya mga kaupod agod awayon ang mga Arameo nga nagpalalagyo sa atubangan niya. 14 Sang makita sang mga Amonita nga nagpalalagyo ang mga Arameo, nagpalagyo man sila sa atubangan ni Abisai kag nagsulod sa siudad. Nagbalik si Joab pagkatapos sang iya pagpakig-away sa mga Amonita kag nagkadto sa Jerusalem.

15 Natalupangdan sang mga Arameo nga nalutos sila sang Israel, gani nagtilipon sila. 16 Kag ginpatawag ni Hadadezer ang mga Arameo nga yadto sa tabok sang Suba Eufrates. Nagkadto sila sa Helam sa pagpamuno ni Sobak nga pangulo sang mga hangaway ni Hadadezer.

17 Ginsugid ini kay David kag dayon iya man gintipon ang bug-os nga mga hangaway sang Israel. Nagtabok sila sa Jordan kag nagkadto sa Helam. Ang mga Arameo naglinya man dayon sa pag-atubang kay David sa inaway.

18 Apang nagpalagyo ang mga Arameo. Pito ka gatos nga mga nagasakay sa karwahe kag kuarenta ka libo ka mga soldado ang ginpatay ni David sa mga Arameo. Ginbuno man niya si Sobak nga nagapamuno sang ila mga hangaway kag didto ini napatay.

19 Sang makita sang mga hari nga nagasalig kay Hadadezer nga ginlutos sila sang Israel, naghimo sila sing kasugtanan sa Israel kag nagpaidalum sa ila. Kag nahadlok na gid ang Aram nga magbulig sa mga Amonita. Si David kag si Batseba

11  • 1 Sa tapos sang tigtulognaw, sa panahon nga nagapakig-away ang mga hari, gindala ni David si Joab upod ang iya mga opisyales kag ang bug-os nga mga hangaway sang Israel. Ginpamatay nila ang mga Amonita kag ginkibon ang Raba samtang si David nagpabilin sa Jerusalem.

2 Isa sadto ka hapon, pagbangon ni David sa iya pagpahuway, naglakat-lakat sia sa atop sang palasio kag didto nakita niya ang isa ka babaye nga nagapaligo – katahum gid sang babaye! 3 Nagpasugo si David sa pagpamangkot kon sin-o ang babaye, kag nahibaloan niya nga sia amo si Batseba nga anak ni Eliam kag asawa ni Urias nga Heteo. 4 Nagpasugo si David nga kuhaon sia. Nagkadto gid sa iya ang babaye kag nagpakighilawas sia sa iya sa tapos makapaninlo ang babaye sa iya pamulanon. Kag nagpauli ang babaye sa iya puloy-an, 5 apang nagpanamkon ini, gani ginpahibalo niya si David, “nagabusong ako.” 6 Ginpadala ni David ang mensahe kay Joab, “Ipadala mo sa akon si Urias nga Heteo.” Kag ginpadala gid ni Joab si Urias kay David.

7 Sang pag-abot ni Urias kay David, ginpangamusta niya si Joab kag ang mga tawo kag ang kahimtangan sang inaway. 8 Kag nagsiling si David kay Urias, “Magpauli ka na sa imo balay kag magpanghugas sang tiil.”

Naghalin si Urias sa palasio kag ginpadala sang hari sa iya ang kalan-on gikan sa iya kalan-an. 9 Apang wala nagpauli si Urias, kundi

nagtulog sia malapit sa puertahan sang palasio upod ang tanan nga mga suloguon sang iya agalon. 10 Ginsugid nila kay David nga wala magpauli si Urias, kag nagsiling sia sini, “Indi bala nga naghalin ikaw sa pagpanglakaton? Ngaa wala ka magpauli?” 11 Nagsabat si Urias, “Nagapuyo sa mga tolda ang Kaban kag ang Israel kag Juda, apang ang akon agalon nga si Joab kag ang iya mga tinawo yara sa gua nagakampo. Magapauli bala ako sa akon puloy-an agod magkaon kag mag-inum kag maghulid sa akon asawa? Indi ko ini mahimo?” 12 Kag nagsiling si David kay Urias, “Diri ka na lang anay subong kag sa buas na lang kita palakton.”

Gani nagpabilin sa Jerusalem si Urias sina nga adlaw kag sang madason pa gid. 13 Gin-agda ni David si Urias nga magkaon kag mag-inum upod sa iya tubtob nga nahubog sia. Apang sina nga gab-i, naggua si Urias kag nagtulog upod sa mga suloguon sang iya agalon sa baylo nga magpauli sia.

14 Sang pagkaaga, nagsulat si David kay Joab kag ginpadala ini kay Urias; 15 ginsulat niya, “Ibutang mo si Urias sa atubangan, sa diin nagalapuyot ang inaway, kag bayaan mo sia agod maigo kag mapatay.” 16 Sang mapalibutan na ni Joab ang siudad, ginbutang niya si Urias sa duog nga nahibaloan niya nga mabakod ang mga kaaway. 17 Nagsalakay ang mga yadto sa siudad kag nag-pakigsumpong kay Joab. Pila sa mga opisyales kag mga tinawo ni David ang natumba. Napatay man si Urias nga Heteo.

18 Ginpahibalo ni Joab kay David ang tanan nga mga hitabo sa inaway. 19 Kag ginsugo niya ang mensahero, “Sa tapos mo isaysay sa hari ang tanan nga natabo sa inaway, 20 ayhan magalupok sia sa kaakig kag magapamangkot sa imo, ‘Ngaa nagpalapit kamo sa siudad sa pagbato? Wala bala ninyo mahibalo-i nga pagapanaon kamo halin sa pader? 21 Sin-o bala ang nagpatay kay Abimelek nga anak ni Jerubaal? Indi bala isa ka babaye nga naghulog sang isa ka galingan nga bato sa iya halin sa pader gani napatay sia sa Tebes? Ngaa nagpalapit kamo sa pader?’ Dayon singgana sia nga ‘Patay na man ang imo alagad nga si Urias nga Heteo.’”

22 Naglakat na ang mensahero kag pag-abot niya ginsugid kay David ang tanan nga gintugon sa iya ni Joab.

23 Kag ginpaathag sang mensahero kay David ang tanan nga gintugon ni Joab, “Gindaog kami sang kaaway kag ginsalakay kami sa gua, apang ginpaisol namon sila tubtob sa puerta sang siudad. 24 Apang ginpana sang mga manugpana ang inyo mga suloguon halin sa ibabaw sang pader kag napatay ang pila ka mga tinawo sang hari. Napatay man ang inyo alagad nga si Urias nga Heteo.”

25 Nagsiling si David sa mensahero, “Paisuga si Joab kag singgana sia nga dili magpakaluya kay indi gid mapaktan kon sin-o ang mapatay sa inaway. Salakayon niya liwat sing mabaskog ang siudad kag agawon ini.”

26 Sang mabatian sang asawa ni Urias nga napatay ang iya bana, ginkasubo niya ini. 27 Sang matapos na ang paglalaw, ginpakuha sia ni David kag gindala sa iya balay kag nangin iya asawa, kag nagbata sang isa ka lalaki. Apang malain sa panan-awan ni Yahweh

ang ginhimo ni David. Ginhambalan ni Natan si David

 12  • 1 Ginsugo ni Yahweh si Natan nga propeta sa kay David. Nagkadto si Natan sa hari kag nagsiling, “May duha ka lalaki sa isa ka siudad: manggaranon ang isa kag ang isa imol. 2 Ang manggaranon may madamo gid nga mga karnero kag baka 3 apang ang imol wala gid luas sa isa lamang ka magamay nga babaye nga karnero nga iya ginbakal. Gin-atipan niya ini kag nagdaku ini upod sa iya kag sang iya mga anak. Ginaupod niya ini sa pagkaon, kag mismo nagainum sa iya kupa kag nagasabak sa iya kon magtulog. Daw anak na niya ini nga babaye. 4 Karon, may isa ka nagapang-lakaton nga nag-abot sa manggaranon, apang ang manggaranon indi luyag magkuha sa iya karnerohan kag bakahan sang inughanda para sa nagapanglakaton. Sa baylo sina, ginkuha niya ang babaye nga karnero sang imol nga lalaki kag amo ini ang iya gin-aman para sa iya dumoluaw.”

5 Naakig gid si David sa lalaki kag nagsiling sia kay Natan, “Buhi si Yahweh! Mapatay kuntani ang lalaki nga naghimo sini. 6 Dapat nga magbayad sia sing apat ka pilo sa babaye nga karnero tungod sa iya ginhimo nga wala sing kaluoy.”

7 Si Natan nagsiling kay David, “Ikaw ini nga lalaki. Amo ini ang ginasiling ni Yahweh nga Dios sang Israel: Ginhaplasan ko ikaw nga hari sang Israel kag ginluwas sa kamot ni Saul. 8 Ginhatag ko sa imo ang balay sang imo agalon kag ang iya mga asawa sa imo sabak. Ginhatag ko man sa imo ang panimalay sang Israel kag Juda. Kag kon diutay pa gid ini, igahatag ko sa imo ang labaw pa gid. 9 Ngaa ginpakawalay pulos mo si Yahweh sa paghimo sing malain sa iya panan-awan? Ginpatay mo sa espada si Urias nga Heteo kag gin-agaw mo ang iya asawa. Huo, ginpatay mo sia sa espada sang mga Amonita. 10 Gani indi na subong magabulag sa imo panimalay ang espada tungod ginpakawalay pulos mo ako kag gin-agaw mo ang asawa ni Urias nga Heteo.

11 Amo ini ang ginasiling ni Yahweh: Magatuhaw ang katalagman gikan sa imo panimalay. Sa atubangan mo mismo pagakuhaon ko ang imo mga asawa kag igahatag ko sa imo isigkatawo nga magapakighilawas sa ila sing dayag. 12 Ginhimo mo ini sa tago, apang pagahimuon ko ini nga butang sa adlaw nga masanag nga makita sang tanan sa Israel.”

13 Nagsiling si David kay Natan, “Nakasala ako kay Yahweh.” Nagsabat si Natan kay David, “Ginpatawad na ni Yahweh ang imo sala; indi ka mapatay. 14 Apang tungod kay ginlalis mo si Yahweh sa imo paghimo sini, ang imo anak mapatay.” Dayon si Natan nagpauli.

• 15 Ang bata nga ginbun-ag ni Urias kay David ginpamasakit ni Yahweh, kag nagluya sia.

16 Nagpakitluoy si David sa Dios para sa bata, nagpuasa sia kag nagsulod sa iya balay kag naghigda sa duta sa bug-os nga gab-i. 17 Ginpilit sia sang mga tigulang sang iya panimalay nga magbangon gikan sa duta apang nagpamalibad sia. Kag wala man sia nagkaon upod sa ila.

18 Napatay ang bata sa ikapito nga adlaw. Ang mga suloguon ni David nahadlok sa pagsugid sa iya nga ang bata patay na tungod kay naghambal sila nga “Sang buhi pa ang bata, indi sia luyag magpamati sa aton ginasugid sa iya. Paano kita karon makasiling sa iya nga patay na ang bata? Basi magahimo sia sing malain.”

19 Sang matalupangdan ni David nga nagahinutikanay ang iya mga suloguon, nahangpan niya nga ang bata patay na kag nagpamangkot sia sa ila, “Patay na bala ang bata?” Nagsabat sila, “Patay na sia.”

20 Nagbangon si David gikan sa duta, nagpaligo kag nanghaplas sang lana kag nag-ilis. Dayon nga nagsulod sia sa Balay ni Yahweh kag nagsimba.

Pagbalik niya sa iya balay, nagpahanda sia sang kalan-on kag nagkaon. 21 Dayon ang iya mga suloguon nagpamangkot sa iya, “Ano bala ini? Nagpuasa ka kag naghibi sang buhi pa ang bata apang subong nga patay na sia, nagbangon ka kag nagkaon.”

22 Kag nagsabat sia, “Sang buhi pa ang bata, nagpuasa ako kag naghibi kay naghunahona ako nga ‘Sin-o ayhan ang nakahibalo? Basi maluoy sa akon si Yahweh kag mabuhi ang bata.’ 23 Apang karon patay na sia, ngaa magpuasa pa ako? Mabuhi ko pa bala sia? Ako ang magakadto sa iya apang indi na sia magabalik sa akon.”

24 Ginlingaw ni David si Batseba nga iya asawa. Nagpakighilawas sia sa iya kag nagbata si Batseba sang isa ka lalaki nga ginhingalanan Solomon. Ginhigugma sia ni Yahweh 25 kag ginpa-hibalo kay Natan nga propeta nga pagatawgon ang bata sa ngalan nga Yedidia buot silingon “Ginahigugma ni Yahweh”.

26 Si Joab nagapadayon sa pag-away sa Raba sang mga Amonita kag ginbihag ang siudad sang hari. 27 Nagpadala sia sang mga mensahero kay David sa pagsiling, “Nagpakig-away ako sa Raba kag naagaw ko na ang siudad sang tubig. 28 Tipuna ninyo subong ang nabilin pa nga mga tinawo agod palibutan ang siudad kag agawon ini, kay kon indi gani ako ang magaangkon sini kag pagatawgon ko ini sa akon ngalan.” 29 Gintipon ni David ang tanan nga mga hangaway kag nagkadto sa Raba nga iya ginsalakay ini kag gin-agaw. 30 Ginkuha niya ang korona ni Milcom nga ila diosdios nga subong kabug-at sang bulawan nga treinta ka kilo kag may malahalon nga mga alahas, kag ila ginpuni ini sa ulo ni David. Kag

madamo sia sang ginpanguha sa siudad. 31 Ang mga tawo nga yadto didto iya ginpagua kag ginpaobra nga

may lagari, piko kag wasay, sa paghimo sang tisa. Amo ini ang ginhimo ni David sa tanan nga mga siudad sang mga Amonita. Kag nagpauli dayon si David kag ang iya bug-os nga mga hangaway sa Jerusalem. Si Amnon kag si Tamar

13  • 1 May matahum nga utod nga babaye si Absalom nga anak ni David nga ginahingalanan Tamar. Naluyag sa iya si Amnon nga anak man ni David. 2 Sa daku gid niya nga paghigugma si Amnon nagmasakit. kag sia tungod kay ulay pa si Tamar wala sia sing sarang nga mahimo sini.

3 May abyan si Amnon nga ginahingalanan Jonadab nga anak ni Simea nga utod ni David. May pagkatuso ini nga tawo si Jonadab, 4 kag nagsiling sia, “Abaw, ngaa kada aga daw makalulooy ang dagway sang anak sang hari? Indi mo bala pag-isugid ini sa akon?” Nagsabat si Amnon, “Naluyag ako kay Tamar nga utod ni Absalom nga akon utod.” 5 Gani nagsiling si Jonadab sa iya, “Maghigda ka kag magpakunokuno nga may masakit. Kag kon duawon ka sang imo amay, singgana sia: Paduawa man si Tamar nga akon utod sa pagpakaon sa akon kag sa pag-aman sang kalan-on sa atubangan ko agod makita ko sia kag pakan-on ako.”

6 Naghigda dayon si Amnon kag nagpakunokuno nga may masakit, kag sang mag-abot ang hari sa pagduaw sa iya, nagsiling sia, “Paduawa man ninyo ang akon utod nga si Tamar sa pagluto sang espesyal nga tinapay sa atubangan ko, kag pakan-on ako.” 7 Kag ginpahibalo ni David si Tamar sa palasio, “Kadto-i ang imo utod nga si Amnon sa iya balay, kag luto-i sia sing kalan-on.” 8 Dayon nagkadto si Tamar sa balay ni Amnon nga iya utod nga nagahigda sadto. Nagkuha sia sing harina, ginlamas ini kag ginhimo nga tinapay sa atubangan niya kag dayon ginhurno. 9 Kag dayon, ginkuha niya ang sarten kag ginhanda ang tinapay kay Amnon. Apang nagpamalibad ini nga magkaon kag nagsiling, “Paguaa sila tanan.”

Sang makagua na ang tanan, 10 nagsiling si Amnon kay Tamar, “Dalha ang kalan-on sa kuarto kag pakan-a ako.” Gindala dayon ni Tamar sa kuarto ni Amnon nga iya utod ang tinapay nga iya ginluto. 11 Apang sang ihungit niya ini sa iya utod agod magkaon, ginhakus sia ni Amnon kag ginsingganan nga “Dali ka, utod ko, maghulid ka sa akon.” 12 Nagsabat si Tamar, “Indi, Manong, dili ako pagpilita. Wala ini ginahimo sa Israel. Dili paghimo-a ini nga kabuangan. 13 Paano ko matabunan ang akon kahuy-anan? Magakaangay ka gid sa mga buang sa banwa. Gani, kon mahimo, maluoy ka, hambala ang hari kay ihatag gid niya ako sa imo.” 14 Apang wala magpamati si Amnon kay Tamar, kag tungod kay makusog pa sia sangsa iya, ginlugos niya sia.

15 Kag pagkatapos sadto, ginkaugtan gid sia ni Amnon; ang iya kaugot sobra pa sa paghigugma nga iya ginbatyag para sa iya. Kag nagsiling si Amnon, “Magbangon ka kag magpalayo!” 16 Apang nagsabat si Tamar, “Indi! Tungod malain pa gid ang pagtabog mo sa akon sangsa ginhimo mo.” Apang indi luyag si Amnon nga magpamati sa iya. 17 Gintawag niya ang iya suloguon kag nagsiling, “Tabuga ini nga babaye kag kandadohi ang puertahan sa iya paghalin.” 18 Gani ginpagua sia sang suloguon kag ginkandado ang puertahan. Nagsuksok si Tamar sang malaba nga bayo nga may kuelyo nga masami nga ginasuksok sang mga anak nga dalaga sang hari. 19 Kag dayon gin-gisi ni Tamar ang malaba nga bayo

nga iya ginasuksok kag nagbutang sang abo sa iya ulo. Gintungtong niya ang iya kamot sa iya ulo, kag naghalin sia nga nagahibi.

20 Naghambal sa iya si Absalom, “Maghipos ka, utod, kag dili pagbatyaga ini tungod kay imo sia utod.” Nagapabilin sing masinolub-on si Tamar sa balay ni Absalom nga iya utod.

21 Naakig gid si Haring David sang mahibaloan niya ini tanan, apang wala niya gin-akigan si Amnon nga iya anak kay palangga niya sia bilang iya kamagulangan. 22 Si Absalom wala sing may ginhambal kay Amnon, bisan isa ka pulong, malain man ukon maayo. Ginakaugtan niya si Amnon sa paglugos kay Tamar nga iya utod.

23 Sang magligad ang duha ka tuig, ginhiwat ni Absalom ang paggunting sang iya mga karnero sa Baal-hazor malapit sa Efraim, kag gin-agda niya ang tanan nga mga anak nga lalaki sang hari. 24 Kag ginkadtoan man niya ang hari kag nagsiling, “May mga manuggunting subong ang imo alagad, gani kabay pa nga magsugot sa akon pangagda ang hari kag sang iya mga opisyales.” 25 Apang nagsiling ang hari kay Absalom, “Indi na, anak, indi na kinahanglan magkadto pa kami tanan, kay mabudlayan ka lang.” Ginpilit man sia gihapon ni Absalom apang indi sia luyag magkadto kag gani ginbendisionan na lang niya sia. 26 Nagsiling si Absalom, “Kon indi kamo magkadto, paupda na lang sa amon ang utod ko nga si Amnon.” Nagsabat ang hari, “Ngaa kinahanglan sia mag-upod sa imo?” 27 Apang nagpamilit si Absalom tubtob nga ginpaupod sa iya si Amnon kag ang tanan nga mga anak nga lalaki sang hari.

Daku nga sinalosalo ang gin-aman ni Absalom, nga bagay gid sa isa ka hari. 28 Ginsugo niya ang iya mga tinawo, “Bantayi ninyo kon mahubog na si Amnon sa alak, kag sa pagsugo ko patya na ninyo sia. Dili kamo magkahadlok kay ako ang nagasugo. Magpakabakod kamo kag magpakaisog?” 29 Ginhimo gid sang mga tinawo ni Absalom kay Amnon ang iya ginsugo. Kag ang tanan nga mga anak sang hari nagtindog sing madasig kag nagsinakay sa ila mga asno sa pagpa-lagyo.

30 Yadto pa lang sila sa dalan sang mabatian ni David nga ginpamatay ni Absalom ang tanan nga mga anak nga lalaki sang hari, kag wala sing nabilin nga buhi. 31 Nagtindog ang hari, gin-gisi ang iya bayo kag naghigda sa duta. Nagtindog man sa tupad niya ang tanan niya nga mga alagad nga gisi man ang ila bayo. 32 Apang nagsiling si Jonadab nga anak ni Simea nga utod ni David, “Dili maghunahona ang akon agalon nga ginpatay nila ang tanan nga mga anak nga lalaki sang hari. Si Amnon lang ang ginpatay tungod sia ang tuyo ni Absalom sa iya paglugos kay Tamar nga iya utod. 33 Gani, mahal ko nga hari, dili pagpatiha ang balita nga ginpatay ang tanan nga mga anak nga lalaki sang hari kay si Amnon lang ang ginpatay.” 34 Sa pihak nga bahin, si Absalom nagpalagyo.

Kag ang bataon nga manugbantay nakakita sang madamo nga mga tawo sa dalan pakadto sa Horonaim nga nagdulolhog halin sa higad sang bukid. Dayon nagkadto sia sa hari kag ginsugid ini sa iya. 35 Nagsiling dayon si Jonadab sa hari, “Tan-awa, indi bala matuod ang ginsiling ko sa inyo? Yara na ang imo mga anak nga lalaki.” 36 Paghambal niya sini, nag-abot ang mga anak sang hari nga naghibi sing mabaskog, kag naghibi man sing mabaskog ang hari kag tanan niya nga mga alagad.

37-38 Apang, nagpalagyo si Absalom kag nagkadto kay Talmai nga anak ni Ammihur kag hari sang Gesur, kag nagpuyo sia didto sa sulod sang tatlo ka tuig. Sa tanan sini nga tion si Haring David naglalaw sa iya anak. 39 Kag sang magtahaw na ang iya pagpangalisod sa kamatayon ni Amnon, nadula dayon ang iya kaakig kay Absalom.

14  1 Natalupangdan ni Joab nga anak ni Sarvia nga nahidlaw ang hari kay Absalom. 2 Gani nagpadala sia sang mensahero sa Tekoa sa pagsugat didto sang isa ka mangin-alamon nga babaye kag nagsiling sia nga “Magpakunokuno ka nga nagalalaw. Magsuksok ka sang inuglalaw kag dili magpamutang sang lana agod mangin-kaangay ka sa babaye nga madugay na nga naglalaw sa minatay. 3 Kag magkadto ka sa hari kag isugid sa iya ang akon ginsiling.” Kag gintudlo ni Joab sa babaye ang iya igasiling.

4 Sang atubangon sang babaye nga taga-Tekoa ang hari, nagduko sia nga nagadapat sa duta ang iya nawong sa pagtahod kag nagsiling, “Buligi ako, mahal nga Hari!” 5 Ginpamangkot sia sang hari, “Ano bala ang natabo?” Nagsabat sia, “Nabalo na ako kag patay na ang akon bana. 6 Ako nga inyo alagad, may duha ka anak nga lalaki. Nag-away sila nga duha sa uma kag wala sing nagtambag sa ila, kag ginsakit sang isa ang isa kag napatay. 7 Kag karon, ang bug-os nga pamilya batok sa akon nga inyo alagad kag nagsiling sila: Itugyan mo ang nagpatay sa iya utod agod patyon namon sia sa pagtimalos sa kamatayon sang iya utod. Kon himuon nila ina madulaan ako sing manunobli kag pagapatyon nila ang paglaum nga nabilin sa akon, kag wala na sing mabilin sa akon bana, lakip iya ngalan ukon kaliwat, sa ibabaw sang duta.”

8 Nagsiling ang hari sa babaye, “Magpauli ka na, kay magasugo ako para sa imo.” 9 Apang nagsabat ang babaye nga taga-Tekoa sa hari, “Basola ako kag ang panimalay sang akon amay, ginuo ko nga hari, kag dapat nga wala sing salabton ang hari kag ang iya trono.” 10 Nagsiling ang hari, “Dalha sa akon ang bisan sin-o nga may ginahambal sa imo sang bisan ano agod indi ka na pagtublagon pa.” 11 Kag nagsiling ang babaye, “Kon mahimo ang hari magsumpa sa ngalan ni Yahweh nga inyo Dios nga ang manugtimalos indi na magdugang pa sang kalainan sa pagpatay sang akon anak.” Nagsabat ang hari, “Ginasumpa ko sa ngalan ni Yahweh, wala sing buhok nga madula bisan isa ka bilog sa imo anak!”

12 Dayon nagsiling ang babaye, “Kon mahimo tugoti ako nga inyo alagad sa paghambal sa akon agalon nga hari.” Nagsiling sa iya ang hari, “Maghambal ka.” 13 Nagpadayon ang babaye, “Ngaa bala nagahunahona ka sang subong sini batok sa katawohan sang Dios? Sa paghambal sini sang hari, ginhukman na man sang hari ang iya kaugalingon tungod kay wala niya ginpabalik ang iya anak nga gintapok. 14 Tanan kita mapatay; kag kaangay sa tubig nga nag-alwak sa duta, indi na kita matipon pa liwat, gani wala man ginpabalik sang Dios ang kalag. Kabay nga mangita sang paagi ang hari agod magbalik ang iya anak nga gintapok. 15 Kag karon, kon nagkari ako sa pagsugid sini sa akon agalon nga hari, tungod ini sa pagpamahog sa akon sang mga tawo, gani naghunahona ako sa pagpakighambal sa hari. Kay basi pa lang ihatag niya ang ginapangayo sang iya alagad. 16 Kon nagsugot ang hari nga luwason ako nga iya alagad sa kamot sang tawo nga nagatuyo sa pagpatay sa akon kag sa akon anak sa palanublion nga ginhatag sang Dios sa amon, 17 may paghidaet kuntani gikan sa desision sang agalon ko nga hari. Tungod kay kaangay sa anghel sang Dios ang akon agalon nga hari sa paghangup sang maayo kag malain. Kabay nga si Yahweh nga inyo Dios mangin-yara sa inyo.”

18 Dayon nagsiling ang hari sa babaye, “Dili mo pagtaguon sa akon ang butang nga igapamangkot ko sa imo.” Nagsabat ang babaye, “Maghambal ka ginuo ko nga hari.” 19 Nagpamangkot ang hari, “May labot bala si Joab sini tanan?” Nagsabat ang babaye, “Buhi ang akon agalon nga hari, kag wala sing makalubag sa tuo ukon sa wala sing tanan nga ginhambal ninyo. Ang inyo alagad gid nga si Joab amo ang nagsugo sa akon nga inyo alagad kag nagtudlo sang tanan nga

inugsugid sa inyo. 20 Ginhimo ini ni Joab sa pagtago sang kamatuoran. Apang, ang akon agalon maalam subong sang anghel sang Dios, kag nahibaloan niya ang tanan nga nagakatabo sa kalibutan.”

21 Kag nagsiling ang hari kay Joab, “Sige, pagahimuon ko ang ginsiling mo. Maglakat ka kag ibalik ang pamatan-on nga si Absalom.” 22 Naghapa si Joab sa duta sa pagtahod, ginbendisionan ang hari kag nagsiling nga “Nahibaloan ko na subong ang inyo kaayo sa akon, mahal ko nga hari, tungod kay ginpasugtan ninyo ang akon ginapangayo.” 23 Kag nagkadto si Joab sa Gesur kag ginbalik si Absalom sa Jerusalem. 24 Apang nagsiling ang hari, “Papauli-a sia sa iya balay, dili sia mag-atubang sa akon.” Gani nagpauli si Absalom sa iya balay kag wala nagpakigkita sa hari.

25 Wala sing subong ka guapo kay Absalom sa bug-os nga Israel kag ginadayaw sing bug-os nga wala sing kasawayan halin sa ulo tutob sa tiil. 26 Ginagunting niya kada tuig ang iya buhok kon mabug-at na ini sa iya. Kag kon iya guntingon ang iya buhok, ginakilo niya ini nga nagabug-at sa duha ka kilo. 27 May kabataan si Absalom nga tatlo ka mga babaye nga ang isa ginhingalanan Tamar, isa ka matahum nga dalaga.

28 Duha ka tuig si Absalom sa Jerusalem apang wala sia gin-atubang sang hari. 29 Ginpatawag ni Absalom si Joab agod dalhon sia sa hari apang wala sia magpakita sa iya. Ginpatawag niya sia liwat apang wala sia magkadto. 30 Gani nagsiling si Absalom sa iya mga tinawo, “Tan-awa ninyo, malapit sa akon ang uma ni Joab nga may mga tanum nga sebada. Sige, sunoga ninyo ina.” Ginsunog sang mga tinawo ni Absalom ang uma. Dayon ang mga tawo ni Joab nag-abot nga masinolub-on sa pagsugid sa ila agalon nahanungod sa iya uma nga ginsunog sang mga tinawo ni Absalom.

31 Ginkadtoan ni Joab si Absalom sa iya balay kag ginpamangkot, “Ngaa ginsunog sang imo mga tinawo ang akon uma?” 32 Nagsabat si Absalom, “Ginpatawag ko ikaw sa paghambal sa hari ‘Ngaa ginpabalik ako halin sa Gesur? Labi nga maayo pa nga nagpabilin na lang ako didto. Luyag ko subong nga makita ang hari. Kag kon nakasala gid ako, sarang niya ako mapatay.”

33 Ginkadtoan ni Joab ang hari kag ginsiling ini sa iya. Gani ginpatawag sang hari si Absalom. Nag-abot si Absalom kag nagduko nga nagadapat sa duta ang nawong sa atubangan sang hari. Dayon ginhakus sang hari si Absalom.

15  1 Sa tapos sini, nagkuha si Absalom sang karwahe kag mga kabayo, kag singkuenta ka mga tinawo nga ginpadalagan nga nagauna sa iya. 2 Masami nga nagabangon si Absalom sing aga pa gid kag nagatindog sa higad sang dalan pakadto sa puerta sang siudad. Kon may mag-agi nga tawo nga may kaso sa hukmanan sang hari, ginapamangkot sia ni Absalom, “Tagadiin ka nga siudad?” Kon magsabat sia nga “Halin sa isa ka tribo sang Israel ang inyo alagad 3 si Absalom nagasiling, “Tan-awa, maayo kag matarong ang imo rason, apang wala sing isa nga magapamati sa imo sa duog sang hari.”

4 Kag nagsiling pa gid si Absalom, “Kuntani nangin hukom lang ako sa sini nga kadutaan! Sarang gid makakari sa akon ang bisan sin-o nga may reklamo ukon rason kag apinan ko ang iya katarungan.” 5 Kon may nagapalapit sa iya sa pagduko sa iya atubangan, gindab-ot niya agod uyatan sia kag halukan.

6 Amo ini ang ginahimo ni Absalom sa tanan nga mga Israelinhon nga nagakadto sa hukmanan sang hari, nga ginakuha para sa iya ang tagipusoon sang mga tagaisrael.

7 Sang magligad ang apat ka tuig, nagsiling si Absalom sa hari, “Kon mahimo,

tugoti ako sa pagkadto sa Hebron agod matuman ko ang akon panaad kay Yahweh. 8 Tungod kay sang yadto pa ako sa Gesur sang Aram, nagsaad ako nga inyo alagad sa pagsimba kay Yahweh sa Hebron kon ibalik niya ako sa Jerusalem.” 9 Nagsiling ang hari sa iya, “Maglakat ka sing malinong,” kag dayon nagkadto sia sa Hebron. Nagbato si Absalom sa iya amay

• 10 Apang si Absalom likum nga nagpadala sing mga mensahero sa tanan nga mga tribo sang Israel suno sini nga mensahe, “Kon mabatian ninyo ang tunog sang trumpeta, magsinggit kamo nga ‘Si Absalom amo ang hari sa Hebron!’.”

11 Naghalin si Absalom sa Jerusalem upod ang duha ka gatos ka mga lalaki nga iya gin-agda. Apang wala sila kahibalo kon ano ang iya buko. 12 Samtang nagahalad sang dulot si Absalom, ginpatawag niya sa siudad sang Gilo si Ahitofel nga Gilonita nga manuglaygay ni David. Nagbaskog gid ang pagpakighimbon kag nagadamo ang mga sumolunod ni Absalom.

13 Isa ka mensahero ang nag-abot kag nagsugid kay David nga ang mga Israelinhon yadto na sa kay Absalom. 14 Dayon nagsiling si David sa tanan nga mga opisyal nga kaupod niya sa Jerusalem. “Malakat na kita, kag magpalagyo kay indi kita makaluwas kay Absalom. Dali! Basi maabtan niya kita kag malutos kita nga pamatyon ang tanan sa siudad.” 15 Nagsabat ang iya mga opisyales, “Kaupod ninyo ang inyo mga alagad bisan ano ang imo desision mahal nga hari.”

16 Naglakat ang hari kag ang bug-os niya nga panimalay apang ginbilin ang napulo ka asawa nga mga ulipon agod mag-atipan sa palasio. 17 Naghalin dayon ang hari upod ang tanan nga mga tawo. Nagdulog sila sa pinakaulihi nga balay sang siudad 18 kag nag-agi sa iya kilid ang tanan niya nga mga tinawo lakip na ang tanan nga mga Kereteo, mga Peleteo kag ang anum ka gatos nga mga lalaki nga Giteo nga nag-upod sa iya halin sa Gat, kag ginpauna sila sa iya.

19 Ang hari nagsiling sa ila pangulo nga si Ittai nga Giteo, “Ngaa nag-upod ka pa sa amon? Magbalik ka na kag magpabilin sa imo hari tungod kay dumoluong ikaw nga gintapok gikan sa imo duog. 20 Kahapon ka lang mag-abot kag karon sa akon paghalin palibuton ko pa ikaw upod sa amon. Magbalik ka na kag dalha ang imo kauto-ran, kag kabay nga ang paghigugma kag katutom ni Yahweh yara sa imo.” 21 Nagsabat si Ittai sa hari, “Ginasumpa ko kay Yahweh kag sa inyo nga kon diin ang akon agalon nga hari, bisan pa mapatay ako ukon mabuhi, didto man ako nga inyo alagad.”

22 Kag nagsiling si David kay Ittai, “Sige, malakat na kita.” Kag nagpadayon si Ittai nga Giteo upod ang tanan niya nga mga tinawo kag kabataan. 23 Todo gid ang hibi sang tanan nga mga tawo sa

siudad samtang nagalabay sila. Dayon ang hari nagtabok sa Sapa Kidron kag nagpadayon ang tanan pakadto sa desierto.

24 Yadto man didto ang pari nga si Sadok, upod ang tanan nga mga Levita sa iya nga nagadala sang Kaban sang Kasugtanan sang Dios. Ginpapanaog nila ang Kaban sang Dios kag ginpasaka dayon si Abiatar tubtob makagua ang tanan nga mga tawo sa siudad. 25 Kag nagsiling ang hari kay Sadok, “Ibalik sa siudad ang Kaban sang Dios. Kon maayo ako sa panan-awan ni Yahweh, iya ako pabalikon kag patan-awon liwat sang Kaban kag sang iya puloy-an. 26 Apang kon magsiling sia nga indi ako maayo sa iya, yari ako kag sarang sia makahimo kon ano ang luyag niya sa akon.”

27 Naghambal man ang hari sa pari nga si Sadok, “Sige, magbalik ka sing malinong sa siudad kag dalha ang inyo anak nga lalaki nga si Ahmaaz, kag si Abiatar kag si Jonatan nga iya anak. 28 Magahulat ako malapit sa palanagoan sa desierto tubtob sa pagbaton ko sang balita gikan sa inyo.”

29 Gani, ginbalik nanday Sadok kag Abiatar ang Kaban sang Dios sa Jerusalem, kag nagpabilin sila didto.

30 Dayon nagtaklad si David nga nagahilibion sa Bukid sang Olibo. Ginatabunan niya ang iya ulo kag nagatiil sia. Ang tanan nga nag-upod sa iya may tabon man sa ulo nga nagakasubo samtang nagataklad sila.Ginpakahuy-an si David

31 Sang mabatian ni David nga si Ahitofel isa sang mga naghimbon upod kay Absalom, nagsiling sia, “O Yahweh, himo-a nga wala sing pulos ang laygay ni Ahitofel.”

32 Sang pag-abot ni David sa putokputokan sa diin ginasimba ang Dios, ginsugata sia ni Husai nga Arikita nga gision ang bayo kag may yab-ok sa ulo. 33 Nagsiling si David sa iya, “Mabudlayan ako kon mag-upod ka. 34 Mabuligan mo pa ako paagi sa paglaglag sang laygay ni Ahitofel kon magbalik ka sa siudad kag singganan si Absalom, ‘Mangin-alagad mo ako, O mahal nga Hari! Nangin alagad ako sang imo amay kag mangin-alagad mo ako subong.’ 35 Mangin-kaupod mo dira ang mga pari nga amo sanday Sadok kag Abiatar. Isugid mo sa ila ang bisan ano nga mabatian mo sa balay sang hari. 36 Yadto didto ang ila mga anak, nga amo sanday Ahimaaz nga anak ni Sadok kag Jonatan nga anak ni Abiatar, kag isugid mo sa akon paagi sa ila ang bisan ano nga mabatian mo.”

37 Kag nag-abot sa siudad si Husai nga abyan ni David dungan sa pagsulod ni Absalom sa Jerusalem.

16  1 Nakalampuas gid lang si David sa putokputokan sang masugata sia ni Ziba nga alagad ni Mefibaal, nga may dala nga isa ka pares nga asno nga nakargahan sang duha ka gatos ka bilog nga tinapay, isa ka gatos ka pungpong nga ubas, isa ka gatos nga prutas luto kag isa ka sulodlan nga puno sang bino. 2 Ginpamangkot sang hari si Ziba, “Ngaa dala mo ini tanan?” Nagsabat si Ziba, “Ang mga asno pagasakyan sang mga panimalay sang hari. Ang mga tinapay kag prutas amo ang kalan-on sang mga tinawo, kag ang bino amo ang inumon

sang mga kapoy sa desierto.” 3 Kag nagsiling sa iya sang hari, “Diin ang anak sang imo agalon?” Nagsabat si

Ziba, “Yara sa Jerusalem.” Nagsiling sia, “Ibalik subong sa akon sang panimalay sang Israel ang ginharian sang akon amay!” 4 Nagsiling sa iya ang hari, “Imo na subong ang tanan nga mga pagkabutang ni Mefibaal.” Kag nagsiling si Ziba, “Nagaluhod ako sa akon agalon nga hari, kag kabay nga malipay ka sa akon.”

5 Nag-abot si Haring David sa Bahurim, kag isa ka lalaki gikan sa kaliwat ni Saul nga ginhingalanan Simei nga anak ni Gera ang naggua nga nagapamuyayaw. 6 Ginbato niya si David kag ang tanan nga mga opisyales sang hari, sabagay nga napatung-an si David sang mga soldado.

7 Nagsiling si Simei sa iya pagpamuyayaw, “Magpalayo ka! Palayo! Tawo nga uhaw-sa-dugo kag wala sing pulos! 8 Ginsukot subong ni Yahweh sa imo ang tanan nga dugo sang kaliwat ni Saul. Ikaw ang naghari sa duog niya gani ginhatag na ni Yahweh ang gin-harian sa kamot ni Absalom nga imo anak. Yari na ang pagkahulog mo tungod kay uhaw ikaw sa dugo.”

9 Dayon nagsiling sa hari si Abisai nga anak ni Sarvia, “Ngaa ginabuyayaw sining patay nga ido ang akon agalon nga hari? Patawara lang ako kay pagautdan ko sia sang ulo.”

10 Apang nagsiling ang hari, “Dili ninyo ako paghilabti, mga anak ni Sarvia. Kon nagapamuyayaw sia tungod kay ginhambalan sia ni Yahweh nga sumpaon si David, sin-o ang magapanabat sa iya?” 11 Kag nagsiling si David kay Abisai kag sa tanan niya nga mga opisyales, “Tan-awa, kon ang akon anak nagahandum sa pagpatay sa akon, ano pa gid ayhan ini nga Benjaminita! Pabay-i ninyo sia nga sumpaon niya ako kay amo ina ang sugo sa iya ni Yahweh. 12 Basi pa lang makita ni Yahweh ang akon kasubo kag bayluhan niya sang maayo ang pagpanumpa niya sa sini nga adlaw.”

13 Gani nagpadayon sa paglakat si David kag ang iya mga tinawo, samtang nagasunod si Simei sa pagbuyayaw sa iya nga nagahaboy sang bato kag yab-ok gikan sa pihak nga kilid sang bakulod. 14 Ang hari kag ang tanan nga nagaupod sa iya kinapoy gid sang makaabot sila sa Jordan sa diin sila nagpahuway.

15 Nagsulod sa Jerusalem si Absalom kag ang tanan nga mga Israelinhon kaupod si Ahitofel. 16 Nagpalapit si Husai nga Arkita nga abyan ni David kay Absalom, kag nagsinggit, “Mabuhi ang Hari! Mabuhi! 17 Nagsiling si Absalom kay Husai, “Amo bala sini ang pag-unong mo sa imo abyan? Ngaa wala ka maghalin upod sa imo abyan?” 18 Nagsiling si Husai kay Absalom, “Indi. Magapabilin lang ako sa ginpili ni Yahweh kag sini nga mga tawo kag sang tanan nga mga Israelinhon. 19 Sin-o ang akon pagaalagaran? Indi bala dapat ko lang nga pagaalagaran ang iya anak subong sang pag-alagad ko sa imo amay? Gani magaalagad ako sa imo.”

20 Nagsiling si Absalom kay Ahitofel, “Magmiting kamo nahanungod sa dapat naton nga himuon.” 21 Nagsabat si Ahitofel kay Absalom, “Maghulid ka sa mga

asawa nga suloguon sang imo amay nga iya ginbilin sa pag-atipan sang palasio. Kon mahibaloan sang bug-os nga Israel nga nangin makaulogot ka na sa imo amay, magaisog ang tanan mo nga mga sumolunod.”

22 Gani ginpatindugan nila sing tolda si Absalom sa atop kag naghulid sia sa mga asawa nga suloguon sang iya amay, sa atubangan sang bug-os nga Israel. 23 Sadto nga panahon, ang laygay ni Ahitofel daw ginahunahona nga pulong sang Dios. Kag amo sini ang panghunahona nanday David kag Absalom sa tanan nga mga laygay ni Ahitofel.

17  1 Nagsiling si Ahitofel kay Absalom, “Papili-a ako sang duha ka libo nga mga tinawo sa pagtabog kay David karon nga gab-i. 2 Salakayon ko sia samtang kapoy sia kag ginaluyahan. Gulpihon ko sia agod magapalagyo ang tanan nga nagaupod sa iya kag ang hari lang ang mapatay ko. 3 Dayon ibalik ko sa imo ang tanan nga mga tawo subong sang nobya nga nagapauli sa iya bana. Ang kamatayon man lang sang isa ka tawo amo ang imo ginahandum, gani indi maano ang mga tawo.” 4 Daw maayo nga laygay ini kay Absalom kag sa mga tigulang sang Israel. 5 Apang nagsiling si Absalom, “Tawga si Husai nga Arkita agod mabatian naton kon ano ang masiling niya.”

6 Sang pag-abot ni Husai kay Absalom, ginpamangkot sia, “Amo ini ang laygay ni Ahitofel. Pagahimuon bala namon ang iya ginsiling? Kon indi, isugid mo ang imo pamatyag?” 7 Nagsiling si Husai kay Absalom, “Sa sini nga tion, indi maayo ang laygay ni Ahitofel. 8 Nahibaloan mo nga maisog nga hangaway ang imo amay kag ang iya mga tinawo, kag kaangay sila sa mabangis nga oso nga gin-agawan sang mga anak sa lasang. Batid na sa inaway ang imo amay gani wala sia nagaupod sa bug-os nga gab-i sa iya mga tinawo. 9 Sa sini nga mga tinion, ayhan nagapanago sia sa isa ka kueba ukon sa iban nga duog. Bisan pa pila lamang sa aton mga tinawo ang mapatay sa nahauna nga pagsalakay, pagahambalon sang bisan sin-o nga makabati sini nga nagkalamatay ang mga sumolunod ni Absalom. 10 Gani bisan pa ang mga maisog nga may tagipusoon subong sang leon matunaw sing bug-os sa kahadlok tungod kay nahibaloan sang bug-os nga Israel kon daw ano kaisog ang imo amay lakip ang iya mga kaupod. 11 Gani, ang akon laygay sa imo amo nga tipunon mo ang bug-os nga Israel sa imo halin sa Dan tubtob sa Berseba, subong sang balas sa hunasan ang kadamuon, kag ikaw mismo ang magpanguna sa inaway. 12 Kag dayon pangitaon naton sia bisan diin sia kag salakayon sia subong sang tun-og nga nagatulo sa duta. Kag wala kita sing ibilin nga buhi, bisan sia ukon sa mga lalaki nga iya kaupod. 13 Kon magpalagyo sia sa isa ka siudad, magadala sang lubid ang bug-os nga Israel sa sina nga siudad kag butongon ini sa pil-as tubtob wala na sing mabilin pa diri bisan isa ka bato.”

14 Nagsiling si Absalom kag sang tanan nga mga Israelinhon, “Labi nga maayo ang laygay sang Arkita nga si Husai sangsa laygay ni Ahitofel.” Kay ginhimo na ni Yahweh nga paslawon sing maayo ang laygay ni Ahitofel sa pagbutang kay Absalom sa katalagman.

15 Kag dayon ginsugid ni Husai sa mga pari nga amo sanday Sadok kag Abiatar, “Amo ini ang ginlaygay ni Ahitofel kay Absalom kag sa mga tigulang sang Israel apang ini ang ginlaygay ko. 16 Gani pahibal-a ninyo dayon si David nga dili magpalipas sang gab-i sa palanagoan sa desierto kundi magtabok sa pihak nga bahin, kay kon indi, mapatay ang hari kag ang tanan niya nga mga ka-upod!”

17 Sa pihak nga bahin, sanday Jonatan kag Ahimaaz yadto sa tuboran sang

Rogel. Isa ka suloguon nga babaye ang nagkadto didto agod isugid ini sa ila kag ipadala sa kay Haring David, tungod kay indi sila dapat nga makita sa siudad. 18 Apang nakita sila sang isa ka bata kag ginsugid ini kay Absalom. Ang duha naglakat gilayon kag nagsulod sa balay sang isa ka lalaki sa Bahurim. May bubon sia sa likod sang balay kag nag-ubog sila didto. 19 Ang asawa sang tawo nagtabon dayon sang baba sang bubon kag ginsabwagan sang mga liso agod indi matalu-pangdan.

20 Sang mag-abot ang mga tinawo ni Absalom sa balay sang babaye, nagpamangkot sila, “Diin na bala sanday Ahimaaz kag Jonatan?” Nagsabat sa ila ang babaye, “Nagtabok sila sa suba.” Ginpangita nila sila apang wala nila sila nakita, gani nagbalik sila sa Jerusalem. 21 Sang makahalin na ang mga tinawo ni Absalom, nagsaka ang duha pagua sa bubon kag nagkadto kay Haring David kag nagsiling, “Magtabok kamo gilayon sa suba kay batok sa inyo ang ginlaygay ni Ahitofel.”

22 Gani naglakat dayon si David kag ang tanan niya nga mga kaupod, kag nagtabok sila sa Jordan. Sang kaagahon na, nakatabok na ang tanan sa Suba Jordan.

23 Sang mahibal-an ni Ahitofel nga wala ginsunod ang iya laygay, gin-aman niya ang iya asno kag ginsakyan pauli sa iya puloy-an nga siudad. Sa tapos bilinan ang iya panimalay, naghikog sia kag napatay. Ginlubong sia sa lulobngan sang iya amay.

24 Si David yadto na sa Mahanaim sang magtabok sa Jordan si Absalom upod ang tanan nga mga Israelinhon. 25 Si Amasa amo ang ginhimo ni Absalom nga pangulo sang mga hangaway sa baylo ni Joab. Si Amasa amo ang anak ni Itra, isa ka Ismaelinhon nga nakapangasawa kay Abigail nga anak ni Isai kag utod ni Sarvia nga iloy ni Joab. 26 Nagpatindog sang kampo ang mga Israelinhon kag si Absalom sa kadutaan sang Galaad.

27 Sang pag-abot ni David sa Mahanaim, si Sobi nga anak nga lalaki ni Nahas nga taga-Raba sang mga Amonita, si Makir nga anak nga lalaki ni Ammiel sang Lodebar kag si Barzilai nga Galaadita nga taga-Rogelim 28 nagdala sang mga hiligdaan kag habol, mga pinggan kag kulon, mga trigo, sebada, harina, sinanlag nga liso, balatong kag munggo, 29 dugos kag ginkorta nga gatas, karnero kag keso nga gatas sang baka. Gin-aman nila ini kay David kag sa iya mga kaupod tungod kay naghunahona sila “Gutom na kag kapoy pa nga nauhaw ang mga tawo halin sa desierto.”

 18   1 Ginpalinya ni David ang iya mga ka upod kag ginbutangan sang mga pangulo ang tagsa ka libo kag ang tagsa ka gatos. 2 Ginpalakat niya ang mga hangaway sa tatlo ka grupo – si Joab nagapamuno sang isa ka grupo, kag ang isa ka grupo yadto sa idalum ni Abisai nga anak ni Sarvia kag utod ni Joab, kag kay Ittai nga taga-Gat ang isa pa gid ka grupo. Kag nagsiling ang hari sa mga hang-away, “Magaupod ako sa inyo.” 3 Apang nagsabat ang mga tawo, “Dili ka mag-upod. Walay pulos sa ila kon magpalagyo man kami ukon katunga sa amon ang mapatay. Apang kamo kaangay sa napulo ka libo sa amon kag labi nga maayo pa nga padalhan kami subong sang kabulig gikan sa siudad.” 4 Kag nagsiling ang hari sa ila, “Himuon ko kon ano ang maayo sa inyo. Dayon nagtindog ang hari sa higad sang puertahan, kag naggua ang ginatos kag linibo nga mga hangaway. 5 Ginsugo sang hari sanday Joab, Abisai kag Ittai, “Dili ninyo pagsakita ang lamharon nga si Absalom tungod sa akon.” Nabatian sang tanan nga mga hangaway ini nga sugo sang hari sa tanan nga mga pangulo nahanungod kay Absalom.

Ang pagkalutos kag pagkapatay ni Absalom • 6 Nagsalakay ang mga hangaway ni David sa patag-awayan

batok sa Israel. Ang inaway natabo sa kagulangan sang Efraim 7 kag didto nalutos sang mga tinawo ni David ang mga Israelinhon. Madamo ang napatay sina nga adlaw – nga naglambot sa beinte ka libo nga mga tawo.

8 Naglapnag ang inaway sa bug-os nga kadutaan kag madamo pa gid nga mga tawo ang nagkalamatay sa kagulangon sina nga adlaw sangsa ginpamatay sa espada.

9 Sa hinali, nasugata ni Absalom nga nagasakay sa kabayo ang mga tinawo ni David. Sang mag-agi ang mula sa idalum sang madamol nga mga sanga sang isa ka daku nga puno sang ensina, nasangit ang ulo ni Absalom sa kahoy kag nabilin nga nagakabit sa puno sang kahoy. Ang mula nga iya ginasakyan nagpadayon sa pagdalagan. 10 May nakakita sini kag nagsugid kay Joab, “Nakita ko si Absalom nga nagakabit sa puno sang ensina.”

11 Nagsiling si Joab sa lalakinga nagpahibalo sa iya, “Ano? Nakita mo na gali sia apang ngaa wala mo sia dayon ginpatay? Hatagan ko pa kuntani ikaw sang napulo ka bilog nga pilak kag isa ka paha.” 12 Apang nagsabat sang lalaki kay Joab, “Bisan pa hatagan mo ako sing isa ka libo ka bilog nga pilak, indi ko mapatup-an sang kamot ang anak sang hari, kay nabatian namon ang sugo sang hari sa imo kag sa kay Abisai kag Ittai, nga dili ninyo pagtandugon ang lamharon nga si Absalom tungod sa iya. 13 Kon maghimo ako sang malain, mahibaloan ini sang hari, kag pat-od gid nga indi ninyo ako pag-apinan.” 14 Nagsabat si Joab, “Indi ako mag-usik sang panahon sa imo.” Kag nagkuha sia sang tatlo ka bilog nga bangkaw kag ginbuno ini sa tagipusoon ni Absalom nga nagakabit nga buhi sa puno sang ensina. 15 Dayon ginlibutan sang napulo ka mga manug-dala sang hinganiban ni Joab si Absalom nga ginbuno kag ginpatay.

16 Ginpatunog ni Joab ang trumpeta kag gin-untat sang mga hangaway ang ila paglagas sa mga Israelinhon kay ginpunggan na sila ni Joab. 17 Ginkuha nila si Absalom kag ginhaboy sa isa ka daku nga buho sa lasang kag gintabunan sang daku nga bato.

Ang tanan nga mga Israelinhon nagpalalagyo pauli sa ila puloy-an.

18 Sang buhi pa si Absalom, nagpatindog sia sang iya monyomento sa kapatagan sang Hari nga nagasiling, “Wala ako sing anak nga lalaki nga magapadayon sang akon ngalan.” Gintawag niya ini sa iya ngalan, kag tubtob karon nga adlaw, ginatawag ini nga Monyomento ni Absalom.

19 Dayon nagsiling si Ahimaaz nga anak ni Sadok, “Dalaganon ko subong sa pagsugid sa hari nga ginluwas na sia ni Yahweh sa kamot sang iya mga kaaway.” 20 Apang nagsiling si Joab sa iya, “Dili ka magdala subong sang maayo nga balita; sa iban nga adlaw na lang. Kay wala sing matahum nga balita subong tungod patay na ang anak sang hari.” 21 Dayon nagsiling si Joab sa isa sang mga taga-

Kus, “Ikaw ang magkadto sa hari kag isugid sa iya ang imo nakita.” Nagduko ang Kusita sa atubangan ni Joab kag nagdalgan.

22 Apang si Ahimaaz nga anak ni Sadok liwat nga nagsiling kay Joab, “Bisan ano ang matabo, tugoti ako sa pagdalagan upod sa Kusita.” Nagpamangkot si Joab, “Ngaa bala kinahanglan mo nga magsunod, anak? Nahibaloan mo nga wala ka sing makuha sa sining balita?” 23 Nagsiling sing malig-on si Ahimaaz. “Wala kaso, pasugti lang ako.” Nagsabat si Joab, “Sige, maglakat ka!” Nagdalagan si Ahimaaz kag nag-agi sa kapatagan, kag naunahan pa niya ang Kusita.

24 Nagapungko si David sa tunga sang duha ka puertahan. Nagkadto ang manugbantay sa ibabaw sang puertahan sang garison, kag may nakita sia nga isa ka lalaki nga nagadalagan kag nagapalapit. Ginpahibalo kay David ang pagkapatay ni Absalom

25 Gintawag sang manugbantay ang hari kag ginsugiran. Nagsiling ang hari, “Kon sia lang isa, pat-od gid nga maayo nga balita ang iya dala.” Sang malapit na ang lalaki, 26 nakita sang manugbantay ang isa pa ka lalaki nga nagadalagan. Gintawag niya ang nagabantay sa puertahan kag ginsingganan, “Tan-awa, may isa pa ka lalaki nga nagadalagan?” Nagsiling ang hari, “May dala man sia sing maayo nga balita.” 27 Dayon nagsiling ang manugbantay, “Sa panan-aw ko daw si Ahimaaz nga anak ni Sadok kon magdalagan ang nahauna nga lalaki.” Nagsabat ang hari, “Maayo nga tawo sia gani maayo nga balita ang dala niya.”

28 Nagtawag si Ahimaaz sa hari, “Maayo ang tanan.” Nagluhod sia nga nagadapat sa duta ang nawong sa atubangan sang hari kag nagsiling “Dayawon si Yahweh nga inyo Dios nga nagdaog sa mga tawo nga nagabato sa akon agalon nga hari!” 29 Ginpamangkot sia sang hari, “Wala bala maano ang lamharon nga si Absalom?” Nag-sabat si Ahimaaz, “Sang ginsugo ni Joab ako nga inyo alagad, may nakita ako nga daku nga kinagamo apang wala ako sing may nahibaloan kon ano.” 30 Gani nagsiling ang hari, “Diri ka anay sa tupad ko.” Kag dayon nagtindog sia sa iya tupad.

31 Nag-abot ang Kusita kag nagsiling, “Maayo nga balita, ginuo ko nga hari! Ginhatag ni Yahweh ang katarungan subong sa imo kag ginluwas ka sa kamot sang tanan nga nagabato sa imo.” 32 Ginpamangkot sang hari ang Kusita, “Wala man bala maano ang lamharon nga si Absalom?” Nagsabat ang Kusita, “Kabay nga mangin-subong sa sina nga lamharon ang mga kaaway sang akon agalon nga hari kag ang tanan nga magabato sa imo.”

 19   1 Natublag gid ang hari kag nagsaka sa kuarto sa ibabaw sang puertahan. Nagahibi sia samtang nagasaka nga nagasiling, “Anak ko, Absalom! Anak ko, anak ko, Absalom! Kuntani, ako na lang ang napatay indi ikaw, O Absalom! Anak ko, anak ko!”

2 May nagsugid kay Joab nga nagahibi ang hari kag nagakasubo

tungod kay Absalom. 3 Gani sang mabatian sang tanan nga mga tawo nga nagapangasubo ang hari tungod sa iya anak, nahimo nga kasubo ang kadalag-an sina nga adlaw. 4 Mahipos nga nagsulod sa siudad ang mga tawo sina nga adlaw, nagapanago nga daw na-pierde kag nahuya. 5 Gintabunan sang hari ang iya nawong kag nagsinggit, “Anak ko nga Absalom, O Absalom, anak ko, anak ko!”

6 Nagsulod si Joab sa balay sang hari kag nagsiling, “Ginbutang ninyo subong sa kahuy-anan ang tanan ninyo nga mga tinawo nga nagluwas sang inyo kabuhi kag sang inyo mga anak, mga babaye kag mga asawa nga ulipon. 7 Palangga gid ninyo ang mga naga-kaugot sa inyo kag ginakaugtan ninyo ang mga nagapalangga sa inyo. Ginpahayag ninyo sa karon nga adlaw nga walay pulos sa inyo ang inyo mga pangulo kag mga tinawo. Nakita ko subong nga labi nga maayo gali sa inyo kon mapatay kami tanan kag mabuhi lang si Absalom. 8 Maggua ka subong kag paisuga ang imo mga tinawo. Ginasumpa ko sa ngalan ni Yahweh nga kon indi ka maggua, wala sing isa nga mabilin sa inyo karon nga gab-i. Labi nga malain pa gid ini para sa imo sangsa tanan nga mga kalainan nga imo naagihan halin sa imo pagkabata tubtob karon.” Nagbalik sa Jerusalem si David

9 Gani nagtindog ang hari kag nagpungko malapit sa puertahan. Sang mahambalan ang mga tawo nga nagapungko ang hari malapit sa puertahan, nag-atubang sila tanan sa iya.

Ang tagsa ka mga tagaisrael nagpalalagyo pauli sa iya puloy-an. 10 Apang nagbinaisay ang mga tawo sa tanan nga mga tribo sang Israel, “Ginluwas kita sang hari sa kamot sang aton mga kaaway kag ginkuha kita sa mga Pilisteo, kag karon nagpalagyo sia sa kadutaan tungod kay Absalom. 11 Napatay sa inaway si Absalom nga aton ginhaplasan bilang hari naton. Kag karon, ngaa wala kita sing ginahimo agod ibalik ang hari?”

12 Nakalambot kay David ang ginasiling sang mga Israelinhon gani nagsiling sia sa mga pari nga si Sadok kag si Abiatar, “Singgana ninyo ang mga tigulang sang Juda: Ngaa kamo ang ulihi sa pagbalik sang hari sa iya palasio? 13 Mga utod ko kamo kag mga kadugo ko. Ngaa kamo pa ang ulihi sa pagpabalik sa hari? 14 Singgana man ninyo si Amasa: Indi bala kadugo kita? Ginasumpa ko sa Dios nga himuon ko ikaw nga heneral sang akon mga hangaway sa duog ni Joab.” 15 Gani nakuha niya ang balatyagon sang tanan nga mga taga-Juda, kag nagtingob sila sa pagsiling sa hari, “Magbalik kamo upod ang imo mga tinawo.”

16 Gani nagbalik ang hari. Nag-abot sia sa Jordan kag nagkadto ang mga taga-Juda sa Gilgal sa pagsugata sa hari kag sa pagpatabok sa iya sa Jordan.

17 Nagdalidali sa pag-ubog upod sa mga taga-Juda si Simei nga anak ni Gera, ang Benjaminita nga taga-Bahurim sa pagsugata kay Haring David. 18 Gin-upod niya ang isa ka libo ka lalaki gikan sa Benjamin kag si Siba nga suloguon sang panimalay ni Saul lakip ang kinse niya ka mga anak kag beinte ka mga suloguon. Nagdalidali sila sa pagkadto sa Jordan sa pagsugata sa hari. 19 Nagtabok sila sa batuhon nayon agod patabukon ang panimalay sang hari kag himuon kon ano ang luyag sang hari.

Naghapa sa atubangan sang hari si Simei nga anak ni Gera sang manugtabok na sia sa Jordan, 20 kag nagsiling, “Kabay nga patawaron ako sang akon agalon

nga hari, kag indi na pagdumdumon ang sala nga nahimo sang inyo ulipon sang maghalin sa Jerusalem ang akon agalon nga hari. Kabay nga indi na ini madumdoman sang hari 21 kay ginaaku ko nga nakasala ako. Gani nagkari ako subong, ang nahauna sa tanan nga mga kaliwat ni Jose, agod sugataon ang akon agalon nga hari.”

22 Nagsabat si Abisai nga anak ni Sarvia, “Indi bala nga dapat patyon si Simei tungod kay ginpakamalain niya ang ginpili ni Yahweh?” 23 Apang nagsiling si David, “Dili ninyo ako paghilabti, mga anak ni Sarvia. Kinahanglan bala nga may ipapatay subong sa Israel? Wala bala ako nakahibalo nga ako ang hari subong sang Israel?” 24 Kag nagpasalig ang hari kay Simei, “Indi ka mapatay.”

25 Nag-abot si Mefibaal nga anak ni Saul sa pagsugata man sa hari. Wala pa niya mahugasan ang iya mga tiil ukon naguntingan ang iya bigote ukon nalabhan ang iya bayo halin sang maghalin ang hari tubtob sa adlaw nga nagbalik ang hari sing mahimayaon. 26 Sang mag-abot si Mefibaal halin sa Jerusalem sa pagsugata sa hari, nagsiling ang hari sa iya, “Ngaa wala ka mag-upod sa akon, Mefibaal?” 27 Nagsabat sia, “Ginuo ko, O mahal nga Hari! Ginluiban ako sang akon suloguon. Tungod kay lupog ako nga inyo alagad, ginsugo ko sia nga amanon ang asno agod pagasakyan ko sa pag-upod sa hari. 28 Apang ginlaglag niya ako sa akon agalon nga hari. Daw anghel sang Dios ang akon agalon nga hari, gani himo-a kon ano ang maayo suno sa imo. 29 Pat-od gid nga patay na kuntani ang bug-os nga kaliwat sang akon amay sa atubangan sang akon agalon nga hari, apang ginkabig pa ninyo ang inyo alagad nga isa sang mga nagkaon sa inyo kalan-an. Ano pa nga kinamatarong ang yari sa akon sa pagreklamo sa hari?”

30 Nagsiling ang hari sa iya, “Ngaa madamo ka pa sang hambal? Nakadesision na ako – ikaw kag si Ziba magatunga sang kadutaan.” 31 Nagsabat si Mefibaal, “Ihatag na lang sa iya ang tanan kay wala maano nga nakapauli sa iya balay ang akon agalon nga hari.”

32 Nagdulhog man halin sa Rogelim si Barzilai nga taga-galaad sa pag-upod kag pagdul-ong sang hari sa tabok sang Jordan kag nagbabay sa iya. 33 Tigulang na gid si Barzilai nga nagaedad sing otsenta ka tuig. Manggaranon gid sia, gani sia ang nagasagud sa hari sa Mahanaim. 34 Nagsiling ang hari kay Barzilai, “Magtabok ka na lang upod sa akon kag magpuyo sa amon sa Jerusalem. Ako ang mgatatap sa imo.”

35 Apang nagsiling si Barzilai sa hari, “Pila pa ayhan ka tuig nga mangabuhi ako para lang mag-upod sa hari sa Jerusalem? 36 Otsenta na ka tuig ang edad ko subong kag indi na ako makakita sang kinatuhay sang maayo sa malain. Makapanabor pa bala ang inyo alagad sa iya ginakaon ukon ginainum? Ukon makabati pa bala sia sang tingog sang mga lalaki kag babaye nga nagaamba? Ngaa ang inyo alagad magdugang pa sang kabudlay sa akon agalon nga hari? 37 Ang inyo alagad maupod lang sa hari sa pagtabok sa Jordan tubtob sa pihak nga bahin apang ngaa kinahanglan pa nga padyaan ako sang hari tungod sini? 38 Papauli-a na lang ninyo ako agod mapatay sa tupad sang lulobngan sang akon ginikanan sa akon siudad. Apang yari si Kimham nga inyo alagad! Sia ang inyo patabukon upod sa akon agalon nga hari kag himo-a sa iya ang maayo sa panghunahona ninyo.” 39 Nagsabat ang hari, “Updon ko sa pagtabok si Kimham kag himuon ko sa iya ang maayo suno sa luyag mo. Tumanon ko para sa imo ang bisan ano nga luyag mo.”

• 40 Nagtabok sa Jordan upod sa hari ang tanan nga mga tawo. Ginhakus kag ginbendisionan sang hari si Barzilai kag nagpauli sia sa iya balay.

41 Nagdayon sa Gilgal ang hari kaupod si Kimham kag ang tanan nga mga

hangaway sang Juda kag ang katunga nga mga hangaway sang Israel. 42 Nagpalapit ang tanan nga mga Israelinhon sa hari kag nagsiling, “Ngaa gin-agaw ka sa amon sang kautoran namon nga mga taga-Juda? Gindala nila ang hari kag ang iya panimalay sa tabok sang Jordan, kag gin-upod man nila ang tanan niya nga mga tinawo.”

43 Nagsabat ang tanan nga mga taga-Juda sa mga Israelinhon, “Tungod kay malapit nga himata namon ang hari. Apang ngaa bala maakig kamo sini? Ang hari bala nagapakaon sa amon ukon nagahatag sa amon sing regalo?” 44 Nagsabat ang mga Israelinhon, “May kinamatarong kami sa hari labaw sa inyo tungod kay napulo kami batok sa isa. Ngaa inyo kami ginasikway? Indi bala kami ang nagpamuno sa pagpabalik sa aton hari?” Apang nagpakiglalis gid sing ma-baskog ang mga taga-Juda sa mga Israelinhon. Nagribok si Seba batok kay David

  20 1 May isa ka lalaki didto nga huroshuros nga ginahingalanan Seba nga anak ni Bikri nga isa ka Benjaminita. Nagpatunog sia sang trumpeta kag nagsiling “Wala kita sing labot kay David ukon sa palanublion sang anak ni Jese! Ang tagsatagsa magpauli sa iya tolda, O Israel!”

2 Ang tanan nga mga Israelinhon nagbiya kay David kag nagsunod kay Seba nga anak ni Bikri. Apang nagpabilin ang mga taga-Juda sa ila hari halin sa Jordan tubtob sa Jerusalem.

3 Sang mag-abot si David sa iya balay sa Jerusalem, ginkuha niya ang napulo ka mga asawa nga ulipon nga iya ginbilin sa pagtatap sa palasio kag ginpabantayan sila sa iban nga balay. Ginsagud niya sila apang wala na sia magpakighilawas sa ila. Ginbukot sila nga daw mga balo tubtob sa adlaw sang ila kamatayon.

4 Nagsiling ang hari kay Amasa, “Tipuna ang mga lalaki sang Juda sa sulod sang tatlo ka adlaw kag magkari sa akon.” 5 Naghalin si Amasa sa pagtipon sang Juda apang wala sia kabalik sa tion nga gintalana sang hari. 6 Nagsiling si David kay Abisai, “Malain pa gid ang pagahimuon sa aton ni Seba nga anak ni Bikri sangsa ginhimo ni Absalom. Dalha ang akon mga tinawo kag lagsa sia, kag basi makapalagyo pa sia sa aton sa iban nga siudad nga napamakuran.” 7 Naghalin sa Jerusalem si Abisai upod ang mga tinawo ni Joab kag ang mga Kereteo kag Peleteo kag ang tanan nga isganan nga mga hangaway agod lagson si Seba nga anak ni Bikri. 8 Yadto sila malapit sa daku nga bato sang Gibeon sang masugata sila ni Amasa. Nakasuksok sadto si Joab sang iya bayo nga may paha sa diin natagob ang espada. Didto nahulog ang espada. 9 Nagsiling si Joab kay Amasa, “Kamusta ka, utod?” Kag gin-uyatan niya sang tuo nga kamot ang burangos ni Amasa agod halukan. Wala nakita ni Amasa ang espada nga ginauyatan ni Joab, nga ginbuno sa iya tian kag nagwagay ang iya tinai sa duta. 10 Wala na sia ginbuno liwat tungod kay napatay gilayon si Amasa.

Ginlagas nanday Joab kag Abisai nga iya utod si Seba nga anak ni Bikri. 11 Ang isa sang mga tinawo ni Joab nagtindog sa tupad sang bangkay ni Amasa

kag nagsiling, “Magsunod kay Joab ang bisan sin-o nga magaapin kay Joab kag kay David.” 12 Nagahamyang ang bangkay ni Amasa nga nagapaligo sa iya dugo sa tunga sang dalan. Sang nakita sang tinawo ni Joab nga nagadulog didto ang tanan nga nagaalagi, ginkuha niya sa dalan ang bangkay ni Amasa kag gindala sa bukid nga gintabunan sang habol. 13 Sang makuha na ang bangkay sa dalan, ang tanan nagpadayon sa pagsunod kay Joab sa paglagas kay Seba nga anak ni Bikri.

14 Naglabay si Seba sa tanan nga mga tribo sang Israel, kag nagsulod sa Abel

sang Bet-Maaka, kaupod ang tanan niya nga mga kaapin. 15 Nag-abot ang mga tinawo ni Joab kag ginpalibutan sia sa Abel sang Bet-Maaka. Naghimo sila sang trinsera nga duta sa gua sang pader batok sa siudad, kag nagkutkot sila sa idalum sang pader agod tumbahon ini.

16 Dayon nagsinggit ang isa ka babaye nga maalam gikan sa siudad, “Pamati kamo! Pamati kamo! Singgana si Joab nga magkadto diri agod magpakighambal ako sa iya.”

17 Nagpalapit dayon si Joab kag ginpamangkot sia sang babaye, “Ikaw bala si Joab?” Nagsabat sia, “Huo.” Nagsiling ang babaye, “Pamatii ninyo ang isiling sang inyo alagad.” Nagsabat si Joab, “Nagapamati ako.” 18 Nagpadayon ang babaye, “Sang una may ginasiling nga: Pamangkuta lang sa Abel kag masabat ang tanan, 19 kon luyag mo nga mahibaloan ang mga binatasan sang mga matutom sa Israel. Kag karon luyag ninyo nga laglagon ang iloy nga siudad sa Israel. Ngaa luyag ninyo laglagon ang palanublion ni Yahweh?” 20 Nagsabat si Joab, “Wala gid ako sing tuyo nga laglagon ang siudad! 21 Indi amo sini ang hitabo kundi isa ka lalaki nga gikan sa kabukiran sang Efraim nga ginahingalanan Seba nga anak ni Bikri ang nagbato kay Haring David. Itugyan ninyo sia kag magahalin kami sa siudad.”

Kag nagsiling ang babaye kay Joab, “Ihaboy namon sa imo gikan sa pader ang iya ulo.” 22 Gintipon sang babaye ang tanan nga mga tawo, kag sa iya kaalam iya sila ginhaylo nga pugotan sang ulo si Seba nga anak ni Bikri. Ginhaboy nila ang ulo kay Joab kag ginpatunog niya ang trumpeta kag naghalin sila sa siudad. Nagpauli ang tagsatagsa sa ila puloy-an, kag nagbalik si Joab sa hari sa Jerusalem.

23 Ginpangulohan ni Joab ang bug-os nga mga hangaway sang Israel. Si Benaya nga anak ni Jehoiada amo ang pangulo sa mga Kereteo kag Peleteo. 24 Si Adoram amo ang pangulo sa pilit nga pag-obra, kag si Josafat nga anak ni Ahilud amo ang manuglista. 25 Si Seva amo ang sekretario, kag sanday Sadok kag Abiatar amo ang mga pari. 26 Kag si Ira nga taga-Jair amo ang pari ni David. Ang daku nga gutom

21  • 1 Sang panahon ni David, may daku nga gutom sa sulod sang tatlo ka tuig kag nagpamangkot sia kay Yahweh. Nagsabat si Yahweh, “Tungod ini sa sala ni Saul kag sang iya panimalay nga amo ang nagpamatay sa mga Gibeonita.” 2 (Indi mga anak sang Israel ang mga Gibeonita kundi mga kaliwatan sang mga Amoreo. Bisan ginsaad sang mga Israelinhon nga apinan sila gintuyo ni Saul nga patyon sila para sa Israel kag Juda.)

3 Ginpatawag ni David ang mga Gibeonita kag ginpamangkot, “Ano ang maalagad ko sa inyo? Kag paano ako magbayad sang sala agod inyo pagabendisionan ang mga tawo ni Yahweh?”

4 Nagsabat sa iya ang mga Gibeonita, “Indi pilak ukon bulawan ang ginaaway namon kay Saul kag sa iya mga kaliwat, kag indi man namon handum nga patyon ang bisan sin-o sa Israel.”

Nagpamangkot ang hari, “Ano bala ang himuon ko para sa inyo?” 5 Kag nagsabat sila sa hari, “Ginlaglag kami sina nga lalaki kag gintuyo nga uboson agod madulaan kami sing duog sa bug-os nga kadutaan sang Israel. 6 Itugyan ninyo sa amon ang pito niya nga mga anak nga lalaki agod mabitay namon sila sa atubangan ni Yahweh sa bukid ni Yahweh sa Gibeon.” Kag nagsiling ang hari, “Igatugyan ko sila.”

7 Apang ginluwas ni David si Mefibaal nga anak ni Jonatan nga anak ni Saul tungod sa sinumpaan nga ginhimo nanday David kag Jonatan nga anak ni Saul sa

atubangan ni Yahweh. 8 Ginkuha sang hari sanday Armoni kag Mefibaal, ang duha ka anak nga lalaki kay Saul ni Rizpa nga anak ni Aya, kag ang lima ka anak nga lalaki kay Adriel ni Merob nga anak ni Saul. Anak ni Barzilai nga taga-Meholat si Adriel. 9 Ginhatag niya sila sa mga Gibeonita nga nagbitay sa ila sa bukid sa atu-bangan ni Yahweh.

Ginpamatay sila nga pito sing tingob sa nahauna nga adlaw sadto sang pag-ani, ang pagsugod sang pag-ani sang sebada.

10 Nagkuha sang sako si Rizpa nga anak ni Aya kag ginladlad ini sa bato agod iya pasilungan halin sa pagsugod sang pagpangani tubtob nga maulanan ang mga bangkay. Wala niya ginpahulon sa mga ini ang mga pispis kon adlaw ukon ginpapalapit ang mapintas nga sapat kon gab-i.

11 Sang mahibaloan ni David ang ginhimo ni Rizpa nga anak ni Aya kag asawa nga ulipon ni Saul, 12 naglakat si David kag ginkuha niya sa mga taga-Jabes sang Galaad ang mga tul-an nanday Saul kag Jonatan nga iya anak. (Sila ang nagkawat sa mga ini sa ginbitayan sang mga Pilisteo sang patyon nila si Saul sa Gilboa.) 13 Ginkuha ni David halin didto ang mga tul-an ni Saul kag ni Jonatan nga iya anak, kag gintipon nila ang mga tul-an sang mga ginbitay. 14 Ginlubong nila ang mga tul-an nanday Saul kag Jonatan sa kadutaan sang Benjamin sa Sela sa lulobngan ni Kis nga amay ni Saul. Kag tapos nga matuman ang sugo sang hari, ginsabat sang Dios ang ila pangamuyo para sa ila kadutaan.

15 Ang mga Pilisteo nagpakig-away liwat batok sa Israel. Naglakat si David upod sa iya mga tinawo kag nagpakig-away sa mga Pilisteo. Ginkapoy sadto si David, 16 kag gintuyo sia nga patyon ni Isbi-Benod nga apo sang higante. May bangkaw sia nga saway kag nagabug-at sing tatlo ka kilo, kag may bag-o man sia nga espada. 17 Apang ginbuligan ni Abisai nga anak ni Sarvia si David. Ginbuno niya ang Pilisteo kag ginpatay. Kag nagsumpa ang mga tinawo ni David, “Dili ka na gid mag-upod sa amon sa inaway agod indi mapatay ang paglaum sang Israel.”

18 Sa tapos sini, may inaway pa gid liwat batok sa mga Pilisteo sa Gob. Didto ginpatay ni Sibekai nga taga-Husa si Saf nga isa pa gid sa mga kaliwat sang higante.

19 Kag sa isa pa gid ka inaway batok sa mga Pilisteo sa Gob, ginpatay man ni Elhanan nga anak ni Yaare-oregim sang Betlehem si Goliat sang Gat nga ang uloyatan sang bangkaw subong ka daku sang salagunting sang hablon.

20 Sa isa pa gid ka inaway sa Gat, may isa ka daku nga lalaki nga may anum ka tudlo sa tagsa ka kamot kag tiil – beinte kuatro tanan. Kaliwat man sia sang higante. 21 Ginhangkat niya ang Israel apang ginpatay sia ni Jonatan nga anak sang utod ni David nga si Simei.

22 Nahulog sa mga kamot ni David kag sang iya mga tinawo ining apat ka mga kaliwat sang higante. Ang Ambahanon ni David

22   • 1 Gin-amba ni David ini nga ambahanon sang luwason sia ni Yahweh sa mga kamot ni Saul kag sang iya mga kaaway. 2 Nagsiling sia,

“Si Yahweh amo ang akon bato, ang akon kabakod kag akon manlulowas. 3 Ang akon Dios amo ang akon bato, sa imo ako nagapanago; sia ang akon taming, akon kusog, kag akon kaluwasan; sia ang akon pamakud kag akon palanagoan; akon Manlulowas, ginluwas mo ako sa kalakasan.

4 Nagpanawag ako kay Yahweh, sia nga dapat dayawon, ginluwas niya ako sa akon mga kaaway.

5 Ginpalibutan ako sang mga balod sang kamatayon, gintabunan ako sang nagadasdas nga baha; 6 Gin-gapos ako sang mga lubid sang Lulobngan, kag yari sa atubangan ko ang mga si-od sang kamatayon. 7 Sa tunga sang kapi-ot, nagpanawag ako kay Yahweh, nagpanawag gid ako sa akon Dios. Kag ginpamatian niya ang akon tingog gikan sa iya templo, naglambot sa iya mga dulonggan ang akon pangamuyo. 8 Nag-uyog kag naglinog ang duta, ang mga sadsaran sang kalangitan naguyog, naglinog tungod sa iya kaakig. 9 Nagtub-ok ang aso sa iya ilong, naggua sa iya baba, ang nagadabadaba nga kalayo. kag nagadabdab, nga mga baga.10 Nagbukas ang langit kag sia nagkunsad, may gal-um sa idalum sang iya mga tiil. 11 Nagsakay sia sa kerubin kag naglupad sa mga pakpak sang hangin.

12 Ginhimo niya nga pasilongan ang kadudolman, madamol nga mga panganod sang ulan sa langit. 13 Gikan sa inggat sang iya, ginpasiga ang nagakalayo nga baga. 14 Nagdaguob, si Yahweh gikan sa langit, kag ginpabati sang Labing Mataas ang iya tingog. 15 Ginpana niya kag ginlapta ang mga kaaway, nagpangilat kag sila napatay. 16 Nakit-an ang kadadalman sang dagat, nabuksan ang sadsaran sang kalibutan sa pagsabdong ni Yahweh, sa buga sang ginhawa sang iya ilong. 17 Gikan sa langit, ginkuha niya ako; gikan sa madalum nga tubig, ginbatak niya ako. 18 Ginluwas niya ako sa makusog nga kaaway, sa mga nagadumot sa akon nga makusog pa sa akon. 19 Ginsalakay nila ako sa adlaw sang akon kalalat-an, apang si Yahweh nangin akon tagpangapin. 20 Ginpagua niya ako sa malapad nga duog, ginluwas ako tungod palangga niya ako.

21 Ginbalusan ako ni Yahweh sing maayo sa akon pagkamatarong, ginpadyaan ako sa katinlo sang akon mga kamot.

22 Kay ginsunod ko ang mga dalan ni Yahweh, kag wala ko gintalikdan ang akon Dios para sa malain. 23 Ang iya mga pulong yari sa akon sa gihapon, kag wala ako nagapalayo sa iya mga kasugoan. 24 Sa atubangan niya wala ako sing sala, kag nagalikaw ako sa pagpakasala. 25 Ginapadyaan ako ni Yahweh sa akon pagkamatarong, sa akon katinlo sa iya panan-awan.

26 Sa matutom, ipakita mo ang imo pagkamatutom, sa matarong, ipakita mo ang imo pagkamatarong. 27 Sa putli, ginapakita mo nga putli ka;

apang sa tiko, ginapakita mo tuso ka. 28 Ginaluwas mo ang mga tawo nga mapainobuson apang ginasumpo mo ang bugalon. 29 Ikaw gid ang akon kapawa, O Yahweh; ginasanagan ni Yahweh ang akon kadulom. 30 Huo, kon kaupod ko ikaw, madaog ko ang bug-os man nga mga hangaway, malukso ko ang pader sa gahum sang akon Dios. 31 Maayo gid ang dalan sang Dios, natuman na ang pulong ni Yahweh; panaming sia sang tanan nga nagahangup sa iya. 32 Kag sin-o pa bala ang Dios luas kay Yahweh? Kag sin-o pa bala ang bato luas sa aton Dios? 33 Ang Dios amo ang akon mabakod nga dalangpan, ginatinloan niya ang akon alagyan. 34 Ginapabakod niya subong sang usa ang akon mga tiil, ginpatindog ako sa mataas nga duog. 35 Ginahanas niya ang akon mga kamot sa pagpakig-away kag ang akon mga butkon sa pagbingat sang pana nga saway. 36 Ginhatag mo sa akon ang imo taming sang panabang; sa imo bulig, nangin gamhanan ako. 37 Ginpasangkad mo ang akon pagalakaran, agod indi ako madanlog; 38 Ginlagas ko ang akon mga kaaway kag ginpamatay, wala ako nagbalik tubtob naubos ko sila. 39 Gin-ubos ko sila kag ginlutos, kag wala na ginpabangon, napukan sila sa akon tiilan.40 Ginpabaskog mo ako para sa inaway, ginpaduko mo sa atubangan ko ang akon mga kaaway. 41 Ginpapalagyo mo sa akon ang akon mga kaaway, ginlaglag ko ang mga nagadumot sa akon. 42 Nagpangayo sila sang bulig apang wala sing makaluwas sa ila nagpanawag sila kay Yahweh, Apang wala niya sila pagsabta. 43 Ginpudpod ko sila subong sang yab-ok sa duta, gintapakan ko sila kag gintungtongan subong sang lunang sa dalan. 44 Ginluwas mo ako sa mga pagpamatok sang akon mga tawo kag ginhimo mo ako nga pangulo sang mga pungsod. Gin-alagaran ako sang mga tawo nga indi ko kilala, 45 Nag-abot ang mga dumoluong sa pagpasakop, sa tion nga mabatian ako, nagasunod sila. 46 Nadulaan sing kaisog ang mga dumoluong, naggulowa sila nga nagakulorog sa ila mga pamakod. 47 Buhi si Yahweh! Dayawon ang akon Bato! Himansagon ang Dios, ang Bato sang akon kaluwasan, 48 ang Dios nga nagahatag sa akon sang pagtimalos kag iya ginapaidalum sa akon ang mga pungsod. 49 Ginaluwas mo ako sa akon mga kaaway, ginapadaog sa akon mga kasumpong, ginaapinan sa mga tawo nga mapintas. 50 Gani pagadayawon ko ikaw, Yahweh, sa tunga sang kapungsoran, pagaambahan sang pagdayaw ang imo Ngalan. 51 Daku nga kadalag-an ang ginahatag niya sa iya hari,

kag ginapabatyag ang iya paghigugma nga wala sing katapusan sa iya pinili, kay David kag sa iya mga kaliwat sa walay katapusan.”

 23  1 Amo ini ang katapusan nga mga pulong ni David: Isa ka binalaybay ni David nga anak ni Jese, isa ka binalaybay sang lalaki nga ginpadunggan sang Dios, ang ginhaplasan sang Dios ni Jacob, ang manug-amba sang mga salmo sang Israel, 2 “Ang Espiritu ni Yahweh nagahambal paagi sa akon, ang iya pulong yari sa akon dila. 3 Naghambal ang Dios sang Israel, nagsiling sa akon ang Bato sang Israel: Ang hari nga nagagahum sing matarong sa mga tawo nga nagagahum sa kahadlok sa Dios 4 kaangay sang adlaw nga nagasilak, sa kaagahon nga wala sing panganod nga nagapatubo sa hilamon gikan sa duta sa tapos sang ulan. 5 Indi bala nga amo gid sini ang akon panimalay sa atubangan sang Dios? Naghimo sia sa akon sang kasugtanan nga wala sing katapusan,maayo kag mabakod sa tanan nga mga butang. Indi bala nga iya tapuson ang akon kaluwasan kag tumanon ang mga handum? 6 Apang ang di-diosnon kaangay sa mga tunok nga ginahaboy, wala sila ginauyatan

7 kundi dapat pa nga gamitan sang salsalon ukon uloyatan kag sila pagasunugon.

Isganan nga mga hangaway ni David • 8 Amo ini ang mga ngalan sang mga isganan nga mga kaupod ni David: si

Isbaal nga Takmonita amo ang nagapangulo sa Tatlo. Ginauyatan niya ang iya bangkaw, kag walo ka gatos ang iya napatay sa isa lang ka inaway.

9 Dason sa iya amo si Eleazar nga anak sang isa ka Ahohita nga si Doding. Isa sia sa tatlo ka mga isganan nga kaupod ni David sang hangkaton nila ang mga Pilisteo nga nagatilipon didto sa pagbato. Sang nag-isol ang mga Israelinhon, 10 nagtindog sia kag nagpanglabolabo sang mga Pilisteo tubtob nga magpalaminhod ang iya kamot kag naunay ini sa iya espada. Nagdala si Yahweh sang daku nga kadalag-an sadto nga adlaw. Ginsunod sia sang iban pa nga mga hangaway apang para lang manguha.

11 Dason sa iya amo si Samma nga anak ni Age nga Ararita. Nagtipon ang mga Pilisteo sa Lehi sa diin may uma didto nga puno sang munggo kag nagpalalagyo ang mga tawo sa atubangan sang mga Pilisteo. 12 Apang si Samma wala maghalin sa tunga sang talamnan kag nagpangapin sia kag ginpanglabo ang mga Pilisteo. Kag nagdala si Yahweh sang daku nga kadalag-an.

13 Tig-alani sadto, kag ang tatlo ka mga isganan gid sa Treinta nagkadto kay David sa kueba sa Adullam samtang nagakampo ang mga hangaway sang mga Pilisteo sa kapatagan sang Refaim. 14 Si David yadto sa mabakod nga duog kag ang garison sang mga Pilisteo yadto sa Betlehem. 15 Nauhaw si David kag nagsiling, “Sin-o bala ang makapainum sa akon sang tubig gikan sa bubon malapit sa puerta sang Betlehem?” 16 Gani ginsulod sang tatlo ka maisog ang kampo sang mga Pilisteo, nagsag-ob sang tubig sa bubon malapit sa puerta sang Betlehem kag gindala ini kay David. Apang wala ini gin-inum ni David kundi gin-

ula para kay Yahweh. 17 Nagsiling sia, “Indi ko ini mahimo, O Yahweh. Indi bala nga ini dugo sang mga lalaki nga naghalin kag nagduso sang ila kabuhi sa katalagman?” Gani wala sia mag-inum sini. Amo ini ang ginhimo sang tatlo ka isganan.

18 Si Abisai nga utod ni Joab kag anak ni Sarvia amo ang pangulo sang Treinta. Gin-gamit niya ang iya bangkaw batok sa tres sientos kag ginpatay sila, gani nagbantog sia nga subong sang Treinta. 19 Nangin bantog sia sa Treinta kag nangin pangulo nila, apang wala gihapon niya natupongan ang Tatlo.

20 Maisog nga lalaki si Benaya nga anak ni Yehoida nga taga-Kabzel, kag dalayawon ang iya mga binuhatan. Duha ka anak ni Ariel sang Moab ang iya ginpatay. Isa ka adlaw sang nagaulan sang yelo, nagtusmog sia sa isa ka bubon kag ginpatay ang leon nga yadto didto. 21 Ginpatay man niya ang isa ka daku nga Ehiptohanon nga may bangkaw nga ginauyatan. Ginsalakay sia ni Benaya nga inuglampos lang ang iya dala kag gin-agaw ang bangkaw sa kamot sang Ehipto-hanon kag ginpatay sia sa iya sang iya bangkaw. 22 Ginhimo ni Benaya nga anak ni Jehoida ini tanan kag nangin bantog sia subong sang tatlo ka mga isganan. 23 Pinakabantog sia sa Treinta apang wala niya natupongan ang Tatlo. Ginhimo sia ni David nga pangulo sang iya mga pinili nga tinawo.

24 Kaupod sa Treinta amo sanday: Asael nga utod ni Joab, Elhanan nga anak ni Dodo sang Betlehem, 25 Samma

kag Elika sang Harod, 26 Helez nga Peleteo, Irang nga anak ni Ikkes sang Tekoa, 27 kag Abiezer sang Anatot, Sibekay sang Husa, 28 Zalmon sang Ahoh, Maharai sang Netofa, 29 Heleb nga anak ni Baana sang Netofa, Ittay nga anak ni Riabi sang Gilbea sang Benjamin, 30 Benaya sang Piraton, Hiddai sang sapa sang Gaas, 31 Abialbon sang Bet-Araba, Azmavet sang Bahurin, 32 Eliaba sang Saalbon, Yasen nga anak ni Jonatan, 33 Samma sang Harar, Ahima nga anak ni Sarar sang Harar, 34 Elifelet nga anak ni Ahasbai sang maaka, Eliam nga anak ni Ahitofel sang Gilo, 35 Hezrai sang Karmel, Paarai sang Arab, 36 Igal nga anak ni Natan sang Zoba, Bani sang Gad, 37 Selek nga Amonita, Naharai sang Beerot kag manugdala sang hinganiban ni Joab nga anak ni Sarvai, 38 Ira kag Gareb sang Yatir, 39 kag Urias nga Heteo. Treintay siete sila tanan. Ang pagpalista ni David

24   • 1 Sa liwat naakig si Yahweh sa Israel, kag ginhimo niya si David nga kabangdanan sang ila kalalat-an, “Sige, isipon mo ang Israel kag Juda.”

2 Nagsiling ang hari kay Joab nga heneral sang iya mga hangaway, “Libuta ninyo subong ang tanan nga mga tribo sang Israel halin sa Dan tubtob Berseba, kag isipon ang mga tawo agod mahibaloan ko kon ano sila kadamo.”

3 Nagsiling si Joab sa hari, “Kabay nga padamuon ni Yahweh nga imo Dios ang imo mga tinawo sa isa ka gatos ka pilo, kag makita ini sang akon agalon nga hari. Apang ngaa luyag sang akon agalon nga hari himuon ini nga butang?’

4 Apang nagpangin-babaw ang pulong sang hari agod si Joab kag ang mga opisyales sang mga hangaway maglakat sa pag-isip sa mga tawo sang Israel. 5 Nagtabok sila sa Jordan kag nagsugod sa Aroer nga siudad nga yadto sa pinakatunga sang kapatagan kag

nagpadayon sa Gad kag Jazer. 6 Nagkadto sila sa Galaad kag sa kadutaan sang mga Heteo kag

sa Kades. Nagpadayon sila sa Dan kag nagbalik pakadto sa Sidon, 7 kag nag-abot sa pamakod sang Tiro kag sa kabanwahanan sang mga Heveo kag mga Canaaneo. Nagtapos sila sa Negeb sang Juda kag Berseba.

8 Ginlibot nila ang bug-os nga kadutaan kag nagbalik sa Jerusalem sa katapusan sang siyam ka bulan kag beinte ka adlaw.

9 Ginhatag ni Joab sa hari ang bug-os nga kadamuon sang pagpalista: may walo ka gatos ka libo nga mga isganan nga lalaki sa Israel nga makauyat sang espada, kag may lima ka gatos ka libo sa Juda.

10 Apang ginbasol si David sang iya konsiensya sa tapos mahimo ang pagpalista, kag nagsiling kay Yahweh, “Daku gid nga sala ang akon ginhimo. Apang subong, O Yahweh, ginapangayo ko nga patawaron mo ang sala sang imo alagad kay daku nga kabuangan ang akon ginhimo.”

11 Sang pagkaaga sang magbugtaw si David, nag-abot ang pulong ni Yahweh sa propeta nga si Gad, ang manugpakot ni David, 12 “Maglakat ka kag singgana si David: Amo ini ang ginasiling ni Yahweh nga ginapapili ko ikaw sa tatlo ka mga butang. Magpili ka sang isa kag ini ang pagahimuon ko sa imo.” 13 Ginkadtoan dayon ni Gad si David kag ginpamangkot, “Luyag mo bala sang tatlo ka tuig nga tiggolutom sa imo kadutaan? Ukon tatlo ka ka bulan nga magapanago sa imo mga kaaway samtang ginalagas ka nila? Ukon tatlo ka adlaw nga kalalat-an sa imo kadutaan? Hunahonaa subong kag sugiri ako kon ano ang isabat ko sa nagsugo sa akon.”

14 Nagsiling si David kay Gad, “Nabutang gid ako sa ital-ital. Mahulog na kita subong sa kamot ni Yahweh nga maluloy-on gid apang indi ako pagpabay-i nga mahulog sa kamot sang mga tawo.”

15 Gani nagpadala sang kalalat-an si Yahweh sa Israel halin sa aga tubtob sa gintalana nga tion. Setenta ka libo ang napatay sa mga tawo halin sa Dan tubtob sa Berseba.

16 Gin-untay sang anghel ang iya kamot sa Jerusalem agod laglagon ini apang ginhinulsulan ni Yahweh ang pagsilot kag ginsingganan ang anghel nga nagapanglaglag, “Husto na ina, punggi ang imo kamot?” Ang anghel ni Yahweh yadto malapit sa linasan ni Arauna nga Yebuseo.

17 Sang makita ni David ang anghel nga nagapamatay sa mga tawo, nagsiling sia kay Yahweh, “Ako ang nakasala! Ako ang nakahimo sing malain, apang ini sila mga karnero lang. Ano bala ang nahimo nila? Ihulog mo ang imo kamot sa akon kag sa kaliwat sang akon amay mo.”

18 Nagkadto si Gad kay David sina nga adlaw kag nagsiling sa iya, “Maglakat ka kag magpatindog sang altar kay Yahweh sa linasan ni Arauna nga Yebuseo.”

19 Naglakat dayon si David subong sang ginsugo ni Yahweh paagi kay Gad. 20 Sang makita ni Arauna nga nagapalapit sa iya ang hari kag ang iya mga tinawo, ginsugata niya sia kag nagduko sia nga nagadapat sa duta ang nawong sa atubangan sang hari, 21 kag nagsiling nga “Ano bala ang katuyoan sang akon agalon nga hari sa iya alagad?” Nagsabat si David, “Baklon ko ang imo linasan agod makapatindog ako sang altar kay Yahweh kag agod nga mag-untat na ang kalalat-an sa mga tawo.” 22 Nagsiling si Arauna kay David, “Kuhaa na ginuo ko nga hari ang maayo sa pamatyag mo kag ihalad ini. Yari ang akon mga baka agod ihalad sa altar, kag ang mga karito nga inuglinas kag singkaw agod himuon nga panggatong. 23 Ginhatag ni Arauna sa hari ini tanan, O mahal nga hari. Kabay nga pamatian kamo ni Yahweh nga inyo Dios.”

24 Apang nagsiling ang hari kay Arauna, “Indi ini mahimo. Bayaran ko ikaw sini tanan kay indi ko mahalad kay Yahweh nga akon Dios ang mga dulot nga sinunog nga wala ko mabayaran.” Gani ginbayaran ni David sang singkuenta ka shekel nga pilak ang linasan kag mga baka. 25 Nagpatindog si David sang altar kay Yahweh kag naghalad sang mga dulot nga sinunog kag sang mga halad sa paghiambitanay. Kag naluoy si Yahweh sa kadutaan kag nag-untat ang kalalat-an sa Israel.